Mark 6 - De Beebaa Dabu

De gau Nazareth tee hagadubu Iesu

¹ Iesu ne hano gee i de mommee laa ga ahe gi dono aduhale donu, gai ana dangada agoago ne hulo hogi madali ia.

² Gai de laangi huu o Sabbath, gai ia ne hano ga agoago i lo te synagogue; gai dangada soa ne langona laa ana agoago gu llele mouli, ga hagataba, “Go hee a taane nei ne kave ai nei mee nei? Gai se heiangi bee hee gu gaavange nei gi de ia? Gai dee hee dana hai ne maua ai nei i de hai denga sauaa hagalele mouli nei?

³ E dee deenei de labagau, go tama daane a Mary, taina daane o James, ma Joses, ma Judas, aama Simon? Gai ono daina haahine e dee nnoho nei hogi madali gidaadeu?” Gai gilaadeu tee hagadonusia ia.

⁴ Gai Iesu ga hai ange gi gilaadeu, “De pelaabisi e dee hagadubulia i dono henua donu, ma daho ono dangada, aama dangada i dono hale.”

⁵ Gai ia tee maua i de hai dahi sauaa i kilaa, ia ne dugu ange donu huu dono lima gi honga hanu magi ga hagaieiangi gilaadeu.

⁶ Gai ia gu lele ono mouli i hiidinga o delaadeu dee hagadonusia. Gai Iesu ne hano ga hagadaga i denga aduhale ga agoago ai.

De hai gi hulo o tinoangahulu ma dogolua

⁷ Aagai ia ne hagahi tinoangahulu ma dogolua ga hai gilaadeu gi hulo dagi dogolua, ma de gaavange gi gilaadeu ssauaa e hai ai gi hulo gee denga hagasaalunga baubau.

⁸ Gai ia ne tala hagasoe ange, ga hai ange, “Goodou e dee kave dahi mee daudahi madali goodou, go oodou dogo donu huu — e deai hogi oodou pelaoaa, be ni beagi, aabe ni sseene e kave i lodo oodou beele.

⁹ Goodou ulumagi ina oodou mee vae, aagai e dee kave e lua malo gahugahu.”

¹⁰ Iesu ne hai ange hogi gi gilaadeu, “Dee hee naa huu de hale oodou e hulo ga nnoho ai, gai goodou nnoho donu huu i kilaa ga dae ai, gi doodou hulo gee mai i de aduhale laa.

¹¹ Gai de mommee naa huu e dee abodonu adu gi goodou aabe hagallongo oodou agoago, gai de masavaa naa huu oodou e hulo gee ai i kilaa, gai goodou ga luuluu gi too gelegele i oodou vae e hai baasi ange ai gilaadeu!”

¹² Deelaa ai, ana dangada agoago ne hulo ga agoago gi daahuli ai lodo o dangada.

¹³ Gai gilaadeu ne hai gi hulo gee denga hagasaalunga baubau soa, ma de hagasulu denga magi soa i de lolo ga hagaieiangi gilaadeu.

De magau o John taane Babudaisi

¹⁴ Gai de hodooligi go Herod gu langona e ia dagodo o de mee laa, (go hiidinga gu soa dangada ne langona dagodo o Iesu). Hanu dangada ne hagataba, “John taane Babudaisi gu mouli age! Aanei hiidinga aana gu hai ai nei denga sauaa hagalele mouli nei.”

¹⁵ Aagai hanu ne hagataba, “Ia go Elijah.” Gai hanu ne hagataba, “Ia se pelaabisi, bei denga pelaabisi madagidagi.”

¹⁶ Aagai ga langona huu e Herod mee laa, gai ia ga hagadaba, “John, taane aagu ne tuu laa de ua, gu mouli age ange!”

¹⁷ Go hiidinga Herod ne hai hanu gi hulo gi boogia a John gi noodia, gi hhao gi lo te hale pono i hiidinga o Herodias, de bodu o dono daina go Philip; ia ne hai bodu ange gi de hine laa.

¹⁸ Gai a John ne hai ange gi Herod, “E dee heohi doo hai bodu ange gi de bodu o doo daina daane!”

¹⁹ Gai Herodias ne golo age mee laa i hiidinga dono lili i a John, ia ne lodo e daa a John gi magau. Aagai ia tee maua,

²⁰ go hiidinga hogi Herod ne madagu i a John ma de lodo e buibui ia. Ia gu iloo bolo a John se daane heohi ma de dabu. Gai de masavaa a Herod ne langona ai agoago a John, gai ia e tee donu ange aagena, aagai ia ne malangilangi donu i de hagallongo ana agoago.

²¹ Gai ga heohi huu de masavaa; go de laangi de boo o Herod, gai ia ga hai dahi daonga ga gauna ange de gau aamua o dono nohoanga hodooligi, ma dagi o de hebagi aama de gau maolunga o Galilee.

²² Gai tamaa hine a Herodias ne ulu mai ga anu, gai ia ga hagamalangilangi Herod ma dangada aana ne gauna ange gi taonga. Gai de hodooligi ga hai ange gi tamaa hine laa, “Daalaa mai be se aha oou e lodo ai, gai au ga gaavadu naa donu gi de goe.”

²³ Gai Herod ne basa hagatoo donu ange gi de ia, ga hai ange, “Be se aha naa huu oou e dangidangi mai ai, gai au e gaavadu donu gi de goe, ga dae ai loo gi dahi luu baasi o dogu nohoanga hodooligi!”

²⁴ Gai tamaa hine laa ga hano ga ssili ange gi dono dinana, “Se aha aagu e dangidangi ai?” Gai dono dinana ga hai ange, “Dangidangi ange i de biho o John taane Babudaisi.”

²⁵ Gai tamaa hine laa ga hagamoolau ga ulu gi daho de hodooligi ga dangidangi ange, ga hai ange, “Au e lodo koe gi gaamai de biho o John taane Babudaisi i honga de gumedi baabaa nei.”

²⁶ Gai de hodooligi gu dee baba mmao ono lodo, aagai go hiidinga ia gu hagatoo donu i madamada o dangada e gaimee laa i taonga, deelaa ai, ia gu dee lodo e hagaahe dana muna ange gi tamaa hine laa.

²⁷ De masavaa laa donu huu gai de hodooligi ga hai gi hano dahi daane hebagi, gi duudia de ua o John gi gaamai. Gai taane laa ga hano ga tuu de ua o John i lo te hale pono,

²⁸ ga gaamai dono biho i honga dahi gumedi baabaa, ga gaavange gi tamaa hine laa. Gai tamaa hine laa ga kave ga gaavange gi dono dinana.

²⁹ Gai de masavaa huu a dangada agoago a John ne langona ai mee laa, gai gilaadeu ga hulo ga kave de angaanga o John ga danu.

De haangai o de limamano

³⁰ Gai de gau tala ne ahe mai ga tala ange gi Iesu mee alodahi alaadeu ne hai aama mee olaadeu ne agoago ai.

³¹ Gai Iesu ga hai ange gi gilaadeu, “Gidaadeu ga hulo gi dahi mommee e deai dangada iai e hagammabu ai.” Go hiidinga gu soa dangada ne loomai gi olaadeu daha, gilaadeu gu dee maua donu hogi i de gaimee.

³² Gai gilaadeu ne kage i de boose e hulo gi dahi mommee e deai dangada iai.

³³ Gai dangada soa ne gidee laa delaadeu hulo ma de madea gilaadeu, ga saavini laa uda mai i denga aduhale alodahi ga hulo gu tae gi kilaa i mua.

³⁴ De masavaa o Iesu ne dae ai ga gidee dangada soa i kilaa, gai ia gu lodo aloha i gilaadeu, go hiidinga gilaadeu e bei dagodo o denga ssiibi e deai laa selaadeu dangada hagaloosi. Gai ia ga daamada de agoago ange gilaadeu i mee lagolago.

³⁵ Gai de masavaa huu ne dai boo ai, gai dangada agoago a Iesu ga loomai, ga hai ange gi de ia, “De mommee nei se vao, gai gu dai boo hogi de mee.

³⁶ Haia dangada gi hulo gi denga mommee ma aduhale vaaligiligi e paa mai, gai gilaadeu ga hagao ai alaadeu mee e gai.”

³⁷ Aagai Iesu ga hai ange gi gilaadeu, “Goodou haangai ina ange gilaadeu.” Gilaadeu ne hai ange gi de ia, “Ga hulo gimaadeu e hagao mai hanu gai, i de lualau denarius nei e haangai ai gilaadeu?”

³⁸ Gai ia ga ssili ange gi gilaadeu, “E hia pelaoaa i oodou daha? Goodou hulo diiloo.” Gai ga iloo huu e gilaadeu, gai gilaadeu ga hai ange, “E lima pelaoaa ma e lua mamu.”

³⁹ Aagai Iesu ga hai ange gilaadeu gi haia dangada gi nnoho i honga helii, i denga hagabuulinga.

⁴⁰ Deelaa ai, dangada alodahi ne hai hagabuulinga ga nnoho ai; hanu hagabuulinga e dagillau gai hanu e dagimadalima.

⁴¹ Gai Iesu ga poo mai denga pelaoaa e lima ma mamu e lua laa, gai ia ga galo age gi de langi ga dalodalo ga dohidohi duudangaa pelaoaa laa. Gai ia ga gaavange gi ana dangada agoago gi duuhaa ange gi dangada. Ia ne dohidohi hogi luu mamu laa ga gaavange gi gilaadeu.

⁴² Gai dangada alodahi ga gaimee gu boobosu,

⁴³ gai denga dangada agoago ga hagabudu mee ne doe ga hhao ai e madaangahulu ma lua gede.

⁴⁴ Gai taelodo o dangada ne gaimee i pelaoaa laa se limamano daane.

De seesee o Iesu i honga de vai

⁴⁵ Gai Iesu ga hagamoolau ga hai ana dangada agoago, gi kage i de boose gi hulo i ono mada i mua, gi de mommee go Bethsaida i de baasi gee de vai, gai ia ne noho ga hai gi hulo dangada.

⁴⁶ Gai ga lava huu i dana hai gi hulo dangada, gai ia ga hanage gi de mounga ga dalodalo ai.

⁴⁷ Gai ga ahiahi huu, gai de boose gu dae gi lo te ungaalodo o de vai, gai go Iesu donu huu i honga de henua.

⁴⁸ Gai ia gu gidee bolo gilaadeu gu kona iho i de gabegabe, i hiidinga de madangi gu humai i madaa moni. Gai daha tolu aoaa huu i de masavaa dagitilo i boo taiao, gai Iesu ga seesee laa honga de vai ga hano ai gi olaadeu daha. Ia ne hai e hano gi ui i ana dangada agoago,

⁴⁹ aagai ga gidee huu gilaadeu ia e seesee i honga de vai, gai gilaadeu ne maanadu bolo ia se eidu, gai gilaadeu ga hevaalogi,

⁵⁰ go hiidinga gilaadeu alodahi gu maatagu i delaadeu gidee ia. Aagai ia ga hagamoolau ga basa ange gi gilaadeu, ga hai ange, “Goodou gi llodo mmahi; go au donu deenei. Goodou aude maatagu!”

⁵¹ Gai ia ga gage age gi olaadeu daha i lo te boose, gai de madangi gu sili. Gai ana dangada agoago gu llele mouli,

⁵² go hiidinga gilaadeu tee tonu ange gi dagodo o ssauaa ne hai ai laa denga pelaoaa; olaadeu lodo e makaga.

Iesu e hagaieiangi magi i Gennesaret

⁵³ Gai de masavaa olaadeu ne tae ai gi de baasi gee o de vai, gai gilaadeu ne tau age i Gennesaret, ga daula delaadeu boose i kilaa.

⁵⁴ Gai de masavaa olaadeu ne loage ai gi uda, gai dangada gu madea Iesu.

⁵⁵ Gai gilaadeu ga saavini ga hagadaga i de mommee laa alodahi, ga saabai mai denga magi i honga olaadeu moenga, gi de mommee alaadeu gu langona laa bolo Iesu e noho ai.

⁵⁶ Gai mommee alodahi o Iesu ne hano aagena, go aduhale vaaligiligi ma aduhale nnui, aama mommee i tua de aduhale, gai dangada ne hagadaakodo denga magi i denga mommee hagao mee. Gai gilaadeu ga dangidangi ange ia gi dugua ange denga magi, gi boogia ange de bido o dono malo, gai dangada alodahi ne boogia ange dono malo gu ieiangi.