3 John 1 - De Beebaa Dabu

De hagaboo

¹ Mai i daho tagi hagadubu. Ange gi Gaius, taina hagamogomogo, go de ia oogu e aloha ai i de muna abodonu.

² Dogu soa hagamogomogo, au e dalodalo koe gi manuuia i mee alodahi, gai doo angaanga gi mmahi, bei dagodo de mmahi o doo hagasaalunga.

³ Gai au ne malangilangi mmao i de masavaa o denga daina ne loomai ai ga tala dagodo o doo hai hegau i de muna abodonu, ma doo seesee i de muna abodonu.

⁴ Gai e deai ange donu se mee e kii ange dogu hagamalangilangi, bei dagu langona bolo agu dama e seesee i de mee abodonu.

De tuhi hegau danuaa a Gaius

⁵ Dogu soa hagamogomogo, se hegau danuaa mmao dau bale ange denga daina, e dee galemu donu gilaadeu ni dangada henua gee.

⁶ Gilaadeu ne tala ange gi de nohoanga dabu i kinei dagodo o doo aloha ange gi gilaadeu. Gai koe dagidiiloo hogi balea ange gilaadeu, i delaadeu masavaa e maalanga ai e hulo, i de hai e hagamalangilangi ai de Maadua.

⁷ Gilaadeu ne hulo i hiidinga de ingoo o Klisdo, gai gilaadeu tee kave donu dahi bale mai i daho denga Gentile.

⁸ Deenei ai, e heohi donu taadeu bale ange de gau bee nei, gi maua ai e gidaadeu i de hai hegau madali gilaadeu i de mee abodonu.

Diotrephes ma Demetrius

⁹ Au gu sisi ange hanu muna gi de nohoanga dabu, aagai Diotrephes e lodo go ia e dagudagu ina mee, ia tee lodo e hagallongo mai gi amaadeu muna.

¹⁰ Aagai noo au gu dae adu, gai au ga tala adu ai gi iloo e goodou dagodo o ana hegau e hai, aama dana tala hanu ngadi muna e hagabaubau ai gimaadeu. Gai e dee aanaa donu huu ana mee ne hai, gai ia tee lodo donu e abodonu ange gi denga daina, ma de buibui dangada e llodo laa e balea ange gilaadeu, ga aau gee mai gilaadeu i de nohoanga dabu.

¹¹ Dogu soa hagamogomogo, koe gi dee ago ange i hegau baubau nei, aagai koe ago ange i de mee danuaa. Tangada e haia tanuaa se dama donu nii de Maadua, aagai tangada e haia de baubau tigi gidee donu e ia de Maadua.

¹² Demetrius se daane e tala hagadanuaa i daho dangada alodahi, gai de mee abodonu e tala hagadanuaa hogi ono dagodo. Gimaadeu e tala hagadonu hogi ono dagodo, gai goodou e iloo bolo gimaadeu e tala de muna abodonu.

Hagaboo hagaodi

¹³ E lagolago ange donu agu mee e lodo e sisi adu gi de goe, gai au e dee lodo e sisi i de biini ma ink.

¹⁴ Au e tali bolo e moolau naa donu taau hegide, gai gidaau ga madaangudu ai i taau hedae.

¹⁵ De baba gi dagodo i oo daha. Oo soa i kinei e gaavadu hogi delaadeu hagaboo. Dagu hagaboo ange gi ogu soa alodahi.