Matthew 27 - De Beebaa Dabu

Iesu i mada i mua o Pilate

¹ Taiao age, gai de gau haimeedabu maolunga alodahi ma denga dagi ne hagabuni ga hagasaele delaadeu hai e daa ai Iesu gi magau.

² Gai gilaadeu ne nnoa ia ga dagi ga kave gi daho de goobenaa go Pontius Pilate.

De hagagabaea o Judas

³ Gai de masavaa huu a Judas, taane ne gaavange laa ia, ne gidee ai, bolo Iesu gu hagamodu ono muna e daa gi magau, aagai ia gu sui dana hagasaele ga hagaahe mai denga dibaa selevaa e matolu aana ne kave laa, ga gaavange gi de gau haimeedabu maolunga ma denga dagi,

⁴ ga hai ange, “Au gu haisala i dagu gaavange tangada e deai ono haisala e daa gi magau.” Gilaadeu ne hai ange gi de ia, “Gai ni aha amaadeu e hai ai? Diiloo be dee hee dau hai e hai ai!”

⁵ Aagai Judas ne tili denga dibaa selevaa laa i lo te temple, gai ia ga hano ga hagagabaea.

⁶ Gai de gau haimeedabu maolunga ga kave denga dibaa selevaa laa ga hagataba, “E dee heohi de hhao mee nei gi lo te mommee doange o de temple, i hiidinga ni sseene ne daa ai dahi dangada ga magau.”

⁷ Gai gilaadeu ga hagasaele ange bolo ga hagao ai de alahenua o taane hai gumedi hadu e danu ai de gau henua gee.

⁸ Deelaa ai, de mommee laa gu hagaingoo ange go de Alahenua o denga Dodo, ga dae mai ai gi anailaa nei.

⁹ Mee nei ne hai e hagassula ai muna a de pelaabisi go Jeremiah, “Gilaadeu ne kave e matolu dibaa selevaa, go de hagaoanga ne hagamodu ange gi de ia i daho de gau Israel,

¹⁰ gai gilaadeu ga gaavange e hagao ai de alahenua o taane hai gumedi hadu, bei de hai a Tagi Maolunga gu tala mai ai gi de au.”

Iesu i mada i mua o Pilate

¹¹ De masavaa o Iesu e duu ai i mada i mua o de goobenaa, gai de goobenaa ne ssili ange gi de ia, “Go koe de Hodooligi o de gau Ssuu?” Iesu ne hai ange, “Deenaa aau e hagadaba ai naa.”

¹² Aagai de masavaa a de gau haimeedabu maolunga ma denga dagi ne hagabaubau ai ia, gai Iesu tee basa ange donu gi alaadeu muna.

¹³ Aagai Pilate ne ssili ange gi de ia, “Koe e dee langona naa alaadeu muna lagolago e hagabaubau ai naa goe?”

¹⁴ Aagai Iesu e dee basa ange donu gi de ia, deelaa ai, de goobenaa gu lele mmao ono mouli.

De hagamodu muna o Iesu e daa gi magau

¹⁵ Denga Daonga Hagasili alodahi gai de goobenaa e hagasao mai i lo te hale pono tangada olaadeu e llodo ai laa.

¹⁶ Gai e dahi daane baubau mmao e noho i lo te hale pono i de masavaa laa, dono ingoo go Barabbas.

¹⁷ Deelaa ai, de masavaa huu ne hagabuni ai dangada, aagai Pilate ga ssili ange gi gilaadeu, “Goai oodou e llodo au gi hagasao ina mai e gaavadu gi goodou? Go Barabbas, be go Iesu e hagaingoo ange laa hogi go Klisdo?”

¹⁸ Gai Pilate gu iloo bolo, dagi o de gau Ssuu ne gaavange Iesu, i hiidinga delaadeu llodo gaiaa.

¹⁹ Gai de masavaa o Pilate ne noho ai i honga dono nohoanga hagamodu muna, gai dono bodu ne aalu mai, ga hai ange, “Aude haia ange dahi mee daudahi gi taane heohi naa, go hiidinga au gu kona dogu duasala anailaa nei i ono hiidinga, i dagu midi.”

²⁰ Gai de gau haimeedabu maolunga ma denga dagi ne hagabasa dangada, gilaadeu gi dangidangi i de hagasao mai o Barabbas, gai gi daia Iesu gi magau.

²¹ De goobenaa ne ssili ange hogi gi dangada, “Goai i magavaa o luu daane nei oodou e llodo au gi hagasao ina mai e gaavadu gi goodou?” Gilaadeu ne hai ange gi de ia, “Go Barabbas!”

²² Pilate ne hai ange hogi gi gilaadeu, “Gai ni aha aagu e hai ange gi Iesu e hagaingoo ange laa go de Klisdo?” Dangada alodahi ne hai ange gi de ia, “Daudau ina ia i de laagau lui!”

²³ Gai Pilate ne ssili ange, “Gai se baubau aha aana gu hai?” Aagai dangada ne kii ange de hevaalogi, ga hai ange, “Daudau ina ia i de laagau lui!”

²⁴ Gai ga gidee huu e Pilate bolo gu deai donu ana mee e hai, aagai dangada gu hellumi, gai ia ga hhui luoono lima i madamada o de gau soa laa, ga hai ange, “Au e dee haisala donu i de magau o taane heohi nei; go goodou e diiloo e haia de hegau nei!”

²⁵ Gai dangada alodahi ne hai ange, “Ono dodo gi dau mai gi gimaadeu ma amaadeu dama.”

²⁶ Gai Pilate ga hagasao mai Barabbas ga gaavange gi gilaadeu, gai ia ga hai gi hagailiilia Iesu, ma de gaavange ia e daudau i de laagau lui.

De hagammae manava a denga daane hebagi Iesu

²⁷ Gai denga daane hebagi o de goobenaa ne kave Iesu gi lo te hale o de goobenaa ga hagabuni mai denga daane hebagi alodahi.

²⁸ Gai gilaadeu ga hagaui ono malo, ga hakahu ange ia i dahi malo mmea,

²⁹ ga bini dahi hau i hanu manu duiduia ga hagauda ange gi honga dono biho, ma de hai ia gi daohia dahi dogo i dono lima madau, gai gilaadeu ga duuduli i ono mada i mua ga hagammae manava ai ia, ga hai ange, “De laangi danuaa, e de hodooligi o de gau Ssuu.”

³⁰ Gai gilaadeu ga savasavale ange gi de ia, ga kave togo laa ga hagailiili ai dono biho.

³¹ Gai ga lava huu i delaadeu hagammae manava ia, gai gilaadeu ga hagaui de malo oona e gahu ai laa, gai ga hakahu ange ia i ono malo donu, ga dagi ia ga kave e daudau i de laagau lui.

De daudau o Iesu i de laagau lui

³² Gai de masavaa huu olaadeu e ssao ai e hulo gi tua de aduhale, gai gilaadeu gu hedae ange gi dahi daane Cyrene, dono ingoo go Simon. Gai gilaadeu ga hai ia gi sabaia de laagau lui o Iesu.

³³ Gai ga tae huu gilaadeu gi de mommee e hagaingoo ange laa go Golgotha, (e bei go de Mommee o de Ivi o de Biho,)

³⁴ gai gilaadeu ga gaavange hanu uvaini gu hilo ma mee mmala ia gi unumia. Gai ga mamia ange huu e ia mee laa, gai ia tee lodo e unu.

³⁵ Gai ga lava huu i delaadeu daudau ia, gai gilaadeu ga dada ga duha ai ono malo i olaadeu magavaa.

³⁶ Gai gilaadeu ga nnoho i kilaa ga dagitilo ai ia.

³⁷ Gai gilaadeu ne hagapigi age gi ulu dono biho de mee oona ne hagabaubau ina ai, gai ne sisi ga hai ange, “Deenei Iesu, de Hodooligi o de gau Ssuu.”

³⁸ Gai e dogolua hogi daane gaiaa ne daudau i olaau laagau lui madali ia, dahi i dono baasi madau, gai dahi i dono baasi masui.

³⁹ Gai dangada ne loomai laa kilaa ne hagammae manava ia ma de geugeu olaadeu biho,

⁴⁰ ga hai ange, “Koe ne hagadaba bolo koe e oha de temple, gai ga hagaduu age ange i e dolu donu huu laangi, hagaola ina goe! Iho mai i de laagau lui, noo go koe Tama Daane a de Maadua!”

⁴¹ Gai de gau haimeedabu maolunga ma de gau sisi aama denga dagi ne hagammae manava hogi ia, ga hagataba,

⁴² “Ia e hagaola dangada, aagai e dee maua i de hagaola donu huu ia! Go ia de Hodooligi o Israel! Ia gi iho mai i de laagau lui iainei, gai gidaadeu ga hagadonusia ai ia.

⁴³ Ia e gai ange gi de Maadua. De Maadua gi hagaola ina ia iainei, noo ia e lodo, i hiidinga ia gu hagadaba, ‘Go au Tama Daane a de Maadua.’ ”

⁴⁴ Gai luu daane gaiaa ne daudau laa madali ia ne hagammae manava hogi ia.

De magau o Iesu

⁴⁵ Gai gu hagagohu honga de henua alodahi i de daa tuele ga dae ai gi tolu i de ahiahi.

⁴⁶ Gai tolu aoaa huu gai Iesu ga oo ga hagadaba, “Eli, Eli, lama sabachthani?”, e bei, “Dogu Maadua, dogu Maadua, gu aha gu tili ai naa goe au?”

⁴⁷ Gai hanu dangada e tuu laa i kilaa ne langona e gilaadeu ana muna, gai gilaadeu ga hagataba, “Ia e hagaagahi Elijah.”

⁴⁸ Gai dahi gilaadeu ne savini ga gaamai dahi galagala iai uvaini mmala, ga hagalau ange gi dahi laagau ga gaavange ia gi unumia.

⁴⁹ Aagai hanu gilaadeu ne hai ange, “De kaba, gidaadeu ga damaa tali adu, e tilo be Elijah e humai laa e hagaola ia.”

⁵⁰ Gai de masavaa huu o Iesu ne ahe ange ai ga oo i de leo mmahi, gai ia gu hai ana manava hagaodi.

⁵¹ Gai tilo, de malo buibui i lo te temple gu masae iho i lunga ga sao i lalo. Gai gu ngalungalue de henua ma de mahangahanga denga hadu,

⁵² denga daanunga gu maahuge, gai angaanga o dangada dabu soa gu maakau laa gu mouli age.

⁵³ Gai gilaadeu gu ssao mai i lodo olaadeu daanunga, gai dua huu de mouli age o Iesu, gai gilaadeu gu hulo gi lo te aduhale dabu ga hakide ange ai gi dangada soa.

⁵⁴ De masavaa o tagi o de lau ma denga daane hebagi madali ia, e hagaloosia ange laa Iesu ne gidee ai de ngalungalue o de henua ma mee alodahi gu hai laa, gai gilaadeu gu maatagu mmao, ga hagataba, “Ni muna abodonu, taane nei go Tama Daane donu a de Maadua!”

⁵⁵ E soa hogi haahine e tuu i de mommee mmao ma e tilo mai ai mee gu hai laa, gilaadeu ne daudali ange i Iesu ga loomai ai i Galilee e bale ange ia.

⁵⁶ Hanu i olaadeu magavaa go Mary Magdalene, ma Mary tinana o James ma Joseph, aama tinana o luu dama daane a Zebedee.

De danu o Iesu

⁵⁷ Gai ga ahiahi huu de mee, gai dahi daane lava mai i Arimathea gu humai, dono ingoo go Joseph, ia go dahi dangada agoago a Iesu.

⁵⁸ Gai ia ne hano gi daho Pilate ga dangidangi ange i de angaanga o Iesu, gai Pilate ga dugu ange.

⁵⁹ Gai Joseph ne kave de angaanga o Iesu ga saabini i hanu linen danuaa,

⁶⁰ ga hagadagodo i lo te daanunga hoou aana gu hoda laa gi lo te baba, gai ia ga hagadige ange dahi hadu laumalie ga pono ai de haitoga, gai ia ga hano gee mai i kilaa.

⁶¹ Gai Mary Magdalene ma de Mary ange laa i kilaa hogi, gilaau e nnoho i dahi mommee i de baasi gee o taanunga.

Denga daane hagaloosi i taanunga

⁶² De laangi i ono dua, go de laangi i dua de laangi hagadabena, gai de gau haimeedabu maolunga ma denga Pharisee ne hagabuni mai gi daho Pilate,

⁶³ ga hai ange gi de ia, “Tangada aamua, gimaadeu gu manadua bolo taane ne daahangadia laa dangada, ne hagadaba i dono masavaa e mouli ai, ‘Dua naa huu e dolu laangi, gai au gu mouli age.’

⁶⁴ Deenei ai, haia hanu dangada gi hulo gi hagaloosia ange taanunga ga dae ai gi de hagadolu laangi, kana loomai ana dangada agoago ga gaiaa dono angaanga gai gilaadeu ga hai ange gi dangada, ‘Ia gu mouli age mai i de magau,’ gai gu kii ange de daahangadia o dangada i de hagaodi.”

⁶⁵ Gai Pilate ne hai ange gi gilaadeu, “E hanu oodou daane hebagi. Goodou hulo hagaloosia ange i doodou hai e mau ai.”

⁶⁶ Gai gilaadeu ne hulo ga gaavange dahi hagailonga gi honga de hadu laa gi dee maua ai i de hhuge taanunga laa, ma de dugu hanu daane hagaloosi i kilaa.