Colossians 3 - De Beebaa Dabu

De mouli duai ma de mouli hoou

¹ Noo goodou gu mouli age madali Klisdo, gai goodou gi hai mee ange gi mee i lunga, go de mommee o Klisdo e noho ai i de baasi madau o de Maadua.

² Goodou hagasaelea mee i lunga, e dee go mee o henua i lalo.

³ I hiidinga goodou gu maakau, gai iainei oodou mouli e doange madali Klisdo i daho de Maadua.

⁴ Gai de masavaa naa huu o Klisdo, doodou mouli e humai ai, gai goodou e loomai naa hogi madali ia i de mahamaha.

⁵ Deenei ai, goodou daia gi maakau lodo o henua i lalo e hai hegau laa i oodou lodo: go de hai be se manu, ma dahulinga hakino gee, ma de lodo dee heohi, ma de lodo e hai de baubau, ma de nnoo hagamau mee, mee nei e bei donu de daumaha ange gi denga diinonga.

⁶ Go hiidinga o denga dahulinga nei ne humai ai de bole o de Maadua gi honga o dangada e dee hagallongo ange gi ana muna.

⁷ Gai goodou nogo hai hegau donu hogi i mee nei, i de masavaa oodou nogo mouli ai i mee nei.

⁸ Gai iainei goodou dilia gee mee nei alodahi: go de lili, go de bolebole, go de lodo e hebagi ange gi dangada, go de hai samu, aama de vaivai basa.

⁹ Goodou gi dee hagadau daahangadia goodou, go hiidinga goodou gu hagaui ma gu tili tangada duai ma ana dahulinga alodahi,

¹⁰ gai gu kahu i tangada hoou, e hagahoou laa i doodou iloo dagodo o de ia ne haia goodou.

¹¹ Gai de mouli hoou nei e deai donu se dangada Ssuu be se dangada Greek, se dangada gu tuu dagaholiage be se dangada tigi tuu dagaholiage, se dangada lodo henua be se dangada tigi skuulu, se dangada hai hegau be se dangada ilaage; aagai go Klisdo e hagamogomogo, gai ia e noho i olaadeu lodo alodahi.

¹² Deenei ai, goodou dangada a de Maadua gu hili e hai ai ono dangada, goodou e dabu ma de hagamogomogo, goodou gi hai hegau i de lodo aloha, ma de abodonu, ma de lodo maolalo, ma de daudonu, ma de golomagi lodo.

¹³ Goodou gi hagadau golomagi ina oodou lodo, ma de hagadau degi ange gi haisala o dahi ma dahi, bei de hai a Tagi Maolunga ne degi adu ai laa gi oodou haisala.

¹⁴ Gai hagapunidia ange gi mee nei alodahi de aloha, go de mee e noodia mee alodahi ga hai gi buni abodonu.

¹⁵ Gai de baba o Klisdo gi dagina oodou lodo, go hiidinga goodou ne hagahi gi dau ange gi de angaanga e dahi. Gai goodou gi hagaahe ange de abodonu.

¹⁶ Gai haia gi honu abodonu muna a Klisdo i oodou lodo, gai goodou ga hagadau agoago ai ma de hagadau hagakana ange ai goodou i de heiangi alodahi, ma de daahili i denga psalm ma denga daahili daumaha, ma daahili o de baasi gi de hagasaalunga, i doodou hagaahe ange de abodonu gi de Maadua i oodou lodo.

¹⁷ Gai mee alodahi oodou e hai, i oodou muna be go oodou hegau, gai goodou haia mee nei alodahi i de ingoo o Tagi Maolunga go Iesu, ma de hagaahe ange de abodonu gi de Maadua Tamana i dono ingoo.

Hainga ange gi denga huaabodu

¹⁸ Denga haahine, goodou hagadubu ina oodou bodu, bei de hai e heohi ange ai gi oodou mouli i lodo o Tagi Maolunga.

¹⁹ Denga daane, goodou aloha i oodou bodu, goodou gi dee vaivai haia gilaadeu.

²⁰ Denga dama, goodou hagallongo ange gi oodou maadua i mee alodahi, go hiidinga deenei de mee e hagamalangilangi ina de Maadua.

²¹ Denga damana, goodou gi dee haia gi llili oodou dama, gi dee llodo baageaa ai gilaadeu.

²² De gau hai hegau, goodou hagallongo ange gi oodou dangada aamua i mee alodahi. Gai goodou gi dee hagallongo ange donu huu i de masavaa alaadeu e gidee ai goodou, gi malangilangi ai gilaadeu i goodou, aagai goodou hai hegau i de lodo se muna abodonu i doodou maatagu i Tagi Maolunga.

²³ Gai be ni aha naa huu oodou e hai, gai goodou haia i de lodo se mee abodonu ange gi Tagi Maolunga e dee ange gi dangada.

²⁴ Gai goodou e iloo bolo goodou e kave donu de hagaoanga o oodou hegau mai i daho Tagi Maolunga, i hiidinga goodou e hai hegau ange donu gi Tagi Maolunga go Klisdo.

²⁵ Go hiidinga tangada e haia de baubau e kave naa donu de hagaoanga o ana hegau baubau, gai de Maadua e dee vae dangada donu.