Jeremiah 17 - De Beebaa Dabu

De haisala ma de hagaduasala o Judah

¹ “Haisala o Judah gu hagadaakodo i dahi biini baalanga, ma de sisi i dahi mada kangi bei de diamond, gai gu maaga ange gi olaadeu lodo, aama honga hanga i dege o olaadeu mommee o ssigidaumaha.

² Gai alaadeu dama goi manadua donu huu olaadeu mommee o ssigidaumaha ma denga duludulu laagau o Asherah i lalo denga manu ssomo ma honga denga duuduu maolunga.

³ Dogu mounga i honga de henua, ma oodou lava ma oodou goloa hagamogomogo alodahi, au e hai naa oodou hagadaumee gi gaavee gee, madali oodou mommee daumaha, i hiidinga o denga baubau i honga doodou henua alodahi.

⁴ Gai go goodou donu huu ne hidi mai ai de gaavee gee de boolonga aagu gu gaavadu gi goodou. Au e hai naa goodou gi hai hegau ange gi oodou hagadaumee i dahi henua oodou e dee iloo laa, i hiidinga goodou gu hai au ma gu lili, gai dogu lili e bei naa de ahi mmahi e ula laa ga hano ai.”

⁵ E hagadaba Tagi Maolunga, “E malaia naa tangada e hagadonusia tangada, gai dana tali go mahi o tangada, gai ono lodo e dahuli gee mai i Tagi Maolunga.

⁶ Ia e bei de manu somo baa i lalo i de vao e deai laa vai iai, e deai naa donu se mee danuaa aana e gide. Ia e somo i de mommee e deai vai iai, gai se henua iai soolo, e deai dangada e nnoho ai.

⁷ Gai e manuuia tangada e hagadonusia Tagi Maolunga, gai go Tagi Maolunga dana tali hagalodolodo.

⁸ Ia e bei naa de manu somo e doo laa i gaogao de vai, ono aga e ssomo ma e hulo gi lo te saalingaa vai. Gai e dee madagu donu i de masavaa hagavvela; ono lau e lau kohu i masavaa alodahi, gai e dee manavasaa i de ngadau o tau laohie, gai e hua i masavaa alodahi.

⁹ Lodo o tangada e kii ange de laumalie de hagasenga iai i mee alodahi, gai e kona de hakino gee. Goai e maua gi donu ange aagena?

¹⁰ Gai au, Tagi Maolunga, e tilo dagodo o de lodo ma de hagatale maanadu a tangada, au e hagao ange naa gi bei dagodo hegau a dahi.”

¹¹ Tangada e hagaduulia dono lava i hegau dee heohi, e bei dagodo o de manu lele go de partridge e baalasi laa ga masae denga ngago aana tee haanau. Gai de masavaa oona goi mmahi ai, gai gilaadeu ga tili ia, gai dono hagaodi e bei dagodo o tangada lodo senga.

¹² De nohoanga mahamaha, se mommee hagaamua mai i taamada age, go taadeu mommee daumaha dabu.

¹³ Tagi Maolunga, go de tali a Israel, dangada alodahi e dilia goe e dookaa naa. Gilaadeu e daahuli gee i de goe e bei mee e sisi i honga de gelegele ⌊e moolau laa de llilo⌋, i hiidinga gilaadeu gu tili Tagi Maolunga, go ssaalingaa vai iai de mouli.

¹⁴ Tagi Maolunga, hagaieiangi ina au, gi ieiangi ai au; hagaola ina au, gi ola ai au, i hiidinga go koe aagu e tuhi.

¹⁵ Gilaadeu e dee modu de ssili mai gi de au, “I hee iai muna a Tagi Maolunga? Hagassula ina ana muna!”

¹⁶ Au tee savini donu ga hano gee i hegau a tangada hagaloosi; koe e iloo bolo au tee lodo hogi gi humai de laangi hai ngadaa. Koe e iloo agu muna gu tala gai e daakodo donu i mada luoo mada.

¹⁷ Aude hagamadagu ina ngau; go koe donu dogu muuninga i de masavaa hai ngadaa.

¹⁸ Haia gi dookaa dangada e vaivai haia nei au, aagai haia gi deai sogu hagadogaa ina; haia gi manavasaa olaadeu lodo, aagai haia gi dee manavasaa ogu lodo. Haia gi dae mai de hai ngadaa gi gilaadeu, gai haia gi lua hano e kona ai dau hagaduasala gilaadeu!

De hai gi dabu de laangi o Sabbath

¹⁹ Gai Tagi Maolunga ne hai mai gi de au, “Hannoo duu i de haitoga o de huaadangada, go de haitoga o denga hodooligi o Judah e ulu ai aama de ssao; gai koe duu hogi i denga haitoga o Jerusalem ange laa,

²⁰ gai koe ga hai ange gi gilaadeu, ‘Goodou hagalaangona muna a Tagi Maolunga, denga hodooligi o Judah ma dangada o Judah aama dangada alodahi e nnoho i Jerusalem, gai e ulu i denga haitoga nei.

²¹ E hagadaba Tagi Maolunga: Goodou diiloo gi dee sabaia mai e goodou hanu mee i de laangi o Sabbath gi gaamai laa lodo haitoga o Jerusalem.

²² Goodou e dee hagauda mai hogi hanu mee i lodo oodou hale, aabe gi haia hanu hegau i de laangi o Sabbath. Aagai hagadabu ina de laangi o Sabbath, bei dagu hai gu tala ange ai gi oodou dubuna madagidagi.

²³ Gai gilaadeu tee hagallongo mai aabe ne aanga mai gi agu muna; gilaadeu ne hagamakaga olaadeu lodo, tee llodo e hagallongo mai aabe ne daohi agu muna ange gi gilaadeu.

²⁴ Aagai noo goodou e kana ange ga hagallongo mai gi de au, go Tagi Maolunga e hagadaba, ga dee hagauda mai hanu mee laa lodo haitoga o de aduhale nei i de laangi o Sabbath, aagai ga hai gi dabu de laangi o Sabbath, goodou gu dee hai hegau ai,

²⁵ gai denga hodooligi e nnoho i honga de nohoanga hodooligi o David, e ulu mai naa ma de ssao ga hulo i denga haitoga o de aduhale nei madali olaadeu dangada hai hegau. Gilaadeu ma olaadeu dangada hai hegau e kage naa i honga denga hada ma honga hoosa ga loomai ai, madali denga daane o Judah aama dangada e nnoho i Jerusalem, gai de aduhale nei e nnoho ai dangada ga hano ai.

²⁶ Gai dangada e loomai naa i denga aduhale o Judah, ma mommee nnoho i luu baasi o Jerusalem, ma de henua o Benjamin, ma de mommee iai duuduu paa i lalo, ma mommee iai mounga, aama de bido i ngaage, gai gilaadeu e gaamai mee e hai ai denga sigidaumaha dudu, ma sigidaumaha ange laa, ma sigidaumaha o grain, ma frankincense, aama sigidaumaha e hagaahe ange ai de abodonu i de hale o Tagi Maolunga.

²⁷ Aagai noo goodou e dee hagallongo mai, goodou e dee hai gi dabu de laangi o Sabbath, ga dee hagauda mai mee laa lodo haitoga o Jerusalem i de laangi o Sabbath, gai au e dudu naa denga haitoga o Jerusalem aama ono hale danuaa, gai e dee maua naa donu i de diinei.’ ”