2 John 1 - De Beebaa Dabu

De hagaboo

¹ Mai i daho tagi hagadubu. Ange gi de hine hagadubu gu hilia laa ma ana dama, go dangada oogu e aloha ai i de muna abodonu — gai e dee go au donu huu, aagai go gilaadeu alodahi e iloo de mee abodonu —

² i hiidinga o de mee abodonu gu dagodo laa i odaadeu lodo, gai e dagodo naa donu ga hano ai.

³ De abodonu ma tegi aama de baba gi dagodo i odaadeu daha, mai i daho de Maadua Tamana aama Iesu Klisdo, Tama Daane a Tamana i de muna abodonu ma de aloha.

De mee abodonu ma de aloha

⁴ Au gu malangilangi mmao i dagu gidee bolo hanu au dama e daudali i de muna abodonu, bei de hai a Tamana gu tala mai ai gi gidaadeu.

⁵ De hine hagadubu, iainei gai au e dangidangi adu gi de goe, gidaadeu ga hagadau aaloha. Agu mee e sisi adu nei e dee ni muna hoou, aagai ni muna donu gu lava i taadeu iloo mai i taamada.

⁶ Gai deenei tagodo o de aloha, go taadeu daudali i ana muna gu tala mai. Gai deenei dana muna gu tala mai, bei doodou hai ne langona ai laa mai i taamada age: goodou seesee i de aloha.

⁷ Go hiidinga gu soa gilaadeu e daahangadia dangada gu hulo saele i henua i lalo, gilaadeu e dee llodo e tala bolo Iesu Klisdo gu humai ma gu hai gi se dangada. Tangada bee nei se dangada e daahangadia dangada gai se hagadaumee niio Klisdo.

⁸ Goodou dagidiiloo gi dee dilia e goodou mee oodou gu hagaduu ngae ma gu hai hegau ange aagena, aagai goodou gi maua i de kave doodou hagaoanga alodahi.

⁹ Tangada e hai ga dubu ange aama tee daudali i agoago a Klisdo, de Maadua e dee noho donu i ono daha. Tangada e daudali i agoago nei, gai Tamana ma Tama Daane e nnoho donu i ono daha.

¹⁰ Noo dahi dangada gu hanadu gi oodou daha, gai ia e dee agoago bei dagodo agoago nei, aagai goodou gi dee abodonu ange gi de ia i oodou hale, aabe gi hagaboo ange gi de ia,

¹¹ go hiidinga tangada e hagaboo ange gi de ia e hagabuni ange donu gi ana hegau baubau.

Muna hagaodi

¹² E lagolago ange donu agu muna e lodo e sisi adu gi goodou, gai au e dee lodo e sisi adu mee nei i denga dalaa beebaa ma ink. Aagai au e tali bolo au e hanadu naa donu gi oodou daha ga hedae ai gidaadeu, gi honu danuaa ai taadeu malangilangi.

¹³ Dama a doodou daina hahine gu hilia laa e gaavadu delaadeu hagaboo gi de goe.