1 Peter 3 - De Beebaa Dabu

Denga haahine ma daane dau bodu

¹ E bei ai hogi, denga haahine dau bodu, goodou hagadubu ina oodou bodu. Gai noo hanu gilaadeu tigi hagadonusia muna a de Maadua, gai gilaadeu e gaavee naa olaadeu lodo i hiidinga dahulinga danuaa a olaadeu bodu, e dee go alaadeu muna e tala,

² i de masavaa alaadeu e gidee ai oodou hegau gilimalali ma de hagadubu.

³ Oodou mee e hagamahamaha gi dee go mee e gidee e dangada, bei de bini oodou biho, ma de dau mee e hai i goolo, ma de kahu i malo danuaa;

⁴ aagai goodou hagamahamaha ina goodou i mee i de lodo e dee gidee laa, go mee e dee maua gi pobo, bei de daudonu ma tee muu i de lodo maolalo; aanei mee e hagamogomogo i daho de Maadua.

⁵ Gai deenei de hai a denga haahine dabu e tali hagalodolodo ange ai gi de Maadua ne hagamahamaha ai gilaadeu; gilaadeu ne hagallongo ange gi olaadeu bodu,

⁶ bei de hai a Sarah ne hagallongo ange ai laa gi Abraham, ga hagahi ange tangada aamua gi de ia. Gai goodou ni dama niiana, noo goodou e hai hegau i de mee heohi gai e deai donu se mee oodou e maatagu ai.

⁷ Gai e bei hogi, goodou denga daane dau bodu, goodou gi tonu ange gi doodou hai e nnoho ai madali oodou bodu, ma de hagadubu de hine e baageaa ange laa i taane, go hiidinga gilaadeu ni dangada hogi e bolo ange aagena de mouli e dee ngado mai, gi deai ai se mee e buibuia oodou dalodalo.

De hagaduasala i hiidinga o de heohi

⁸ Aanei agu muna hagaodi: goodou alodahi gi buni i de lodo daudahi, ma de hagadau abodonu, ma de hagadau aaloha o denga daina, ma de llodo aaloha ma de llodo maolalo.

⁹ Goodou gi dee hagao ina ange de baubau i de baubau, be go muna baubau i muna baubau. Aagai gi hagao ina ange de baubau i hagamanuuia, go hiidinga deenei doodou mee ne hagahi ange aagena, gi maua ai e goodou de manuuia.

¹⁰ Go hiidinga “Tangada e lodo gi mouli ia, ma de gidee denga laangi danuaa, gai ia gi daohia dono alelo i de baubau, gai doo ngudu gi dee daalaa hanu muna hhadu.

¹¹ Ia gi hano gee i de baubau gai gi haia tanuaa; gai ia gi hagaduu ngae gi saalaa de nnoho paba.

¹² Go hiidinga Tagi Maolunga e daumada gilaadeu e heohi, gai luoono dalinga e hagallongo alaadeu dalodalo; aagai luu mada o Tagi Maolunga e hai baasi ange gi dangada e haia de baubau.”

¹³ Gai e dahi naa dangada e hagammae ina goe, noo koe e lodo e hai tanuaa?

¹⁴ Aagai e dee galemu naa donu noo goodou gu hagaduasala i doodou hai de mee heohi, gai goodou gu manuuia. Goodou gi dee maatagu i gilaadeu aabe gi manavasaa oodou lodo.

¹⁵ Aagai goodou haia Klisdo go Tagi Maolunga i oodou lodo. Gai goodou gi paba i masavaa alodahi, e tala ange gi dangada alodahi, e siilia adu gi goodou dagodo o de tali hagalodolodo i oodou lodo naa. Aagai haia de mee nei i de daudonu ma de hagadubu,

¹⁶ gai goodou haia gi gilimalali tagi i oodou lodo, gi dookaa ai gilaadeu e hagabaubau ina oodou hegau danuaa i lodo o Klisdo, i delaadeu hagabaubau goodou.

¹⁷ Gai e danuaa ange, noo goodou e hagaduasala i doodou hai tanuaa, noo go lodo o de Maadua, i doodou hagaduasala i doodou hai de baubau.

¹⁸ Gai Klisdo ne hagaduasala hogi i hiidinga o denga haisala i e dahi donu huu hanonga, de ia heohi ne hagaduasala i hiidinga o de gau baubau, gai ia ga dagi ange ai gidaadeu gi de Maadua. Ia ne daa ga magau i de angaanga nei, aagai ne mouli age i de Hagasaalunga;

¹⁹ gai go de Hagasaalunga nei oona ne hano ai ga agoago ange gi denga hagasaalunga, goi nnoho laa i lo te hale pono,

²⁰ go gilaadeu tee daudali laa i muna a de Maadua madagidagi, i de masavaa a de Maadua ne golomagi ai ono lodo ga tali ange gilaadeu i laangi o Noah, i de masavaa a Noah ne hagaduu ai de vaga hale. Gai ne sogoisi donu huu dangada i lo te vaga laa, se dogovalu alodahi gilaadeu ne ola mai i lodo vai laa.

²¹ Gai de babudaisi e hagadagodo ange gi de mee nei, go de babudaisi e hagamouli ai laa goodou iainei — e dee go de aau gi deai gelegele i odaadeu angaanga, aagai go de dangidangi ange gi de Maadua gi hagagilimalali ina tagi o de lodo, i hiidinga de mouli age o Iesu Klisdo,

²² de ia gu hanage laa gi de langi ma e noho i de baasi madau o de Maadua — gai de gau de langi, ma gilaadeu e sauaa, ma gilaadeu e mmahi gu nnoho i lalo dono sauaa.