Ephesians 2 - De Beebaa Dabu

De mouli age madali Klisdo i de gai

¹ Gai goodou ne maakau i hiidinga o denga hegau dee heohi ma denga haisala,

² go doodou hai nogo mouli ai, goodou ne daudali i dahulinga o henua i lalo nei, ma de daudali ange i tagi mmahi o lo te langi, go de hagasaalunga e hai hegau i lodo o dangada e dee hagallongo ange gi de Maadua.

³ Gidaadeu alodahi ne mouli bei olaadeu dagodo i masavaa gu hulo, i taadeu hai lodo haisala alodahi o de angaanga, ma de daudali i lodo ma maanadu o de angaanga. Gai gidaadeu gu paba ange donu e hagaduasala i de lili ⌊o de Maadua⌋, bei dagodo o de gau ange laa.

⁴ Aagai de Maadua, de ia e honu abodonu laa dono degi, i hiidinga dono aloha mmao i gidaadeu,

⁵ ne hagamouli age gidaadeu madali Klisdo i de masavaa odaadeu goi maakau ai i lodo odaadeu haisala — goodou gu hagamouli i dono abodonu.

⁶ Gai de Maadua ne hagamouli age gidaadeu madali Klisdo ga hai gidaadeu gi nnoho madali ia i denga mommee i de langi i lodo o Klisdo Iesu,

⁷ gai ia ga hagaago mai ai dono abodonu laumalie ma dono degi mai gi gidaadeu i lodo o Klisdo Iesu i de masavaa e humai.

⁸ Go hiidinga o dono abodonu oodou ne hagamouli i de gai. Gai e dee go hiidinga o oodou hegau, aagai se mee ngadi gaamai nii de Maadua,

⁹ e dee go hiidinga o oodou hegau, gi deai ai se dangada e maua i de tala tuhi donu huu ia.

¹⁰ Go hiidinga gidaadeu ni mee niiana ne hai, ma de hai i lodo o Klisdo Iesu, ange gi denga hegau danuaa a de Maadua gu hagadabena laa i mua, gidaadeu gi hai hegau ai.

Taadeu buni i lodo o Klisdo

¹¹ Deenei ai, goodou manadua bolo i mua, gai goodou ne haanau ni Gentile, ma de hagabinga bolo ni dangada e dee tuu dagaholiage, i daho de gau Ssuu, e hagaingoo ange laa bolo go dangada gu tuu dagaholiage (se hegau e hai ange gi de angaanga i daho dangada) —

¹² goodou manadua bolo de masavaa laa, gai goodou e vvae gee mai i Klisdo, goodou e dee dau madali de gau Israel, gai ni dangada i tua de mee, e dee dau i hagatoo donu hagaheloongoi, e deai soodou tali hagalodolodo, gai e deai donu soodou Maadua i henua i lalo.

¹³ Aagai iainei goodou gu nnoho i lodo o Klisdo Iesu; i mua gai goodou e mmao gee i de ia, aagai iainei gu gaamai gi paa mai i dodo o Klisdo.

¹⁴ Gai go ia donu taadeu nnoho baba, gai ia ne hai ngaadahi luu hagabuulinga nei gi dahi donu huu, ma de oha iho de buibui o de hagadau kino e vaaea laa gidaadeu, i dono angaanga donu,

¹⁵ i dana hai gi deai haigamaiana o denga hainga ma hagamodu. Gai ia ga hai ai luu hagabuulingaa dangada laa gi dahi donu huu i ono lodo, gai ia ga hagadanuaa ai olaau magavaa.

¹⁶ Gai ia ga hagadanuaa ange ai gidaadeu alodahi gi de Maadua, ga hai gilaadeu gu se huaadangada e dahi, i hiidinga dono magau i honga de laagau lui, gai ia ga hai ai gi deai se hagadau kino.

¹⁷ Gai ia ne humai ga agoago adu goodou denga Gentile e mmao gee laa i dagodo o de baba, aama ange hogi gi de gau Ssuu e paa ange laa.

¹⁸ Gai go ia odaadeu alodahi ne maua ai i de hulo gi Tamana i de Hagasaalunga e dahi.

¹⁹ Deenei ai, goodou gu dee ni dangada tua de mee aabe ni dangada henua gee, aagai gu ni dangada donu de henua madali dangada o de Maadua, goodou gu ni dangada donu dono huaabodu.

²⁰ Goodou gu hagatuu ange gi honga tagelo a de gau tala ma denga pelaabisi, gai go Klisdo Iesu donu tuludulu o de logunga,

²¹ go ia e daohia gi duu de hale alodahi ma de hai gi se temple dabu niio Tagi Maolunga.

²² Gai go ono daha oodou ne hagatuu age ai alodahi, e hai ai de mommee o de Maadua e noho ai i de Hagasaalunga.