Acts 26 - De Beebaa Dabu

Paul e tala dono heohi i mada i mua o Agrippa

¹ Gai Agrippa ga hai ange gi a Paul, “Gu dugu adu goe gi daalaa doo heohi.” Gai a Paul ga haalo dono lima ga daamada de tala dono heohi, ga hai ange,

² “De hodooligi go Agrippa, au e hagadaba bolo au gu manuuia, i de duu i oo mada i mua anailaa nei e tala ai dogu heohi, ange gi mee alodahi a de gau Ssuu e hagabaubau ai au.

³ Go hiidinga hogi koe e donu ange gi dahulinga alodahi a de gau Ssuu, ma mee olaadeu e hagadaumee mai ai. Deenei ai, au e dangidangi adu koe gi golomagi ina oo lodo ma gi hagalaangona agu muna.

⁴ De gau Ssuu alodahi e iloo dagodo o dogu mouli mai i dogu gauligi, gai au ne madua age i daho dogu huaahenua i Jerusalem.

⁵ Gai gu daulooloa donu delaadeu iloo, gai e maua donu e gilaadeu de tala hagadonu adu ogu dagodo, bolo au se Pharisee e dau ange gi de hagabuulinga e kona laa alaadeu hainga ange gi amaadeu hai daumaha.

⁶ Gai iainei au e duu i kinei e hagamodu ai ogu muna i hiidinga dagu tali hagalodolodo ange gi denga hagatoo donu a de Maadua ange gi omaadeu dubuna.

⁷ Deenei de mee a denga aamuli e dinoangahulu ma dogolua e tali laa, gai gilaadeu ne llodo mmao gi gidee e gilaadeu, gilaadeu ne hagaduu ngae ga daumaha ange gi de Maadua i de boo ma de laangi. De hodooligi go Agrippa, go hiidinga o de tali hagalodolodo nei oogu gu hagabaubau ina ai nei i daho de gau Ssuu.

⁸ Aagai gu aha gu hagadaba ai dahi i oodou daha bolo e hai ngadaa i daho de Maadua de hagamouli age de gau maakau?

⁹ Au ne hagadonusia hogi bolo au e hai mee alodahi aagu e mau e hai baasi ange ai gi de ingoo o Iesu taane Nazareth.

¹⁰ Gai au ne hai de hegau nei i Jerusalem. Au ne kave ssauaa mai i daho de gau haimeedabu maolunga, ga tili ange ai dangada soa o de Maadua gi lo te hale pono, gai de masavaa olaadeu ne daa ai ga maakau, gai au ne buni ange donu aagena.

¹¹ Au ne hagadaga hogi i denga synagogue alodahi ga hagaduasala gilaadeu, ma de hai gilaadeu gi hagangadi mee ina Iesu. Au ne vaivai hai gilaadeu i aduhale o denga henua gee, i hiidinga dogu kino i gilaadeu.

De tala a Paul de dahuli ono lodo

¹² “Au ne hano hogi gi Damascus i ssauaa mai i daho de gau haimeedabu maolunga e hai ai mee nei.

¹³ De hodooligi, au ne gidee hogi i honga de haiava dahi maalama mai i de langi i daha de hualaangi, gai e maalama ange i de maalama o de laa, gai gu hagamaalama de mommee omaadeu ma dangada ne hulo madali au iai laa.

¹⁴ Gai de masavaa omaadeu alodahi ne too ai gi honga de gelegele, gai au ne langona de leo e basa mai gi de au i muna Aramaic, ‘Saul, Saul, gu aha goe gu vaivai hai ai naa ngau? E hai ngadaa mmao dau badu i doo vae mee duiduia.’

¹⁵ Gai au ga hai ange, ‘Tagi Maolunga, go koe goai?’ Gai Tagi Maolunga ne hai mai gi de au, ‘Go au donu go Iesu aau e vaivai hai naa.

¹⁶ Aagai koe hidi duu gi lunga. Go hiidinga au ne hakide adu gi de goe e hili ai goe gi se dangada hai hegau gai gi se dangada e daalaa hagadonu mee aau gu gidee, aama mee aagu gu dai hagaago adu gi de goe.

¹⁷ Gai au e hagaola naa goe mai i daho de gau Ssuu ma mai i daho denga Gentile, aagu e kave goe gi hano gi gilaadeu,

¹⁸ gi maahuge ai olaadeu mada, ma de hulo gee i de gohu ga daudali i de maalama, aama de hulo gee mai i lalo ssauaa o Satan ga daudali ange i de Maadua, gai ia ga degi ange ai gi olaadeu haisala gai gilaadeu gu dau madali gilaadeu gu vvae gee i de kai i ogu lodo.’

Hegau a Paul ange gi denga Ssuu ma Gentile

¹⁹ “Deenei ai, de hodooligi go Agrippa, au tee hagangadi mee donu de midi hagaago ange mai i de langi.

²⁰ Au ne tala ange i mua gi dangada i Damascus, muli mai go Jerusalem ma Judea alodahi, aama ange hogi gi denga Gentile, gi daahuli ange ai gilaadeu gi de Maadua, ma de hai hegau e heohi ange laa gi dagodo o de daahuli olaadeu lodo.

²¹ Aanei hiidinga a de gau Ssuu ne poo ai au i lo te buibui o de temple, e daa gi magau.

²² Aagai de Maadua ne bale mai au ga dae mai ai gi anailaa nei. Deenei ai, au e duu i kinei e tala hagadonu ange ai gi gilaadeu e maolalo ma gilaadeu e maolunga. Au e tala donu huu mee a denga pelaabisi aama Moses gu tala laa bolo e hai:

²³ Klisdo e hagaduasala naa, gai go ia taamada o de mouli age mai i de magau, gai ia ga tala ange dagodo o de maalama gi ono dangada go de gau Ssuu aama denga Gentile.”

²⁴ Gai de masavaa a Paul e tala ai dono heohi, gai Festus ga hai ange i de leo laumalie, “Paul, koe gu senga i de kona de lagolago au mee gu ago!”

²⁵ Aagai Paul ne hai ange, “Festus maolunga mmao, au e dee senga, gai au e tala donu de muna abodonu i tee senga.

²⁶ Gai de hodooligi e iloo donu dagodo o mee nei, gai au e malangilangi donu i de tala agu muna, go hiidinga au e donu ange bolo mee nei alodahi e odi i dau iloo, go hiidinga mee nei tee hai hagammuni.

²⁷ De hodooligi go Agrippa, koe e hagadonusia muna a denga pelaabisi? Au e iloo bolo koe e hagadonusia donu.”

²⁸ Gai Agrippa ga hai ange gi a Paul, “E momo ange huu koe gu hai au gi se Christian, i dahi masavaa bodobodo donu huu!”

²⁹ Paul ne hai ange, “E dee hilihili donu be se masavaa bodobodo aabe se masavaa daulooloa — gai au e dalodalo ange gi de Maadua bolo e dee go koe donu huu, aagai go dangada alodahi e langona agu muna anailaa nei, gi hagadonusia hogi bei ogu dagodo, deelaa donu huu, goodou gi dee noonoodia i daula baalanga bee nei.”

³⁰ Aagai de hodooligi ga hidi age e hano, madali de goobenaa ma Bernice aama dangada alodahi,

³¹ gai de masavaa huu olaadeu ne hulo gee ai i kilaa, gai gilaadeu ga pasa i olaadeu magavaa, ga hagataba, “Taane nei tigi hai donu dahi mee daudahi e heohi ai dono daa gi magau, aabe go dono tili ange gi lo te hale pono.”

³² Gai Agrippa ga hai ange gi Festus, “Taane nei ne maua donu gi ola, noo ia tee dangidangi i de hagamodu ono muna i mada i mua o Caesar.”