1 Timothy 3 - De Beebaa Dabu

Dagi o de nohoanga dabu

¹ Muna nei ni muna abodonu: noo dahi dangada e lodo ia gi se dagi i de nohoanga dabu, gai ia e lodo i dahi hegau danuaa.

² Tangada e dagi i de nohoanga dabu, gi deai ono mee e hagabaubau ina ai; gai gi dahi donu huu ono bodu, ia gi dee unu gi senga, ia gi maua i de golomagi ono lodo, gai gi se dangada e hagadubu i daho dangada, ma de abodonu ange gi dangada i dono hale, gai ia gi maua i de agoago;

³ ia gi dee lodo e unu gi senga, ia gi dee alasala aagai gi daudonu, ia gi dee lodo e hagadaumee, ma tee nnoo ange gi sseene.

⁴ Ia gi maua i de dagi gi danuaa dono huaabodu donu, ma de tilo ana dama gi hagallongo ange gi de ia i de hagadubu,

⁵ (Noo tangada e dee maua i de dagi dono huaabodu donu, aagai dee hee ai dana hai e dagi ai de nohoanga dabu o de Maadua?)

⁶ Tagi gi dee se dangada se goodo dahuli ono lodo, ana vakaa ga hagasoenga hagamaolunga ia, gai ia gu duu ange hogi gi de hagaduasala o de ia hagabaubau ne doo ange laa aagena.

⁷ Ia gi se dangada hogi e hagadubulia i daho de gau tua de mee, gi dee hagadogaa ina ai ia, gai ia gu doo ange gi lo te sele a de ia hagabaubau laa.

Dangada e heohi de hai ai denga deacon

⁸ Gai e bei hogi denga deacon, gilaadeu gi ni dangada e hagadubu i daho dangada, gilaadeu gi dee hadu muna, ma tee llodo e unu uvaini lagolago, gai gi dee nnoo hagamau mee.

⁹ Gilaadeu gi daohia dagodo o de gai nogo dee iloo laa i tagi o de lodo e gilimalali.

¹⁰ Gai hagataalea ange olaadeu dagodo i mua; gai noo e deai olaadeu mee e hagabaubau ina ai, gai gilaadeu gu maua i de hai hegau a denga deacon.

¹¹ E bei ai hogi, olaadeu bodu gi ni haahine e hagadubu i daho dangada, gilaadeu gi dee llodo e hai samu, gai gi dee llodo e unu gi ssenga, gai gi hai hegau i de muna abodonu i mee alodahi.

¹² Gai taane se deacon gi dahi donu huu ono bodu, ia gi maua i de dagi gi danuaa ana dama ma dono huaabodu alodahi.

¹³ Gai denga deacon e hai hegau danuaa laa e hagadubu i daho dangada, gilaadeu e lo taane i de tala dagodo o olaadeu kai i lodo o Klisdo Iesu.

Dagodo o de mee abodonu

¹⁴ Au e sisi adu de leda nei gi de goe iainei, gai au e tali bolo au gu dai dae adu naa donu gi oo daha.

¹⁵ Gai noo au gu mmule adu, gai koe gu iloo doo hai e hai hegau ange ai gi dangada i lo te huaabodu o de Maadua, go de nohoanga dabu o de Maadua e mouli laa, gai go tuludulu ma tagelo o de mee abodonu.

¹⁶ Gai gu iloo abodonu, bolo de hai daumaha dabu nogo dee iloo laa, e maolunga mmao. Ia ne humai ga hai gi se dangada, gai de Hagasaalunga ⌊Dabu⌋ ne tala hagadonu ono dagodo, de gau de langi ne gidee ia, gai gu tala ono dagodo i magavaa o denga Gentile, ne hagadonusia e dangada i henua i lalo alodahi, gai ia ne gaavage i de mahamaha.