Acts 23 - De Beebaa Dabu

¹ Gai a Paul ne haaina de hagabuulinga hagasaele laa, ga hai ange, “Denga daina, au ne hagassula agu hegau i tagi o de lodo e gilimalali laa, i mada luu mada o de Maadua ga dae mai ai gi anailaa nei.”

² Gai tangada haimeedabu maolunga go Ananias ga hai ange gi gilaadeu e paa ange gi a Paul gi hagailihia dono ngudu.

³ Gai a Paul ne hai ange gi de ia, “De Maadua gi hagailihia hogi goe! Koe e bei donu dagodo o de buibui gu lebu tea laa! Koe e noho ma e hagamodu ogu muna i de hainga, gai koe e oha hogi de hainga, i dau hai gilaadeu gi hagailihia dogu ngudu!”

⁴ Gai dangada e tuu i gaogao o Paul ga ssili ange gi de ia, “Gu aha goe gu basa ange ai naa bee naa gi tangada haimeedabu maolunga o de Maadua?”

⁵ Aagai Paul ne hai ange, “Denga daina, au tee iloo donu bolo ia go tangada haimeedabu maolunga; go hiidinga gu sisi e hai ange, ‘Aude daalaa hanu muna baubau i tagi o doo huaadangada.’ ”

⁶ Gai ga iloo huu e Paul bolo hanu dangada i kilaa ni Sadducee, gai hanu ni Pharisee, gai ia ga hagaleo laumalie i mada i mua o de hagabuulinga hagasaele, ga hai ange, “Denga daina, au se Pharisee, gai se hagadiilinga niio denga Pharisee. Gai au gu hagamodu ogu muna i hiidinga dagu tali hagalodolodo ange gi de mouli age o de gau maakau.”

⁷ Gai de masavaa aana e tala ai muna nei, gai denga Pharisee ma denga Sadducee gu dee heloongoi, gai de hagabuulingaa dangada laa gu dee buni hogi.

⁸ Go hiidinga denga Sadducee e hagataba bolo e deai donu se mouli age, gai e deai hogi dangada de langi aabe ni hagasaalunga; gai denga Pharisee e tala bolo e hai donu mee nei.

⁹ Gai gu kona de hagalongaa o dangada; gai hanu dangada sisi o denga Pharisee ne tuu age ga hai baasi, ga hai ange, “Gimaadeu tee gidee donu dahi baubau i daho taane nei! Kana adu dahi hagasaalunga be se dangada de langi gu basa ange donu gi de ia.”

¹⁰ Aagai ga kona huu delaadeu hagadaumee, gai tagi o de hebagi gu manavasaa kana haangaalua e gilaadeu a Paul, gai ia ga hai denga daane hebagi gi loiho gi haia gi de mahi, gi gaavee gee ai a Paul i olaadeu daha, ga gaamai ia gi de mommee o denga daane hebagi.

¹¹ De boo laa, gai Tagi Maolunga ne duu i gaogao o Paul, ga hai ange gi de ia, “Koe gi lo taane! Koe e tala hagadonu naa hogi ogu dagodo i Rome, bei dau hai gu tala hagadonu ai naa ogu dagodo i Jerusalem.”

De hagatau e daa a Paul gi magau

¹² Taiao age, gai de gau Ssuu ne hai dahi hagatoo donu, bolo gilaadeu e dee gaimee aabe unu ga dae ai gi delaadeu daa a Paul gi magau.

¹³ Se dinohaa duumaa gilaadeu ne haia de hagatau nei.

¹⁴ Gai gilaadeu ne hulo gi daho de gau haimeedabu maolunga ma denga dagi, ga hai ange, “Gimaadeu gu hai dahi hagatoo donu, bolo gimaadeu e dee gaimee donu aabe unu ga dae ai gi demaadeu daa a Paul ga magau.

¹⁵ Deenei ai, goodou ma de hagabuulinga hagasaele gi dangidangi ange gi tagi o de hebagi gi gaamai a Paul gi oodou daha, e dagodo be goodou e llodo ssili e hagadonu ono dagodo. Gai gimaadeu ga hagadabena e daa ia gi magau i mua dono dae mai gi kinei.”

¹⁶ Aagai tama daane a taina hahine o Paul ne langona e ia delaadeu hagatau, gai ia ga hano ga ulu gi lo te mommee o denga daane hebagi ga tala ange gi a Paul.

¹⁷ Gai a Paul ne hagahi dahi dagi o de lau, ga hai ange, “Gaavee tama daane nei gi daho tagi o de hebagi; e hanu ana muna e tala ange gi de ia.”

¹⁸ Gai taane laa ga kave tama daane laa gi tagi o de hebagi, ga hai ange, “Paul, taane i lo te hale pono, ne hagahi mai au ga dangidangi mai au gi gaamai tama daane nei gi oo daha. E hanu ana muna e tala adu gi de goe.”

¹⁹ Gai tagi o de hebagi ga poo de lima o tama daane laa ga dagi ia gi dahi mommee gee, ga ssili ange gi de ia, “Aahee au muna e lodo e tala mai gi de au?”

²⁰ Tama daane laa ne hai ange gi de ia, “De gau Ssuu gu buni bolo e dangidangi adu, koe gi gaavee a Paul gi daho de hagabuulinga hagasaele daiao, e dagodo be gilaadeu e llodo e ssili e hagadonu ono dagodo.

²¹ Aagai koe aude haia gi bei olaadeu lodo, go hiidinga e dinohaa duumaa daane gu nnoho e daa ia gi magau. Gilaadeu gu hai dahi hagatoo donu bolo gilaadeu e dee gaimee donu, aabe e unu ga dae ai gi delaadeu daa ia gi magau. Gilaadeu gu paba donu iainei, gai e tali adu donu huu koe gi uaa ange gi delaadeu dangidangi.”

²² Aagai tagi o de hebagi ne dugu gi hano tama daane laa, ga hai ange gi de ia, “Aude daalaa ange donu gi dahi dangada au muna gu tala mai naa gi de au.”

De kave o Paul gi Caesarea

²³ Gai ia ne hagahi e dogolua dagi o de lau, ga hai ange gi gilaau, “Hagadabena ina e lualau daane hebagi ma e dinohidu daane i honga denga hoosa, ma e lualau daane ma alaadeu dao gi hulo gi Caesarea i de daa ssiva aaboo nei.

²⁴ Hagadabena ina hogi hanu hoosa e hagauda a Paul, ma de hagaloosi ange ai ia ga kave gi daho de goobenaa go Felix.”

²⁵ Gai ia ne sisi hogi dahi leda, ga hai ange:

²⁶ “Mai i daho Claudius Lysias, ange gi de goobenaa go Felix: de laangi danuaa.

²⁷ Taane nei ne boogia e de gau Ssuu e daa gi magau, aagai au ne hano madali denga daane hebagi ga hagaola ia, go hiidinga au gu iloo bolo ia se dangada Rome donu.

²⁸ Gai au ne kave ia gi daho delaadeu hagabuulinga hagasaele ga ssili ai gi iloo e au hiidinga alaadeu ne hagabaubau ai laa ia.

²⁹ Gai au gu iloo bolo ia ne hagabaubau ina donu huu i hanu alaadeu hainga, aagai alaadeu mee e hagabaubau ai ia ni mee donu e dee heohi ai dono magau, aabe go dono hhao gi lo te hale pono.

³⁰ Aagai de masavaa huu aagu ne iloo ai bolo hanu daane Ssuu gu nnoho e daa taane naa gi magau, gai au ga hai ia gi hanadu gi oo daha. Au gu hai ange hogi gi gilaadeu ne hagabaubau ina laa ia gi loadu gi daalaa adu gi de goe mee alaadeu e hagabaubau ai ia.”

³¹ Deelaa ai, denga daane hebagi laa ne kave a Paul i de boo laa gi de mommee go Antipatris, bei de hai gu tala ange ai gi gilaadeu.

³² De laangi i ono dua, gai gilaadeu ne aahe gi de mommee o denga daane hebagi i Jerusalem, gai go denga daane donu huu i honga hoosa ne hulo madali a Paul.

³³ Gai de masavaa olaadeu ne tae ai gi Caesarea, gai gilaadeu ga gaavange de leda laa gi de goobenaa go Felix, ma de hai a Paul gi duu i ono mada i mua.

³⁴ Gai ga lava huu i de dau a de goobenaa de leda laa, gai ia ga ssili ange gi a Paul bee hee donu ungaamee ne humai ai. Gai ga iloo huu e ia bolo a Paul se dangada mai i Cilicia,

³⁵ gai ia ga hai ange, “Au e hagallongo naa dagodo mee oou gu hagabaubau ina ai, i de masavaa e tae mai ai gilaadeu ne hagabaubau ina goe.” Gai ia ga hagadaba bolo gi gaavee a Paul gi lo te Praetorium o Herod gi hagaloosia ange ai.