Matthew 28 - De Beebaa Dabu

De mouli age

¹ Dua de laangi o Sabbath, i taiao o tahi laangi o de uvigi, gai Mary Magdalene ma de Mary ange laa ne hulo e tilo taanunga.

² Gai tilo, gu kona de ngalungalue de henua, i hiidinga dahi dangada de langi o Tagi Maolunga gu hano iho ma gu hagadige gee de hadu e buibui ai laa de haitoga o taanunga, ga noho i honga de hadu laa.

³ Dagodo o tangada de langi laa e bei de uila, gai ono malo e tea bei denga snow.

⁴ Gai de gau hagaloosi gu bolebole ma de maatagu, gilaadeu gu bei dagodo o de gau maakau.

⁵ Aagai tangada de langi ne hai ange gi luu haahine laa, “Gooluu gi dee maatagu, au e iloo bolo gooluu e ssala Iesu, ne daudau laa i de laagau lui.

⁶ Ia e dee maleva i kinei, ia gu mouli age, bei dana hai gu tala adu ai. Loomai diiloo dono mommee nogo dagodo ai.

⁷ Gai gooluu hagamoolau hulo daalaa ange gi ana dangada agoago bolo ia gu mouli age, gai tilo, ia gu hano i oodou mada i mua gi Galilee; go kilaa oodou e gidee ai ia. Tilo, au gu tala adu mee nei gi gooluu.”

⁸ Gai gilaau ne hagamoolau ga hulo gee mai i taanunga, gilaau gu maatagu gai gu malangilangi mmao. Gai gilaau ne saavini ga hulo e tala ange gi ana dangada agoago.

⁹ Gai tilo, Iesu gu hedae ange gi gilaau, ga hai ange, “De laangi danuaa.” Gai gilaau ga hulo ga poo luoono vae ga daumaha ange gi de ia.

¹⁰ Gai Iesu ga hai ange gi gilaau, “Gooluu aude maatagu; gooluu hulo hai ange gi ogu daina gilaadeu gi hulo gi Galilee; go kilaa alaadeu e gidee ai au.”

De hagailoo a denga daane hagaloosi

¹¹ De masavaa o luu haahine laa e hulo ai, gai hanu daane hagaloosi ne hulo gi de aduhale, ga tala ange mee alodahi gu hai gi de gau haimeedabu maolunga.

¹² Gai de gau haimeedabu ne hagabuni madali denga dagi ga hagasaele gu buni, gai gilaadeu ga hagao ange denga daane hebagi i hanu sseene lagolago

¹³ ga hai ange, “Goodou hai ange gi dangada, ‘Ana dangada agoago ne loomai i de boo ga gaiaa de angaanga i de masavaa omaadeu e sseni ai.’

¹⁴ Gai noo gu langona e de goobenaa muna nei, gai gimaadeu ga hai gi sili ono lodo, gi dee tuu ange ai goodou gi de hai ngadaa.”

¹⁵ Deelaa ai, denga daane hebagi ne kave sseene laa gai ga daudali i muna gu tala ange laa gi gilaadeu. Gai muna nei gu dele saele i daho de gau Ssuu ga dae mai ai gi anailaa nei.

De hagasauaa a Iesu tinoangahulu ma dogodahi

¹⁶ Gai denga dangada agoago e dinoangahulu ma dogodahi ne hulo gi Galilee, i de mounga a Iesu ne hai ange gilaadeu gi hulo aagena.

¹⁷ Gai de masavaa huu alaadeu ne gidee ai ia, gai gilaadeu ga daumaha ange gi de ia; gai hanu gilaadeu ne llodo lagolago.

¹⁸ Aagai Iesu ne humai ga basa ange gi gilaadeu, ga hai ange, “Ssauaa alodahi i de langi ma henua i lalo gu gaamai gi de au.

¹⁹ Deenei ai, goodou hulo haia gi hanu agu dangada agoago i denga huaahenua alodahi, ga babudaisi gilaadeu i de ingoo o Tamana ma Tama aama de Hagasaalunga Dabu,

²⁰ ma de agoago ange gilaadeu gi daudali i mee alodahi aagu gu tala adu gi goodou. Gai tilo, au e noho i oodou daha i masavaa alodahi ga dae ai gi de hagaodi.”