Proverbs 22 - De Beebaa Dabu

¹ De ingoo danuaa e hagamogomogo ange i goloa lagolago, de hagadubu e danuaa ange i goolo aabe go selevaa.

² Tangada lava ma tangada hagaau aloha se dagodo daudahi i de mee nei: go Tagi Maolunga ne haia gilaau ngaadahi.

³ Tangada maanetonu e mmuni i de masavaa aana e gidee ai de mee hagamanavasaa, aagai tangada lodo senga e hagassoe donu huu i dono haiava, gai ia e duasala ai naa donu.

⁴ De hagaoanga o de lodo maolalo ma de madagu i Tagi Maolunga, go de lava ma de hagadubu, aama de mouli.

⁵ Haiava o tangada hadu muna iai manu daladala ma denga sele, aagai tangada e dagidiiloo dagodo o ono lodo e hagammao gee i mee nei.

⁶ Hagaabo ina ange tama gi de haiava oona e hano ai, gai de masavaa naa huu oona e madua age ai, gai ia e dee hano gee ai donu.

⁷ Tangada lava e dagi de gau hagaau aloha, gai tangada muli se dangada hai hegau niio tangada ne gaavange sseene gi de ia.

⁸ Tangada e dooa de baubau e hagihagi naa de hai ngadaa, gai de laagau o de lili e hagaduasala ai laa dangada e hagadeai naa.

⁹ Tangada abodonu e manuuia naa donu, go hiidinga ia e gaavange ana gai gi de gau hagaau aloha.

¹⁰ Haia gi hano gee tangada doo i mee, gai gu deai hogi se hebagi, ma de hagadaumee aama de hagadogaa.

¹¹ Tangada e lodo laa gi gilimalali ono lodo, gai ana muna e maamaane, e hai naa ga se soa niio de hodooligi.

¹² Luu mada o Tagi Maolunga e daumada tangada iloo mee, aagai e hai gi dee ssula muna a tangada e dee hai hegau i de muna abodonu.

¹³ Tangada vaiduu e hagadaba, “E dahi laiono i duaahaho!” aabe, “Au e daia naa ga magau i honga denga haiava!”

¹⁴ De ngudu o de hine dagodo haisala e bei de geelinga gelo, gai tangada i lalo de bole o Tagi Maolunga e doo ange naa gi lo te geelinga laa.

¹⁵ De lodo senga e dagodo i lodo o de gauligi, aagai de laagau haele e aau gee de lodo senga mai i ono daha.

¹⁶ Be goai e vaivai haia tangada hagaau aloha gi kii ange ai dono lava, ma tangada e ngadi gaavange mee gi tangada lava — gilaau ngaadahi e hagaau aloha donu.

Hanu muna a tangada heiangi

¹⁷ Huli ange doo dalinga hagalaangona muna a de gau heiangi, gai haia gi dagodo de iloo mee i oo lodo,

¹⁸ gai e hagamalangilangi dau daohi muna nei i oo lodo, gai koe gi baba ange e tala muna nei alodahi.

¹⁹ Au e agoago adu goe anailaa nei, gi hagadonusia ai e goe Tagi Maolunga.

²⁰ E aha, e dee e matolu muna heiangi aagu gu sisi adu gi de goe, go muna bale ma de iloo mee,

²¹ e agoago adu ai goe i de muna abodonu ma de heohi, gi maua ai e goe i de tala ange de muna heohi gi tangada ne haia goe gi hano?

²² Aude gaiaadia mee o tangada hagaau aloha, go hiidinga ia e hagaau aloha; aude hai baasi ange gi tangada duasala i de mommee hagamodu muna,

²³ i hiidinga Tagi Maolunga e bale ange naa donu gilaadeu, ma de hai gi hai ngadaa mouli o dangada e gaiaadia alaadeu mee.

²⁴ Aude hai soa ange gi tangada e moolau laa de lili, gai gi dee hagabuni ange gi tangada lillili,

²⁵ aabe gi ago ange i ana dahulinga, gi dee noodia ai goe i ana dahulinga.

²⁶ Koe gi dee se dangada e hagatoo donu e hagao muli a dahi dangada, aabe go de daohi age de mee e hagao ai muli a dahi dangada gee;

²⁷ noo koe e dee maua i de hagao, gai gu aha gu dugu ange ai gi gaavee gee doo moenga?

²⁸ Aude hagangaalue ina denga goinga madagidagi, a denga dubuna gu lava laa i de hagatuu.

²⁹ Koe e gidee laa dahi dangada labagau i de hai ana hegau? Ia e hai hegau naa i mada i mua o denga hodooligi; ia e dee hai hegau ange naa donu gi hanu ngadi dangada.