Jeremiah 14 - De Beebaa Dabu

Teai vai, de onge, ma de gadilaasa

¹ Gai Tagi Maolunga ne hagaago ange gi Jeremiah dagodo o tee pala de langi:

² “Judah e hinangalosaa; ono aduhale gu baageaa; ono dangada gu nnoho i honga de gelegele ma e tangi ai, gai gu kona de tangi o dangada i Jerusalem.

³ De gau aamua gu hai olaadeu dangada hai hegau gi hulo gi asu vai; gilaadeu ne hulo gi de vai i lo te baba, aagai teai alaadeu vai ne gide. Gilaadeu ne aahe mai ma alaadeu ngadi manu vai; gilaadeu gu dookaa ma de ssenga ange, gilaadeu gu haoli olaadeu biho.

⁴ De gelegele gu mmasa ma de mahangahanga, i hiidinga tee pala de langi i honga de henua; de gau hai veelenga gu manavasaa ma de haoli olaadeu biho.

⁵ Tia hahine lodo henua gu tili hogi dana dama, go hiidinga gu deai alaadeu helii e gai.

⁶ Denga donkey lodo henua gu tuu i honga duuduu malaelae, ma e manamanava bodo ai bei denga jackal. Olaadeu ganomada gu daalea i de ssala gai gu deai donu mommee iai helii.”

⁷ Tagi Maolunga, omaadeu baubau gu hagahaisala gimaadeu, aagai koe balea mai i hiidinga o doo ingoo. Gu kona mmao tee modu demaadeu aahe dua; gimaadeu gu haisala adu donu gi de goe.

⁸ Go koe de tali hagalodolodo a Israel, gai go dono Ia Hagaola i de masavaa hai ngadaa. Gai gu aha goe gu bei ai naa dagodo o dahi dangada henua gee i honga de henua, ma tangada e humai laa donu huu e noho i dahi boo?

⁹ Gu aha goe gu bei ai naa dahi dangada gu lele laa ono mouli, bei taane hebagi gu deai ono mahi e hagaola ai dahi? Tagi Maolunga, koe e noho i omaadeu daha, gai gimaadeu gu kave doo ingoo; koe gi dee dilia gimaadeu!

¹⁰ E hagadaba Tagi Maolunga i dagodo o de huaadangada nei: “Gilaadeu e llodo mmao e hulo gee mai i ogu daha; gilaadeu e dee llodo donu e nnoho donu huu Deelaa ai, Tagi Maolunga e dee malangilangi donu i gilaadeu; ia e dee ngalo naa hogi olaadeu baubau gai ia e hagaduasala gilaadeu i hiidinga olaadeu haisala.”

¹¹ Tagi Maolunga ne hai mai gi de au, “Aude dalodalo donu gi duadonu ai de huaadangada nei.

¹² Gai ga hagahiikai naa donu gilaadeu, aagai au e dee hagallongo donu alaadeu dalodalo. Gai e dee galemu naa donu delaadeu hai denga sigidaumaha dudu ma sigidaumaha o grain, aagai au e dee malangilangi donu i mee nei. Aagai au e daa gilaadeu gi maakau i de gadilaasa, ma de onge aama de mee hagamaakau.”

¹³ Gai au ne hai ange, “De Ia Aamua go Iahweh, tilo, denga pelaabisi e hai ange gi dangada, ‘Goodou e dee gidee naa donu de gadilaasa ma de onge, aagai Tagi Maolunga e hai naa donu goodou gi nnoho paba i de mommee nei.’ ”

¹⁴ Gai Tagi Maolunga ne hai mai gi de au, “Denga pelaabisi e pasa pelaabisi naa i dogu ingoo, ni daane hadu muna. Gai e dee go au donu ne haia gilaadeu gi loadu, au tee hili hogi gilaadeu, aabe gu basa ange gi gilaadeu. Gilaadeu e tala adu gi goodou hanu midi hhadu, ma de tala mee e loomai e deai haigamaiana, gai e daahanga donu huu gilaadeu.

¹⁵ Deenei ai, e hagadaba Tagi Maolunga i dagodo o denga pelaabisi e hadu muna i dono ingoo: E dee go au donu ne haia gilaadeu gi loadu, aagai gilaadeu e hagataba, ‘E deai naa donu se gadilaasa be se onge e dae mai gi de henua nei.’ Denga pelaabisi naa e maakau naa i de gadilaasa ma de onge.

¹⁶ Gai angaanga o denga pelaabisi naa e daakodo saele naa, i honga denga haiava o Jerusalem, i hiidinga o de onge ma de gadilaasa. E deai naa donu se dangada e danumia gilaadeu, ma olaadeu bodu aama alaadeu dama. Gai au e hagaduasala naa gilaadeu gi bei dagodo o alaadeu baubau.

¹⁷ Daalaa ange muna nei gi gilaadeu: ‘Luoogu mada gu dee tuu donu de honu malingilingi i denga loimada i de laangi ma de boo; go hiidinga tamaa hine — go ogu dangada — gu hagailia gai dono maanuga e kona.

¹⁸ Noo au e hano gi tua de aduhale, gai au e gidee dangada gu daia i de gadilaasa. Gai noo au e hano gi lo te aduhale, gai au e gidee dangada e mmagi i hiidinga o de onge. Gai de pelaabisi ma tangada haimeedabu e hagadaga saele ma e hai alaau hegau i honga de henua, gai gilaau e dee iloo donu alaau mee e hai.’ ”

¹⁹ E aha, koe gu tili naa donu Judah? Koe gu kino naa donu i Zion? Gu aha goe gu hagailiili ai naa gimaadeu gai omaadeu maanuga gu dee maua gi mmahu? Gimaadeu e ssala de nnoho paba, aagai teai donu se danuaa amaadeu e gidee. Gimaadeu e tali dahi masavaa o de hagaieiangi, aagai go de mee hagamaatagu donu huu ne humai.

²⁰ Tagi Maolunga, gimaadeu e tala adu donu omaadeu baubau, ma baubau o omaadeu dubuna madagidagi, go hiidinga gimaadeu gu haisala adu donu gi de goe.

²¹ Koe gi dee kino i gimaadeu, i hiidinga doo ingoo; koe gi dee hagangadi mee ina doo nohoanga mahamaha. Manadua dau hagatoo donu hagaheloongoi mai gi gimaadeu gai koe gi dee oohaa ina.

²² Gu hanu laa ngadi diinonga i magavaa diinonga o denga huaahenua e maua i de hai gi pala de langi? E aha, e maua e de langi i de hai gi pala iho de langi? E deai, gai go Iahweh demaadeu Maadua e haia mee nei. Deenei ai, go koe demaadeu tali hagalodolodo, gai go koe e haia mee nei alodahi.