Ecclesiastes 9 - De Beebaa Dabu

De hagaodi o dangada alodahi

¹ Au ne hagasaele mee nei alodahi ga hagadaba bolo gilaadeu e heohi ma gilaadeu e heiangi, aama alaadeu hegau, go de Maadua e hagasauaa ina. Gai e deai donu se dangada e iloo be go de aaloha aabe go de kino e gaavange gi de ia.

² Gai de hagaodi o dangada alodahi se dagodo daudahi — tangada heohi ma tangada baubau, tangada danuaa ma tangada dee heohi, tangada gilimalali ma tangada e dee gilimalali ono lodo, tangada e haia sigidaumaha ma tangada e dee haia sigidaumaha. Mee e hai ange gi tangada danuaa, e hai ange hogi gi tangada haisala; gai gilaadeu e haia hagatoo donu e bei hogi gilaadeu e dee hagatoo donu.

³ Deenei de mee baubau e hai i mee alodahi e hai i lalo de laa: de hagaodi o dangada alodahi e dagodo daudahi donu huu. E dahi ange mee, lodo o dangada e hoohonu i de baubau, gai de llodo ssenga e dagodo i olaadeu lodo i de masavaa olaadeu e mouli ai, gai muli mai gilaadeu e hulo gi daho de gau maakau.

⁴ Tangada goi mouli laa e dahi donu ana tali, gai de gaaduu goi mouli laa e danuaa ange i de laiono gu magau laa!

⁵ Gai dangada goi mouli laa e iloo bolo gilaadeu e maakau naa donu, aagai de gau maakau e deai donu alaadeu mee e iloo; e deai ange donu olaadeu hagaoanga, gai dangada gu dee manadua hogi gilaadeu.

⁶ Olaadeu aaloha, delaadeu kino ma delaadeu lodo gaiaa gu llilo odiodi, gai e deai ange naa donu selaadeu diba i dahi mee e hai i lalo de laa.

⁷ Hannoo, gaina au gai ga malangilangi, ma de unu au uvaini ga lodo danuaa, go hiidinga de Maadua e malangilangi i dau hai mee nei.

⁸ Gahu i malo tea, gai hagasulu ina doo biho i lolo i masavaa alodahi.

⁹ Koe gi malangilangi madali doo bodu, go de ia oou e aloha ai, i laangi alodahi e deai haigamaiana, a de Maadua gu gaavadu i doo mouli i lalo de laa, go hiidinga deenei doo duuhanga i de mouli nei, ma au hegau i lalo de laa.

¹⁰ Be ni aha naa huu aau e gidee e hai, gai koe hagaduu ngae haia, go hiidinga de mommee o de gau maakau, go de mommee oou gu dai hano naa aagena, e deai donu hegau e hai ai, e deai hogi hagatau, be se iloo mee aabe se heiangi.

¹¹ Au ne gidee ange dahi mee i lalo de laa: de saavini houhou e dee se mee ange donu huu gi tangada gemo, taua e dee se mee ange donu huu gi tangada mmahi; denga gai e dee ni mee ange donu huu gi tangada heiangi, gai de lava e dee se mee ange donu huu gi tangada iloo mee, gai de abodonu e dee se mee ange donu huu gi tangada gu agoagona; aagai de masavaa ma mee e hai ni mee ange gi gilaadeu alodahi.

¹² E dahi ange mee: e deai donu se dangada e iloo dono masavaa: de mamu e buulou i lo te galauna baubau, gai de manu lele e noodia i dahi sele, gai e bei ai hogi dangada e gaavee i denga masavaa baubau e daa hagalele laa donu huu de dae mai gi gilaadeu alodahi.

De heiangi e danuaa ange i de lodo senga

¹³ Au gu gidee hogi ma de lele ogu mouli i de hagadagodo o de heiangi i lalo de laa.

¹⁴ E dahi damaa aduhale e sogoisi dangada iai. Gai dahi hodooligi mmahi ne humai e hebagi ange aagena, ia ne duuli luu baasi ma de hagatuu denga mee e oha ai de aduhale laa.

¹⁵ Gai e dahi daane hagaau aloha gai e heiangi e noho i kilaa, ia ne hagaola de aduhale laa i dono heiangi. Aagai teai donu se dangada ne manadua taane hagaau aloha laa.

¹⁶ Gai au e hagadaba bolo de heiangi e danuaa ange i de mmahi, e dee galemu donu de heiangi o taane hagaau aloha ne hagangadi mee ina e dangada, gai dangada e deai anga ange gi ana muna.

¹⁷ Muna a tangada heiangi e musumusu, e heohi donu dau hagallongo i muna a tagi o de gau ssenga e oo laa ma e tala.

¹⁸ De heiangi e danuaa ange i denga goloa o de hebagi, aagai dahi dangada haisala e oha mee danuaa lagolago.