Philippians 4 - De Beebaa Dabu

Muna bale a Paul

¹ Deenei ai, ogu daina hagamogomogo ma dogu buliaamoou ai, goodou go dogu malangilangi ma dogu hau mahamaha, denga soa hagamogomogo — goodou tuu gi makaga i lodo o Tagi Maolunga.

² Au e dangidangi ange gi Euodia ma Syntyche, gilaau gi hagadanuaa ina olaau magavaa i lodo o Tagi Maolunga.

³ Au e dangidangi adu hogi gi de goe, dogu soa hai hegau i de mee abodonu, balea ange luu haahine naa, go hiidinga gilaau ne hagaduu ngae ga hai hegau madali au i hegau o de longo danuaa, madali Clement ma ogu soa hai hegau ange laa, go gilaadeu gu daohi olaadeu ingoo i de beebaa o de mouli.

⁴ Goodou gi malangilangi i lodo o Tagi Maolunga i masavaa alodahi! Au e ahe ange e hai adu, goodou gi malangilangi!

⁵ Haia gi iloo e dangada alodahi bolo goodou e daudonu. Tagi Maolunga gu dai ahe mai donu!

⁶ Goodou gi dee manavasaa i dahi mee daudahi, aagai goodou dalodalo i mee alodahi ma de dangidangi i mee oodou e duasala ai, ma de hagaahe ange de abodonu, ga hai gi iloo e de Maadua oodou mee e duasala ai.

⁷ Gai de baba mai i daho de Maadua, e dee maua laa e dangada gi tonu ange aagena, gi hagaloosi ina oodou lodo ma oodou maanadu i lodo o Klisdo Iesu.

⁸ Denga daina, aanei agu muna hagaodi: mee naa huu ni mee abodonu, ma mee e heohi de hagadubu, ma mee e heohi, ma mee gilimalali, ma mee e tilo danuaa, ma mee hagallongo danuaa, ma mee danuaa, ma mee e heohi i de tuhi, goodou hagasaelea mee nei.

⁹ Gai mee alodahi oodou gu agoago ai, ma de langona aama de gidee i ogu daha — gai goodou hai hegau ai. Gai de Maadua o de nnoho paba gi noho i oodou daha.

De abodonu i de mee ngadi gaavange

¹⁰ Au gu malangilangi mmao i lodo o Tagi Maolunga, i hiidinga goodou gu maua ange hogi i de hagaago mai doodou llodo e bale mai au. Au e iloo bolo goodou gu llodo huu e bale mai au i mua, aagai tigi maua.

¹¹ Au e dee tala adu mee nei i hiidinga au gu duasala i dahi mee, go hiidinga au gu agoago gi maua e au i de lodo danuaa donu huu i agu mee e hanu.

¹² Au e maua i de mouli i mee sogoisi, gai au e maua hogi i de malangilangi i mee lagolago. Au gu lava i de agoago danuaa gi maua e au i de malangilangi i mee alodahi, e dee hilihili be au e bosu be saalohia, be go dogu lava i mee alodahi aabe go dogu duasala.

¹³ Au e maua donu i de hai mee alodahi i ssauaa o Klisdo, go de ia e hagammahi ina ogu lodo.

¹⁴ Gai se mee danuaa donu doodou bale mai i dogu hai ngadaa.

¹⁵ Goodou de gau Philippi e iloo bolo de masavaa oogu ne hano gee ai i Macedonia, i taamada o de hagadele de longo danuaa, gai go goodou donu huu ne ngadi gaamai dahi mee gi de au, teai ange donu se nohoanga dabu ne balea mai au.

¹⁶ De masavaa oogu nogo noho ai hogi i Thessalonica, gai ne hia oodou hanonga ne gaavadu ai dahi mee e bale mai ai au.

¹⁷ Au e dee se lodo i doodou mee ngadi gaavange, aagai ne lodo e hai gi laumalie de manuuia oodou e kave.

¹⁸ Gai gu tae mai donu sseene alodahi oodou ne gaamai nei, gai gu tubu ange donu i mee oogu e hagadanuaa ai! Gai gu odi ange danuaa donu ogu mee e hagadanuaa ai, i dagu kave nei i daho Epaphroditus doodou mee ngadi gaavange ne gaamai nei. Mee e bei ssigidaumaha o mee maanongi e hagamalangilangi ina laa de Maadua.

¹⁹ Gai dogu Maadua e gaavadu naa gi goodou mee alodahi oodou e duasala ai, gi bei laumalie o dono lava i lodo o Klisdo Iesu.

²⁰ Gidaadeu ga hagamahamaha de Maadua taadeu Damana ga hano ai e dee ngado mai. Amen.

Hagaboo hagaodi

²¹ Gai dagu hagaboo ange gi dangada alodahi o de Maadua gu ni dangada laa niio Klisdo Iesu. Denga daina madali au e gaavadu hogi delaadeu hagaboo gi goodou.

²² Dangada alodahi o de Maadua e gaavadu hogi delaadeu hagaboo gi goodou, gai e kii ai hugadoo dangada i de hale o Caesar i de llodo e gaavadu delaadeu hagaboo.

²³ De abodonu o Tagi Maolunga go Iesu Klisdo gi dagodo i oodou daha.