Mark 3 - De Beebaa Dabu

De hagaieiangi a Iesu taane magau de lima

¹ Iesu ne hano hogi gi dahi synagogue, gai dahi daane magau de lima e noho i kilaa.

² Gai dangada i kilaa ne tilo be ia e hagaieiangi taane laa i de laangi o Sabbath, gai gilaadeu ga hagabaubau ai ia.

³ Gai Iesu ga hai ange gi taane magau de lima, “Humai duu i magavaa o dangada.”

⁴ Gai Iesu ga ssili ange gi dangada, “Dee hee de mee e alaange de hai i de laangi o Sabbath, go de hai tanuaa aabe go de baubau, go de hagamouli aabe go de daa gi magau?” Aagai gilaadeu gu dee mmuu.

⁵ Gai Iesu ga galogalo saele ga tilo gilaadeu ma de lili, ia gu daemaha i hiidinga de makaga olaadeu lodo, gai ia ga hai ange gi taane laa, “Haalo ina doo lima!” Gai taane laa ga haalo dono lima, gai dono lima gu ieiangi.

⁶ Gai denga Pharisee ga sasao ga hulo ga hagabuni madali dangada i de hagabuulinga o Herod, e ssala ai delaadeu hai e daa ai Iesu gi magau.

Dangada soa i gaogao de vai

⁷ Aagai Iesu ma ana dangada agoago ne hulo gee mai i kilaa ga hulo gi gaogao de vai, gai ne soa hogi dangada ne daudali ange i gilaadeu mai i Galilee ma Judea,

⁸ ma mai i Jerusalem, ma Idumea, ma mai i denga mommee i baasi dua o Jordan, aama mai i Tyre ma Sidon. Gilaadeu ne langona dagodo o hegau alodahi a Iesu gu hai, gai gilaadeu ga loomai gi ono daha.

⁹ Gai Iesu ne hai ange gi ana dangada agoago gi hagadabena ina dahi boose e gage ange ia aagena, gi dee hagakabi ina ai e dangada ia, i hiidinga gu soa mmao dangada.

¹⁰ Go hiidinga gu soa ana dangada ne hagaieiangi, deelaa ai, denga mmagi alodahi gu hagammahi e loomai e poo ange gi de ia.

¹¹ Gai de masavaa naa huu a denga hagasaalunga baubau e gidee ai Iesu, gai gilaadeu ga hagabaakuu gi lalo i ono mada i mua ga hevaalogi, ga hagataba, “Koe go Tama Daane a de Maadua.”

¹² Aagai Ia ne tala hagasoe ange gilaadeu gi dee daalaa be ia goai.

De hili o de gau tala

¹³ Gai ia ne hanage gi honga dahi mounga, gai ia ga hagahi gi loomai gi ono daha gilaadeu oona e lodo ai; gai gilaadeu ga loomai gi ono daha.

¹⁴ Gai ia ne hili e dinoangahulu ma dogolua ga hagabinga gilaadeu bolo go de gau tala, gai gilaadeu ga nnoho ai madali ia, gai ia ga hai ai gilaadeu gi hulo gi agoago,

¹⁵ ma de gaavange gi gilaadeu ssauaa e hai ai gi hulo denga hagasaalunga baubau.

¹⁶ Gai ia ne hili tinoangahulu ma dogolua i kilaa: go Simon (aana ne hagaingoo ange laa hogi go Peter),

¹⁷ ma James tama daane a Zebedee ma dono daina go John (aanei gilaau e hagaingoo ange laa go Boanerges, e bei “Dama a de hatuli”),

¹⁸ ma Andrew, ma Philip, ma Bartholomew, ma Matthew, ma Thomas, ma James tama daane a Alphaeus, ma Thaddaeus, ma Simon de Zealot,

¹⁹ aama Judas Iscariot, taane ne gaavange laa ia.

Iesu ma Beelzebul

²⁰ Gai ia ga hano ga ulu i dahi hale; gai dangada soa ga hagabuni mai ange hogi. Deelaa ai, gilaadeu ma ana dangada agoago gu dee maua i de gaimee.

²¹ Gai ga langona huu e dono huaabodu mee laa, gai gilaadeu ga loomai e kave Iesu, go hiidinga gilaadeu e hagataba, “Ia gu senga ange.”

²² Gai de gau sisi ne loomai laa i Jerusalem ne hagataba, “Beelzebul e noho i ono daha! Gai ia e hai gi hulo gee denga hagasaalunga baubau i ssauaa o tagi o denga hagasaalunga baubau.”

²³ Gai Iesu ne hagahi dangada ga agoago ange gilaadeu i mee hagasengasenga, ga hai ange, “Dee hee de hai a Satan e maua ai i de hai gi hano gee Satan?

²⁴ Noo dahi nohoanga hodooligi e hagadau hai baasi, gai de nohoanga hodooligi laa e dee maua i de duu gi makaga.

²⁵ Noo dahi huaabodu e hagadau hai baasi, gai e dee maua donu i de duu gi makaga.

²⁶ Gai noo Satan e hai baasi ange donu huu gi de ia, gai ia gu vvae lua, aagai ia dee maua donu i de duu gi makaga, aagai gu dai lilo donu.

²⁷ Aagai e deai hogi e maua i de ulu i de hale o taane mmahi e kave ai ono goloa, aagai ia e nnoa taane mmahi laa i mua. Gai ia ga maua i de gaiaa mee i dono hale.

²⁸ Ni muna abodonu aagu e hai adu nei gi goodou: haisala alodahi o dangada e haisala ai, ma muna baubau alodahi a dangada e tala, e degi ange donu gi olaadeu haisala,

²⁹ aagai tangada e daalaa hanu muna e hai baasi ange ai gi de Hagasaalunga Dabu, e dee degi ange donu gi ono haisala, gai ia gu haisala donu i de haisala e deai laa se ngado mai.”

³⁰ (Iesu ne tala muna nei i hiidinga gilaadeu gu hagataba bolo de hagasaalunga baubau e noho i ono daha.)

Tinana ma daina o Iesu

³¹ Gai tinana o Iesu ma ono daina alodahi ne loomai ga tuu i duaahaho, gai gilaadeu ne hai dahi dangada gi hano gi hagahia Iesu.

³² Gai dangada soa e nnoho laa madali ia, ga hai ange gi de ia, “Tilo, doo dinana ma oo daina e tuu i duaahaho, gilaadeu e ssala goe.”

³³ Ia ne ssili ange gi gilaadeu, “Goai dogu dinana, gai goai ogu daina?”

³⁴ Gai ia ga galo ange gi gilaadeu e nnoho i luoono baasi, gai ia ga hai ange, “Deenei dogu dinana aama ogu daina!

³⁵ Be goai e haia lodo o de Maadua, gai go ia donu dogu daina daane ma dogu daina hahine, aama dogu dinana.”