Isaiah 14 - De Beebaa Dabu

¹ Tagi Maolunga e lodo aloha ange naa gi Jacob; ia e ahe ange naa e hili Israel ma de hai gilaadeu gi nnoho i delaadeu henua. De gau henua gee e loomai naa ga dau ange gi gilaadeu, ma de hagabuni ange gi dangada o Jacob.

² Denga huaadangada e kave naa gilaadeu, ga hagaahe gi delaadeu mommee donu. Gai de gau Israel e henua naa i denga huaahenua, bei denga daane ma haahine hai hegau, i de henua o Tagi Maolunga. Gilaadeu e hagadee kii naa dangada ne hagadee kii ina gilaadeu ma de dagi gilaadeu nogo vaivai haia gilaadeu.

³ De laangi laa gai Tagi Maolunga e hai naa gi ilaage goodou mai i de hagaduasala, ma de hai ngadaa, aama doodou hagahai hegau ina,

⁴ gai goodou e hua ange naa taahili hagammae manava nei gi de hodooligi o Babylon: “De ia e vaivai haia dangada gu lilo! Dono lili mmahi gu tuu!

⁵ Tagi Maolunga gu hhadi de laagau a tangada baubau, ma togo o denga dagi,

⁶ go de mee alaadeu e daa ai dangada i hanonga lagolago i delaadeu llili, ma de dagi denga huaahenua i de lili, aama tee tuu de vaivai hai gilaadeu.

⁷ Henua i lalo alodahi gu mmabu ma de nnoho paba, gilaadeu gu oo ma gu daahili.

⁸ Denga cypress e malangilangi hogi i de goe, denga cedar o Lebanon e hagataba, ‘Mai i de masavaa oou ne hagamaolalo ina ai, gai gu deai donu se dangada e selea iho gimaadeu.’

⁹ De mommee o de gau maakau i lalo de gelegele gu hidi age e hedae adu gi de goe i doo dae gi kilaa; hagasaalunga o de gau maakau gu hiihidi age e hedae adu — gilaadeu alodahi nogo dagina henua i lalo; gu hai gi hiihidi age mai i olaadeu nohoanga — go gilaadeu alodahi nogo hodooligi i denga huaahenua.

¹⁰ Gilaadeu alodahi e pasa adu naa, gilaadeu e hai adu naa, ‘Koe gu baageaa hogi, bei omaadeu dagodo; koe gu bei donu gimaadeu.’

¹¹ Doo mahamaha alodahi gu tili iho gi de mommee o de gau maakau, madali leo o au harp e hagadangidangi ai; denga ilo gu tolo i doo mommee e dagodo ai, gai gu haoli doo angaanga alodahi.

¹² Koe gu tili iho mai i de langi, de heduu o taiao, gai go de heduu maalama laa! Iainei koe ne tili iho gi henua i lalo, gai koe nogo hagadee kii denga huaahenua i mua!

¹³ Koe ne hagadaba i oo lodo, ‘Au e hanage naa gi dae gi de langi; au e hai naa dogu nohoanga hodooligi gi maolunga ange i denga heduu a de Maadua; au e noho i honga de mounga e hagabuni ai laa go de mommee maolunga hugadoo o de mounga dabu.

¹⁴ Au e hanage naa gi maolunga ange au i denga giliiga; au e hai naa gi maolunga bei dagodo o de Ia Maolunga Mmao laa.’

¹⁵ Aagai koe gu gave iho donu gi de mommee o de gau maakau, ma tagelo o de geelonga laa.

¹⁶ Dangada e gidee goe e haaina naa goe, ma de maanadu mee gu hai adu gi de goe: ‘E dee deenei taane ne hagangalungalue ina laa henua i lalo, ma de hai gi maatagu denga nohoanga hodooligi?

¹⁷ Gai e dee deenei taane ne haia laa henua i lalo ga se vao, ma de oha denga aduhale nnui, gai tee dugu de gau dee kii gi aahe gi olaadeu henua?’

¹⁸ Hodooligi alodahi o denga huaahenua e daakodo i lodo olaadeu daanunga i de mahamaha.

¹⁹ Aagai koe e tili gee naa i lo too daanunga bei dahi laa manu e aau laa ga tili; koe gu haolia ma gu lilo i de gau maakau, madali gilaadeu ne daia ga maakau i de gadilaasa, go gilaadeu e loiho gi lodo hadu i lo te geelonga. Koe gu bei de angaanga o tangada magau e dagadagahia laa.

²⁰ Koe tee danu madali gilaadeu, go hiidinga koe ne oha doo henua ma de daa ga maakau oo dangada. E deai naa donu dangada e manadua hagadiilinga o dangada e haia de baubau.

²¹ Hagadabena ina dahi mommee e daa ai gi maakau ana dama, i hiidinga baubau o olaadeu dubuna madagidagi; gai gilaadeu e dee aahe ange naa donu e henua i de henua, aabe gi haia gi dohu henua i lalo i olaadeu aduhale.”

²² “Au e hidi age naa e hai baasi ange gi gilaadeu, go Tagi o denga hagabuulinga hebagi e hagadaba. Au e hai naa gi ngalo de ingoo o Babylon, ma ono dangada e ola, go denga hagadiilinga ma denga aamuli, go Tagi Maolunga e hagadaba.

²³ Au e hai naa hogi Babylon gi se mommee e nnoho ai denga owl gai gi se mommee iai bela ma vai; au e tahi naa Babylon i tuaanui,” go Tagi o denga hagabuulinga hebagi e hagadaba.

Muna hagadaemaha i dagodo o Assyria

²⁴ Tagi o denga hagabuulinga hebagi ne basa hagatoo donu, ga hai ange, “Agu hagatau gu hai, e hagassula naa donu, gai dagu mee gu hagamodu, e dee haisala donu.

²⁵ Au e hagadee kii naa de gau Assyria i dogu henua; gai au e dagadagahi naa Assyria i honga ogu mounga. Gai dana laagau hagahai hegau e aau gee naa i honga ogu dangada, dana mee hagauda daemaha e aau gee naa i honga olaadeu eu.”

²⁶ Deenei de hagatau gu hagamodu ange gi henua i lalo alodahi, gai deenei de lima ne hagaabo ange laa gi honga denga huaahenua alodahi.

²⁷ Tagi o denga hagabuulinga hebagi gu hai dahi hagamodu, gai goai naa e maua i de buibui gi dee hai? Dono lima gu hagaabo, gai goai naa e maua i de hagaahe dua?

Muna hagadaemaha i dagodo o Philistia

²⁸ De ngadau o de hodooligi go Ahaz ne magau ai, gai muna hagadaemaha nei ne hagaago mai gi de au:

²⁹ De gau Philistia alodahi, goodou aude malangilangi, i de hadi de laagau ne hagaili ai laa goodou; go hiidinga de labodo e hagadili naa dahi labodo hagammau, gai dana dama e lele gai e hagammau.

³⁰ Gai manu a de gau hagaau aloha hugadoo e gaimee i de mommee iai helii, gilaadeu nogo duasala i mua e nnoho paba naa. Aagai au e daa naa gi maakau oodou dama i de onge ma oodou dangada alodahi ne ola.

³¹ De haitoga, koe gi dangi see; de aduhale oo ma gi dangi! De gau Philistia alodahi, goodou gi bolebole ma de maatagu! Go hiidinga dahi hagabuulinga hebagi bei de useahi laumalie gu humai i ngaiho, gai e deai donu se daane iai e doo gi muli.

³² Dee hee dau hai e basa ange ai gi de gau sui o de huaahenua laa? Hai ange, “Tagi Maolunga gu hagaduu gi makaga Zion, gai ono dangada nogo vaivai haia laa e gidee naa delaadeu mommee buibui i ono daha.”