Hebrews 7 - De Beebaa Dabu

Tangada haimeedabu go Melkizedek

¹ Gai taane nei go Melkizedek, go de hodooligi o Salem, ma tangada haimeedabu o de Maadua Maolunga Mmao, ne humai ga hedae ange gi Abraham i dua dana hagadee kii denga hodooligi dogohaa laa, gai ia ne hagamanuuia Abraham,

² gai Abraham ne vvae ange gi de ia dahi diba i diba e madaangahulu o mee alodahi. Tahi mee deenei, de hagadoonunga o dono ingoo go “Hodooligi o de Heohi;” gai go ia hogi de “hodooligi o Salem” e bei go “de Hodooligi o de Baba.”

³ Ia e deai sono damana aabe se dinana, gai e deai hogi sono atangada. E deai hogi se daamada be se hagaodi o dono mouli, ia e hagadulagi ange gi Tama Daane a de Maadua, ia se dangada haimeedabu ga hano ai e dee ngado mai.

⁴ Goodou kalo ange diiloo dagodo de maolunga o taane nei: Abraham, tubuna hagadubu o de gau Israel, ne gaavange gi de ia tahi diba i diba e madaangahulu o mee aana ne mau i de hebagi!

⁵ De hainga gu hagamodu bolo go de aamuli o Levi e haia laa hegau a de gau haimeedabu e gaavee tahi diba i diba e madaangahulu mai i daho dangada — e bei go de gau Israel ange laa — e dee galemu donu gilaadeu ni hagadiilinga hogi niio Abraham.

⁶ Aagai taane go Melkizedek nei e dee se dangada de aamuli o Levi, aagai ia ne kave tahi diba i diba e madaangahulu mai i daho Abraham, aama de hagamanuuia ia, go de ia ne gaavange laa aagena denga hagatoo donu laa.

⁷ Gai gidaadeu e iloo bolo tangada maolalo e hagamanuuia i daho tangada e maolunga ange i de ia.

⁸ Tahi diba i diba e madaangahulu ne gaavange gi de gau haimeedabu e maakau laa, aagai tahi diba i diba e madaangahulu nei ne gaavange gi taane e tala laa bolo e mouli ga hano ai.

⁹ Tangada e maua hogi i de hagataba bolo Levi, taane e gaavee laa tahi diba i diba e madaangahulu, ne gaavange gi Melkizedek tahi diba i diba e madaangahulu i daho Abraham,

¹⁰ go hiidinga de masavaa o Abraham ne hedae ange ai gi Melkizedek, gai Levi i lo te angaanga o dono dubuna go Abraham.

Iesu se dangada haimeedabu bei Melkizedek

¹¹ Noo hegau a de gau haimeedabu i de aamuli o Levi ne maua i de hai gi heohi abodonu dangada — gai go daho de gau haimeedabu ne gaavange ai de hainga gi dangada — gai gu aha gu hai ai laa gi humai dahi dangada haimeedabu bei dagodo o Melkizedek, e dee se dangada haimeedabu bei dagodo o Aaron?

¹² De masavaa naa huu e sui ai tangada haimeedabu, gai de hainga e sui donu hogi.

¹³ Gai tangada e tala nei ono dagodo i kinei se dangada dahi aamuli gee, gai tigi ai donu se dangada mai i de aamuli laa ne haia hegau i de mommee o ssigidaumaha.

¹⁴ Go hiidinga gidaadeu e iloo bolo taadeu Dagi Maolunga se dangada de aamuli o Judah, gai Moses tee hagadaba donu bolo dangada i de aamuli laa e maua i de hai hegau a de gau haimeedabu.

¹⁵ Gai de mee nei gu sula danuaa mai donu, i de humai o dahi dangada haimeedabu bei Melkizedek,

¹⁶ ga hai gu se dangada haimeedabu, gai de mee nei tee hai bei dagodo muna o de hainga i de aamuli oona e humai ai, aagai ne hai i ssauaa o de mouli e deai laa se hagaodi.

¹⁷ Go hiidinga ia gu hagadaba: “Koe se dangada haimeedabu ga hano ai, bei dagodo o Melkizedek.”

¹⁸ De hainga duai gu dugu, go hiidinga e baageaa ma tee haigamaiana,

¹⁹ (de hainga e dee maua donu i de hai dahi mee gi heohi abodonu,) gai de tali hagalodolodo e danuaa ange laa gu gaamai, gai go ia odaadeu e maua ai i de loomai e hagapaa ange gi de Maadua.

²⁰ Gai ne dahi donu hagatoo donu soe ne hai ange gi de mee nei. Gai gilaadeu ne hai gi ni dangada haimeedabu i mua, teai donu se hagatoo donu soe ne hai ange gi gilaadeu.

²¹ Aagai taane nei ne hai ga se dangada haimeedabu i dahi hagatoo donu soe, i hiidinga o de ia ne hai ange laa gi de ia: “Tagi Maolunga gu hagatoo donu gai e dee sui naa donu dana maanadu, ‘Koe se dangada haimeedabu ga hano ai.’ ”

²² De hagatoo donu nei ne hai Iesu go de ia e haia gi too donu de hagatoo donu hagaheloongoi e danuaa ange laa.

²³ Gai ne soa donu de gau haimeedabu, go hiidinga e dee maua e gilaadeu i de duudagi alaadeu hegau i delaadeu maakau.

²⁴ Aagai Iesu e duudagi naa donu huu dana hai hegau a tangada haimeedabu, i hiidinga ia e mouli ga hano ai.

²⁵ Deelaa ai, ia e maua i de hagamouli ga hano ai, gilaadeu e loomai gi de Maadua i ono hiidinga, go hiidinga ia e mouli i masavaa alodahi, gai ia ga dalodalo ai gilaadeu.

²⁶ Gai e heohi donu de hai gi dahi odaadeu dangada haimeedabu maolunga bei ono dagodo — ia e dabu, e dee haisala, e gilimalali, ia e vvae gee ma de gau haisala, gai gu hagaamua i de langi i lunga.

²⁷ Ia e dee bei dagodo o de gau haimeedabu maolunga ange laa; ia e dee aheahe ange e hai ssigidaumaha i laangi alodahi, e tala ai ono haisala donu, gai muli mai go haisala o de huaadangada. Aagai ne dahi donu huu hanonga aana ne hai ai ssigidaumaha i dono angaanga donu, i hiidinga olaadeu haisala.

²⁸ De hainga ne hili de gau e haisala ma de baageaa e hai ai de gau haimeedabu maolunga; aagai de hagatoo donu soe a de Maadua ne hai laa i dua de hainga, ne hili Tama Daane gu hai laa ma gu heohi abodonu ga hano ai.