Micah 5 - De Beebaa Dabu

De haanau o dahi dagi i Bethlehem

¹ De aduhale o denga daane hebagi, hagabuni ina oo hagabuulinga hebagi, go hiidinga hanu gu dai hebagi mai naa gi taadeu aduhale. Gilaadeu e hagailiili naa de galaahuu o tagi o Israel i de laagau.

² Aagai koe, Bethlehem Ephrathah, koe e damaa mee ange i denga aamuli o Judah, aagai dahi dagi e sula age naa i oo daha, ia e dagi naa i Israel, gai ia ne daamada mai huu i denga masavaa gu hulo, gai ne daamada mai loo madagidagi.

³ Deenei ai, ia e tili naa gilaadeu ga dae ai gi de masavaa o de hine e hai ai ono hagalangona e haanau ai, gai ono daina e doe e aahe mai naa ga dau ange gi de gau Israel.

⁴ Ia e duu naa ga hagaloosi ana ssiibi i mahi o Tagi Maolunga, ma ssauaa o Iahweh dono Maadua. Gai gilaadeu e nnoho paba naa, gai ia e maolunga naa i henua i lalo alodahi.

⁵ Gai ia e hai naa go delaadeu nnoho paba. De masavaa o de gau Assyria e kage mai ai gi honga taadeu henua ma de ulu mai gi lodo odaadeu hale buibui makaga, gai gidaadeu e hili naa e dogohidu dangada hagaloosi gi hai baasi ange gi de ia, gai e dogovalu dagi mai i daho dangada,

De hagaola ma de hagaduasala

⁶ gi dagina de henua go Assyria i de gadilaasa, ma de henua o Nimrod i de gadilaasa. Ia e hagaola naa gidaadeu mai i de gau Assyria i dono masavaa e gage mai ai gi honga taadeu henua ma de humai gi lodo odaadeu goinga.

⁷ Gai dangada o Jacob e doe i daho denga huaadangada soa e bei naa de mee maluulu mai i daho Tagi Maolunga, ma de langi pala i honga helii, e dee tali ange donu dahi dangada aabe e dahi alaadeu tali ange gi tangada.

⁸ Gai dangada o Jacob e doe e nnoho laa i magavaa o denga huaadangada soa, e bei de laiono i magavaa o denga manu lodo henua, ma de laiono mmahi i magavaa o denga hagabuulingaa ssiibi, e hagalagolagohia laa ma de hangahanga ina mee i honga dono haiava, gai e deai naa donu se dangada e maua i de hagaola.

⁹ Koe e hebagi ange naa ga kii i oodou hagadaumee; oo hagadaumee alodahi e daa naa ga maakau.

¹⁰ E hagadaba Tagi Maolunga, “De laangi laa, gai au e daa naa ga maakau au hoosa i oo daha ma de oha oo hada hebagi.

¹¹ Au e oha naa denga aduhale i doo henua, ma de oha iho oo mommee buibui makaga.

¹² Au e oha naa de hai huuhuaa mee i oo daha, gai koe e dee helau naa hogi dangada.

¹³ Au e oha naa oo diinonga laagau, ma de aau gee oo duludulu hadu dabu, gai koe e dee ahe ange naa donu e daumaha ange gi mee aau ne hagatuu i luoo lima.

¹⁴ Au e unuunusi age naa duludulu laagau o Asherah ga aau gee mai i oo daha, ma de oha oo aduhale.

¹⁵ Au e sui ange naa hegau a denga huaahenua i dogu bole, go gilaadeu tee hagallongo mai laa gi de au.”