Ecclesiastes 4 - De Beebaa Dabu

Hanu hagadaagangaa mee hai ngadaa

¹ Gai au ne ahe ange hogi ga tilo de vaivai haia o dangada i lalo de laa. Au ne gidee loimada o dangada e vaivai haia, gai e deai dangada e hagaaneane ina gilaadeu. Ssauaa gu gaavange gi gilaadeu e vaivai haia dangada; gai e deai donu se dangada e balea ange gilaadeu.

² Au ne tuhi de gau maakau, go gilaadeu gu maakau odi laa, gilaadeu e malangilangi ange i gilaadeu goi mouli.

³ Aagai tangada e danuaa ange i gilaau ngaadahi go tangada tigi haanau laa, ia tigi gidee denga hegau baubau e hai i lalo de laa.

⁴ Au ne gidee hogi bolo hegau alodahi ma denga hegau labagau alodahi ne hai i hiidinga de lodo gaiaa o tangada i tangada ange laa. De mee nei e deai hogi ono haigamaiana, gai e bei de ngadi doolohi a tangada de madangi.

⁵ Tangada lodo senga e ngadi noho donu huu ga hagapogo luoono lima, ga hagahiigai ai donu huu ia.

⁶ De lima e honu laa i de noho baba, e danuaa ange i lodo luu lima e hoohonu laa i denga hegau kona, ma de ngadi doolohi a tangada de madangi.

⁷ Au ne gidee ange hogi hanu mee deai olaadeu haigamaiana i lalo de laa:

⁸ E dahi dangada e noho sogosogo, e deai sana dama daane be se daina daane. Gai e dee maua donu gi lava ana hegau e hai, gai ia e dee maua hogi gi malangilangi i dono lava. Gai ia e hagadaba, “Goai donu oogu e hai hegau kona ange nei aagena, gai gu aha gu dee hai ai nei donu huu au de mee e danuaa mai gi de au?” De mee nei e deai hogi ono haigamaiana, gai se hegau hagadaemaha!

⁹ Dogolua dangada e danuaa ange i dahi dangada sogosogo, go hiidinga e lagolago ange alaau mee e mau i alaau hegau ngaadahi.

¹⁰ Gai noo dahi gilaau gu baguu, gai dono soa e maua i de bale ange ia. Aagai e hagaaloha tangada e baguu laa, gai e deai donu se dangada e hagahidi age ia!

¹¹ E bei ai hogi, noo e dogolua dangada e hebaa ma e daakodo ai, gai gilaau e mahanahana. Aagai dee hee de hai o dahi dangada sogosogo e maua ai gi mahanahana?

¹² Tangada sogosogo e maua gi hagadee kii ina, gai e dogolua dangada e maua i de buibui gilaau. Taula e dua dolu laa e dee moolau de modu.

¹³ Tama daane hagaau aloha heiangi e danuaa ange i dahi hodooligi madumadua lodo senga gu dee maua laa i de hagallongo dahi muna e hagakana ange,

¹⁴ e dee galemu be tama daane laa ne sao mai i lo te hale pono ga hodooligi, aabe ia ne haanau i dono nohoanga hodooligi ga hagaau aloha.

¹⁵ Au ne gidee bolo alodahi e mouli laa ma de seesee i lalo de laa ne daudali ange i dahi gauligi, go de ia ne gaavee tuulanga o de hodooligi.

¹⁶ Gai e soa dangada aana e dagi. Aagai dangada e loomai i ono dua e dee malangilangi i de ia. Ni muna abodonu, de mee nei e deai hogi ono haigamaiana, gai e bei de ngadi doolohi a tangada de madangi.