2 Corinthians 2 - De Beebaa Dabu

¹ Gai au gu soe donu dagu maanadu bolo au e dee hanadu gi oodou daha e hagalodo baubau ai goodou.

² Noo au gu hagadaemaha goodou, gai goai ange naa e haia gi malangilangi au, e dee go goodou aagu gu hagadaemaha naa!

³ Au ne sisi adu agu muna i mua, gi dee daemaha ai ogu lodo i goodou, de masavaa oogu e dae adu ai, gai go goodou donu e hagamalangilangi ina ogu lodo. Gai au e dahi donu agu tali adu gi goodou alodahi, bolo au e malangilangi naa donu madali goodou.

⁴ Au ne sisi adu gi goodou i dogu masavaa ne hagaduasala ai ma tee baba ogu lodo aama de dangi mmao. Au tee sisi adu e hagadaemaha ai goodou, gai au ne hai gi iloo ai e goodou dogu aloha mmao i goodou.

De degi ange gi tangada gu haisala

⁵ Noo dahi dangada gu hagadaemaha lodo o dahi, gai ia tee hagadaemaha ogu lodo, gai tagodo donu, ia ne hagadaemaha oodou lodo alodahi — au e dee lodo e tala gi kii ange de baubau dagodo o de mee nei.

⁶ Gai tangada bee nei, gu lava donu i de hagaduasala i daho dangada soa,

⁷ deenei ai, goodou degi ange gi de ia ma de hagaaneane ina ono lodo, gi dee kona ai dono daemaha.

⁸ Deenei ai, au e dangidangi adu, goodou aahe ange aaloha i de ia.

⁹ Gai deenei dagu hiidinga ne sisi adu ai nei, e hagatale ange ai oodou dagodo gi iloo ai be goodou e daudali i mee alodahi.

¹⁰ Gai be goai oodou e degi ange aagena, gai au e degi ange hogi gi de ia. Gai mee aagu gu degi ange ai gi dahi dangada — noo e hanu donu ogu mee e degi ange ai — gai au ne hai i oodou hiidinga i mada luu mada o Klisdo,

¹¹ gi dee kii ai Satan i gidaadeu; gai gidaadeu e iloo dagodo o ana hagatau baubau e hai.

Tee baba lodo o Paul i dono dae gi Troas

¹² Dogu masavaa ne hano ai ga agoago de longo danuaa o Klisdo i Troas, gai e dee galemu donu Tagi Maolunga gu gaamai gi de au dahi masavaa danuaa,

¹³ gai ogu lodo e dee baba i hiidinga au tee gidee dogu daina go Titus i kilaa. Gai au ne hano gee mai i daho dangada i kilaa ga hano gi Macedonia.

De kii i lodo o Klisdo

¹⁴ Aagai gi hagaahea ange de abodonu gi de Maadua e dagina laa gidaadeu i masavaa alodahi i lodo o Klisdo, bei dagodo o dangada gu kii laa, gai gidaadeu ga kave saele ai de namu kala o taadeu iloo ia i mommee alodahi.

¹⁵ Gai gidaadeu go de nnamu kala o Klisdo ange gi de Maadua, i magavaa o dangada e hagamouli aama gilaadeu e maakau;

¹⁶ ange gi dahi gidaadeu go nnamu o de magau ange gi de magau, aagai ange gi tangada ange laa gidaadeu go de nnamu o de mouli ange gi de mouli. Gai goai donu e bau ange gi mee nei?

¹⁷ Gai gimaadeu e dee bei dagodo o dangada soa, e haia laa muna a de Maadua bei goloa e hagao laa gi daha gi lagolago ai olaadeu mee. Aagai gimaadeu e hai hegau i de muna abodonu, i demaadeu agoago i mada luu mada o de Maadua, i lodo o Klisdo, bei de hai a de Maadua gu hagadabu ai gimaadeu.