Joel 3 - De Beebaa Dabu

De hagamodu muna o huaahenua

¹ “Tilo, laangi laa ma de masavaa laa, gai au e hagaahe ange naa de manuuia o Judah ma Jerusalem.

² Au e hagabuni mai naa denga huaahenua alodahi gi de Geelonga o Jehoshaphat. Gai au ga hagamodu ai olaadeu muna i kilaa, i hiidinga o dogu boolonga, go dangada o Israel, go hiidinga gilaadeu ne hai ga mavaevae saele ogu dangada gi denga huaahenua, ma de vaevae dogu henua.

³ Gilaadeu ne hai tada i ogu dangada, ma de hagao dahi gauligi daane i dahi haahine hai be se manu; gilaadeu ne hagao alaadeu uvaini i dahi gauligi haahine.

⁴ Tyre ma Sidon, aama Philistia alodahi, ni aha oodou gu hai mai nei gi de au? Goodou gu llodo nei e sui mai agu mee gu hai adu gi goodou? Noo goodou e llodo e sui mai gi de au, gai e moolau naa donu dagu sui adu oodou hegau gu hai.

⁵ Go hiidinga goodou ne kave agu selevaa ma agu goolo, ma de mmoli ogu goloa hagamogomogo gi lodo oodou temple.

⁶ Goodou ne hagao ange dangada o Judah ma Jerusalem gi de gau Greek, gai koe ga hai ai gilaadeu gi hulo gi dahi mommee mmao gee mai i delaadeu henua.

⁷ Tilo, au e hagaahe mai naa gilaadeu i de mommee oodou ne hagao ange gilaadeu aagena, gai au e sui adu naa oodou hegau gu hai.

⁸ Au e hagao ange naa oodou dama daane ma damaa hine gi dangada o Judah, gai gilaadeu e hagao ange naa gilaadeu gi de gau Seba, go dahi huaahenua mmao.” Go Tagi Maolunga e hagadaba.

⁹ Hagailoo ina muna nei i denga huaahenua: hagadaabena ange gi de hebagi; hagabuni ina mai denga daane mmahi! Gai denga daane hebagi alodahi gi loomai e hebagi.

¹⁰ Dugidugia oodou mee hagabalabala e hai ai gadilaasa, gai haia oodou naivi velevele e hai ai denga dao. Taane baageaa gi hagadaba, “Au se daane mmahi!”

¹¹ Denga huaahenua alodahi i luu baasi, goodou hagamoolau mai hagabuni i kilaa. Tagi Maolunga, haia gi loomai oo daane hebagi!

¹² Haia gi loomai denga huaahenua; haia gilaadeu gi hulo gi de Geelonga o Jehoshaphat. Go hiidinga au e noho naa i dogu nohoanga i kilaa ga hagamodu ai muna o denga huaahenua i luu baasi delaadeu henua.

¹³ Hagaabo ina de kamaa, go hiidinga denga huamanu gu lleu. Hannoo, dagadagahia denga grape, i hiidinga gu honu de mommee e kumi ai uvaini, gai mommee hhao uvaini gu honu malingilingi — olaadeu baubau gu lagolago mmao!

¹⁴ Dangada soa mmao, dangada soa mmao, i lo te geelonga e hagamodu ai muna! Go hiidinga de laangi o Tagi Maolunga gu baa mai donu gi de geelonga e hagamodu ai muna.

¹⁵ De laa ma de maasina e hagagohu naa, gai denga heduu e llilo naa.

¹⁶ Tagi Maolunga e haganngolo mai i Zion, gai e hai gi paa mai de hatuli i Jerusalem; de langi ma henua i lalo e ngalungaalue naa. Aagai Tagi Maolunga go de buibui o ono dangada, gai ia se mommee buibui makaga niio de gau Israel.

Manuuia ange gi dangada o de Maadua

¹⁷ “Gai goodou e iloo naa, bolo go au donu go Iahweh doodou Maadua, e noho laa i Zion, dogu mounga dabu. Jerusalem e hai naa gi dabu; gai de gau henua gee e dee aahe ange donu e kage mai gi honga de henua.

¹⁸ De laangi laa gai e hai naa tau uvaini i honga denga mounga, gai e lagolago naa vai uu i honga denga duuduu; denga saalingaa vai alodahi o Judah nogo deai vai iai e ssali ai naa vai. Gai dahi vai e sali mai naa i de hale o Tagi Maolunga, ga hagamaluulu de geelonga o Shittim.

¹⁹ Egypt e hai naa ga deai dangada iai, gai Edom e bei naa de vao e deai laa dangada iai, go hiidinga delaadeu vaivai hai dangada o Judah, ma delaadeu daa dangada tigi haisala ga maakau.

²⁰ Judah e nnoho ai naa dangada ga hano ai, gai Jerusalem e noholia naa i atangada alodahi.

²¹ Au e sui ange naa dodo olaadeu gu maakau, aagu tigi sui ange laa. Gai Tagi Maolunga e noho naa i Zion.”