2 Corinthians 10 - De Beebaa DabuDe tala hagadonu a Paul dana duuhanga hegau 1 Go au donu go Paul, au e dangidangi adu gi goodou i de lodo e daudonu ma de lodo maolalo o Klisdo — au se dangada e dee muu i de masavaa odaadeu e hegide ai, gai e lo taane i de basa i de masavaa oogu e dee noho ai i oodou daha! — 2 au e dangidangi adu goodou gi dee haia gi hagaagona adu e au dogu lo taane ma dogu lodo mmahi i de masavaa oogu e dae adu ai gi oodou daha, go hiidinga au e maua donu gi lo taane i de hai baasi ange gi gilaadeu e hagataba laa bolo gimaadeu e hai hegau bei lodo o henua i lalo. 3 Gai ga mouli naa donu gidaadeu i henua i lalo nei, aagai gidaadeu e dee hebagi bei dagodo de hebagi o henua i lalo. 4 Gai odaadeu goloa hebagi e dee ni mee niio henua i lalo, aagai go ssauaa o de Maadua e oha ai laa denga buibui makaga o de hagadaumee. 5 Gimaadeu e daa denga maanadu hagamaolunga alodahi e hai baasi ange laa gi de iloo de Maadua, ma de noonooa denga maanadu alodahi ga hai gi hagallongo ange gi Klisdo, 6 gai gimaadeu gu paba ange e hagaduasala denga dee hagallongo i muna alodahi, i de masavaa e honu danuaa ai doodou hagallongo i muna. 7 Goodou e kalo ange donu ma e tilo mee e gide i ganomada. Noo dahi dangada e iloo too donu bolo ia nii Klisdo, gai ia gi hagamaanadu bolo gimaadeu nii Klisdo hogi, bei ono dagodo. 8 Gai gu kii ange donu dagu tala tuhi mmahi a Tagi Maolunga gu gaamai e hai ai gi hagadagadaga age goodou, e dee se mee e oha ai goodou, gai au e dee dogaa donu. 9 Au e dee lodo goodou gi hagataba bolo au e lodo e hagamaatagu goodou i agu leda. 10 Go hiidinga gilaadeu e hagataba, “Muna i lodo ana leda e daemaha ma de mmahi, gai de masavaa oona i odaadeu daha ai gai ia se dangada baageaa, gai ana muna e deai ono haigamaiana.” 11 Daalaa ange gi tonu ange de gau bee naa bolo amaadeu muna e sisi adu i lodo leda i de masavaa omaadeu e dee maaleva ai, go muna mau donu hogi amaadeu e tala adu i de masavaa omaadeu e nnoho ai i oodou daha. 12 Gai gimaadeu e dee llodo e hai gimaadeu gi bei aabe e hagahedae ange gimaadeu gi gilaadeu e duuhia laa donu huu gilaadeu. Gilaadeu e hagadau haide ma de hagahedae olaadeu dagodo i olaadeu magavaa, gilaadeu ni dangada donu dee tonu. 13 Gai gimaadeu e dee tuhi donu gimaadeu gi dubu ange i de mee e heohi, aagai gimaadeu e daohi de ngaadonga a de Maadua gu vvae mai gi gimaadeu, gai e bei ai hogi amaadeu hegau i oodou magavaa. 14 Gai gimaadeu tee hulo donu laa honga demaadeu duuhanga, e dagodo be gimaadeu tee tae adu gi oodou daha. Gai go gimaadeu i mua ne loadu ga gaavadu de longo danuaa o Klisdo gi goodou. 15 Gai gimaadeu e dee tuhi gimaadeu i hegau a hanu dangada gee, aagai gimaadeu e tali hagalodolodo bolo de masavaa naa huu e hagadagadaga age ai oodou kai, gai amaadeu hegau gu hai i oodou magavaa gu kii ange de somo ga laumalie, 16 gi maua ai hogi e gimaadeu i de agoago de longo danuaa i denga henua laa daha doodou henua, gai gi dee gaavee ai e gimaadeu de tuhi i hiidinga hegau a hanu dangada gu hai i mommee ange laa. 17 “Aagai tangada e duuhia laa dahi mee, gi duuhia donu huu Tagi Maolunga.” 18 Go hiidinga e dee go tangada e duuhia laa donu huu ia e hagaheohi, aagai go tangada a Tagi Maolunga e tuhi laa. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.