Colossians 1 - De Beebaa Dabu

De hagaboo

¹ Mai i daho Paul, tangada tala o Klisdo Iesu bei dagodo de hagatau a de Maadua, aama Timothy taadeu daina.

² Ange gi dangada o de Maadua i Colossae, go denga daina e hai hegau i de mee abodonu i lodo o Klisdo. De abodonu ma de baba mai i daho de Maadua taadeu Damana gi dagodo i oodou daha.

Talodalo ma de hagaahe ange de abodonu

³ Gimaadeu e hagaahe ange de abodonu gi de Maadua Tamana o taadeu Dagi Maolunga go Iesu Klisdo, i masavaa alodahi omaadeu e dalodalo ai i goodou,

⁴ go hiidinga gimaadeu gu langona dagodo o doodou kai ange gi Klisdo Iesu, aama doodou aaloha i dangada alodahi o de Maadua,

⁵ i hiidinga de tali hagalodolodo gu hagadabena adu laa gi goodou i de langi. Gai goodou gu langona dagodo o de tali nei i de agoago abodonu, go de longo danuaa,

⁶ gu dae adu naa hogi gi goodou. Gai go de longo danuaa hogi gu hagadili ina laa hua lagolago aama de hagadagadaga age i henua i lalo alodahi — bei de hai gu hagadili ai naa hogi ono hua i oodou magavaa, mai i de laangi oodou ne langona ai ga tonu ange gi de abodonu o de Maadua.

⁷ Gai e bei donu doodou hai ne agoago ai laa i daho Epaphras taadeu soa hai hegau hagamogomogo. Ia se dangada hai hegau hagaduu ngae niio Klisdo i oodou hiidinga.

⁸ Gai ia gu tala mai hogi gi gimaadeu dagodo o doodou hagadau aaloha i ssauaa o de Hagasaalunga ⌊Dabu⌋.

⁹ Deenei ai, tigi helui donu demaadeu dalodalo i goodou mai i de laangi amaadeu ne langona ai oodou dagodo; gimaadeu e dangidangi gi honu danuaa doodou iloo ono lodo, i de heiangi aama de tonu danuaa ange gi mee alodahi i de baasi gi de hagasaalunga.

¹⁰ Gai gi maua ai e goodou i de mouli bei dagodo lodo o Tagi Maolunga, ma de hagamalangilangi ia i mee alodahi, ma de hagadili hua danuaa i denga hegau danuaa alodahi, aama de hagadaga ange doodou iloo de Maadua.

¹¹ Gai goodou gi mmahi i mahi alodahi, bei dagodo o ono mahi, gi maua ai e goodou i de llodo mmahi ma de golomagi lodo aama de malangilangi,

¹² gai hagaahe ange de abodonu gi Tamana; go ia ne haia ga maua e gidaadeu i de kave de boolonga o dangada o de Maadua i de nohoanga hodooligi o de maalama.

¹³ Ia ne hagaola gidaadeu mai i lalo ssauaa o de gohu ma gu hagaulu gidaadeu i de nohoanga hodooligi o dana Dama Daane hagamogomogo,

¹⁴ go de ia ne hagaola ina gidaadeu, ga degi mai gi odaadeu haisala.

Klisdo e maolunga ange

¹⁵ Klisdo go de hagadulagi donu o de Maadua e dee gidee laa, gai go Tama madua o mee alodahi ne hai i taamada age.

¹⁶ Gai go ia hogi ne haia mee alodahi i lo te langi ma honga henua i lalo, mee e gidee ma mee e dee gidee; bei denga nohoanga hodooligi, ma gilaadeu e mmahi, ma gilaadeu e dagi, ma gilaadeu iai ssauaa e dagi ai; mee alodahi go ia ne haia gai ne hai ange donu gi de ia.

¹⁷ Gai Klisdo gu mouli huu i mua de hai mee alodahi, gai go ia e daohia mee alodahi.

¹⁸ Gai go ia de biho o de angaanga, go de nohoanga dabu; go ia taamada gai go ia hugadoo ne mouli age i mua i de gau maakau, deenei ai, go ia tahi i mee alodahi.

¹⁹ Gai de Maadua ne malangilangi i de hai gi daakodo ono dagodo honu danuaa i ono daha,

²⁰ gai de Maadua ne malangilangi i de hagadanuaa olaadeu magavaa ma mee alodahi e dee hilihili be go mee i henua i lalo aabe go mee i de langi, ga hai ai gi maua de nnoho paba i dodo o Klisdo i honga de laagau lui.

²¹ I mua gai goodou e bei de gau henua gee i daho de Maadua, gai ni hagadaumee niiona i oodou maanadu, ma de hai denga hegau baubau.

²² Aagai iainei ia gu hagadanuaa oodou magavaa i de angaanga o Klisdo i dono magau, gai ia ga gaavange ai goodou gi de ia, goodou gu dabu ma de gilimalali, gai gu dee hagabaubau i mada luoono mada —

²³ noo goodou e duudagi de daohi de gai ma de tuu gi makaga gu dee ngalungaalue, goodou gu dee llodo lagolago i doodou tali hagalodolodo, gu hagatoo donu laa i de longo danuaa oodou gu langona laa, gai gu tala ange hogi gi dangada alodahi i lalo de langi. Gai au gu hai hogi gi se dangada hai hegau niio de longo danuaa nei.

Hegau a Paul ange gi de nohoanga dabu

²⁴ Gai au e malangilangi donu i de hagaduasala i oodou hiidinga, gai dogu hagaduasala i de angaanga nei e bale de hagaodi ange de hagaduasala o Klisdo i hiidinga o dono angaanga, go de nohoanga dabu.

²⁵ Gai au ne hai go tangada hai hegau niio de nohoanga dabu, bei dagodo de hagadabu gu gaamai laa gi de au i daho de Maadua, gai au ga hai ai goodou gi iloo danuaa muna a de Maadua;

²⁶ go de mee nogo dee iloo laa e denga atangada gu hulo i dahi masavaa daulooloa, aagai iainei gu hagaago ange gi ono dangada dabu.

²⁷ Gai de Maadua ne hagatau bolo e hai gi iloo e denga Gentile dagodo de laumalie de mahamaha o de mee nogo dee iloo laa, go Klisdo i oodou lodo, go de mahamaha adaadeu e tali hagalodolodo ange laa aagena.

²⁸ Gai go ia donu omaadeu e agoago ai nei, ma de hagakana ange ai dangada alodahi i de heiangi alodahi, gi maua ai e gimaadeu i de gaamai gilaadeu alodahi gu maatua abodonu i lodo o Klisdo.

²⁹ Gai au e hagaduu ngae e hai mee nei alodahi i ssauaa mahi o de Maadua gu hagahai hegau laa i ogu daha.