Matthew 19 - De Beebaa Dabu

De agoago i dagodo o de maavae

¹ Gai ga lava huu i de tala a Iesu muna nei, gai ia ga hano gee i Galilee ga hano gi denga mommee o Judea i de baasi gee o Jordan.

² Gai dangada soa ne daudali ange i de ia, gai ia ga hagaieiangi gilaadeu i kilaa.

³ Hanu Pharisee ne loomai e hagatale ia. Gilaadeu ne ssili ange, “E heohi de maavae ange o taane gi dono bodu, e dee hilihili be se aha aana gu hai?”

⁴ Iesu ne hai ange gi gilaadeu, “Goodou tigi daulia ange naa donu bolo de Maadua ne hai taane ma de hine i taamada age,

⁵ ga hagadaba, ‘Deenei ai, taane e dugu dono damana ma dono dinana gai ga hagapigi ange gi dono bodu; gai gilaau gu hai ga se angaanga e dahi’?

⁶ Gai gilaau gu dee ni dangada dagidahi, aagai gu dahi donu huu. Deenei ai, de mee a de Maadua gu hai gi dahi, gai dangada gi dee vaaea.”

⁷ Gilaadeu ne ssili ange hogi gi de ia, “Gai gu aha Moses gu hagadaba ai laa bolo gi gaavange de beebaa maavae ga hai ai ia gi hano?”

⁸ Iesu ne hai ange gi gilaadeu, “Moses ne dugu adu goodou gi maavae ma oodou bodu i hiidinga de makaga oodou lodo. Gai e dee deenaa donu tagodo mai i taamada age.

⁹ Au e hai adu gi goodou: be goai e maavae ange gi dono bodu, deelaa donu huu go dono dagodo haisala, ga hai bodu ange gi dahi hahine gee, gu dagodo haisala donu. [Aagai taane e hai bodu ange gi de hine gu maavae laa, gu dagodo haisala donu hogi.]”

¹⁰ Gai ana dangada agoago ne hai ange gi de ia, “Noo deenaa tagodo o taane ma dono bodu, gai e danuaa ange donu tee hai bodu o tangada.”

¹¹ Iesu ne hai ange gi gilaadeu, “E dee go dangada alodahi e maua i de daohi muna nei, aagai go gilaadeu donu huu ne gaavange aagena.

¹² Go hiidinga e hanu donu dangada ne haanau mai ni eunuch, gai hanu go dangada ne haia gilaadeu ga ni eunuch — aagai hanu ne hilihili de mouli bei denga eunuch, i hiidinga o de nohoanga hodooligi o de langi. Tangada e maua i de kave muna nei, gai ia gi gaavee gi daohia.”

De hagamanuuia a Iesu denga gauligi

¹³ Gai dangada ne gaamai denga gauligi vaaligiligi gi Iesu gi dugua ange dono lima gi olaadeu elunga, ma de dalodalo i gilaadeu. Gai ana dangada agoago ga hagasee gilaadeu.

¹⁴ Aagai Iesu ga hai ange gi ana dangada agoago, “Dugua denga gauligi vaaligiligi gi loomai gi ogu daha, goodou aude buibuia gilaadeu, go hiidinga niiolaadeu donu de nohoanga hodooligi o de langi.”

¹⁵ Gai ia ga dugu ange dono lima gi olaadeu elunga ⌊ga hagamanuuia gilaadeu,⌋ muli mai gai ia ne hano gee mai i kilaa.

Taane lava

¹⁶ Gai tilo, dahi daane lava ne humai ga ssili ange gi Iesu, “Tangada Agoago, aahee agu hegau danuaa e hai gi maua ai e au de mouli e dee ngado mai?”

¹⁷ Iesu ne hai ange gi de ia, “Gu aha gu ssili mai ai naa goe gi de au be se aha e danuaa? E dahi donu huu e danuaa. Noo koe e lodo e kave de mouli, gai koe daudali i denga hainga.”

¹⁸ Taane laa ne ssili ange gi de ia, “Go hainga hee?” Iesu ne hai ange, “Aude daia tangada gi magau, aude dagodo haisala, aude gaiaa, aude hagabaubau ina dahi i de muna hadu;

¹⁹ hagadubu ina doo damana ma doo dinana, gai koe gi aloha i tangada e baa adu gi de goe bei doo aloha donu i de goe.”

²⁰ Tama daane laa ne hai ange gi de ia, “Mee naa alodahi gu odi i dogu daudali ai. Gai ni aha ange tigi dohu i ogu daha?”

²¹ Iesu ne hai ange gi de ia, “Noo koe e lodo gi heohi abodonu goe, gai koe hannoo hagao ina gi daha oo goloa alodahi, ga gaavange gi de gau hagaau aloha, gi hanu ai au mee i de langi. Gai koe ga humai ga daudali mai i de au.”

²² Gai ga langona huu e ia muna laa, gai ia ga hano gee i kilaa gu dee baba ono lodo, go hiidinga ia se daane lava mmao.

²³ Iesu ne hai ange gi ana dangada agoago, “Ni muna abodonu aagu e hai adu nei gi goodou, e hai ngadaa donu de ulu o tangada lava i de nohoanga hodooligi o de langi.

²⁴ Au e hai adu ange gi goodou: e hai ngaohie ange de ulu o de gamelo i de haonga o de niila, i de ulu o tangada lava i de nohoanga hodooligi o de langi.”

²⁵ De masavaa huu a ana dangada agoago ne langona ai muna nei, aagai gilaadeu gu llele mouli, ga hagataba, “Goai ai naa e maua gi hagamouli?”

²⁶ Aagai Iesu ga galo ange gi gilaadeu, ga hai ange, “Mee nei e dee maua i de hai i daho dangada, aagai mee alodahi e maua i daho de Maadua.”

²⁷ Peter ne hai ange gi de ia, “Gimaadeu ne dugu mee alodahi gai ga daudali adu i de goe. Aagai ni aha ai naa amaadeu e mau?”

²⁸ Iesu ne hai ange gi gilaadeu, “Ni muna abodonu aagu e hai adu nei gi goodou, de masavaa naa huu o Tama a Tangada e noho ai i honga dono nohoanga mahamaha i henua i lalo hoou, gai goodou ne daudali mai laa i de au, e nnoho naa hogi i honga e madaangahulu ma lua nohoanga, ga hagamodu ai muna o denga aamuli e madaangahulu ma lua o de gau Israel.

²⁹ Aagai tangada e dugua ono hale, be go ono daina, be go dono damana ma dono dinana, be go ana dama, aabe go ono alahenua i ogu hiidinga, e kave naa hogi mee e lau hanonga e kii ange ai, aama de mouli e dee ngado mai.

³⁰ Gai e soa naa dangada i mua e hai go gilaadeu e hagaodia, gai dangada e hagaodia e hai naa go gilaadeu i mua.”