1 Corinthians 4 - De Beebaa Dabu

De gau tala abodonu a Klisdo

¹ Gai tangada gi iloo de mee nei, gimaau ni dangada hai hegau niio Klisdo, gai ni dangada gu dugu ange aagena mee a de Maadua e dee iloo laa.

² E dahi ange mee, tangada e diiloo ange mee a dono dangada aamua, e hai gi se dangada e hai hegau i de mee abodonu.

³ Aagai se mee donu e dee dau i ogu daha noo goodou aabe go dahi mommee hagamodu muna gu hagamodu ogu muna, gai au e dee hagamodu donu ogu muna.

⁴ Tagi i ogu lodo e dee hagabaubau au, aagai au e dee hagadaba bolo au e dee haisala. Gai go Tagi Maolunga e hagamodu ina ogu dagodo.

⁵ Deelaa ai, goodou gi dee hagamodu ina dahi mee i mua de humai o Tagi Maolunga, go de ia e hagaagona mai mee alodahi e hagammuni laa i lo te gohu, ma de hagaago mai maanadu alodahi i de lodo. Gai de Maadua ga tuhi ai dahi ma dahi.

⁶ Denga daina, au ne hagadagodo ange de mee nei gi omaau dagodo ma Apollos gi tonu ange ai goodou, gai goodou ga agoago ai i omaau dagodo, gi dee hulo ai goodou laa honga mee gu sisi, gai gi dee duuhia ai e goodou dahi dangada, gai ga hai baasi ange gi tangada ange laa.

⁷ Gai goai ne haia goodou gi dagodo gee ma tangada ange laa? Gai ni aha i oodou daha e dee ni mee ne ngadi gaavadu gi goodou? Gai noo ni mee ne ngadi gaavadu, gai gu aha goodou gu pasa hagassoenga ai naa, e dagodo be e dee ni mee ne ngadi gaavadu gi goodou?

⁸ Goodou gu kave donu mee alodahi oodou e llodo ai! Gai goodou gu ni dangada donu e lava! Gimaadeu e dee ni hodooligi, gai goodou ni hodooligi donu! Mee naa goodou gi ni hodooligi abodonu, gi maua ai hogi e gimaadeu i de hodooligi madali goodou!

⁹ Gai e dagodo be de Maadua gu dugu gimaadeu, de gau tala, gi de hagaodi hugadoo, bei dagodo o dangada gu hagamodu e daa gi maakau i madamada o dangada alodahi; de gau henua i lalo ma de gau de langi aama dangada alodahi.

¹⁰ Gimaadeu gu bei de gau llodo ssenga i hiidinga o Klisdo, aagai goodou gu ni dangada heiangi i lodo o Klisdo. Gimaadeu e baageaa, aagai goodou e mmahi. Goodou e hagadubulia, aagai gimaadeu e dee hagadubulia.

¹¹ Iainei donu gai gimaadeu e hiikai ma de hieunu, gimaadeu e deai omaadeu malo, gai e hagailiilia ma teai semaadeu mommee e nnoho ai.

¹² Gimaadeu e hai hegau kona i omaadeu lima. De masavaa a dangada e hagamalaia ai gimaadeu, gai gimaadeu e hagamanuuia gilaadeu; de masavaa omaadeu e vaivai haia ai, gai gimaadeu e llodo mmahi;

¹³ de masavaa omaadeu e hagabaubau ina ai, gai gimaadeu e dangidangi i de lodo maolalo. Gimaadeu gu bei dagodo o mee e kino ai dangada, gai gu bei dagodo o denga gainga i henua i lalo, ga dae mai ai gi de masavaa nei.

¹⁴ Au tee sisi adu mee nei e hagadookaa ai goodou, aagai ne sisi e bale adu ai goodou i hiidinga goodou ni dama hagamogomogo niiagu.

¹⁵ Gai ga soa naa donu dangada e agoago ina adu goodou i lodo o Klisdo, gai e dahi donu huu oodou damana. Go au doodou damana i lodo o Klisdo Iesu i hiidinga o de longo danuaa.

¹⁶ Deenei ai, au e dangidangi adu goodou gi ago mai i de au.

¹⁷ Aanei hiidinga aagu ne hai ai naa Timothy gi hanadu gi oodou daha, ia se dama hagamogomogo gai e hai hegau i de mee abodonu i lodo o Tagi Maolunga. Gai ia ga hagamaanadu adu ai gi goodou dagodo o dogu mouli i lodo o Klisdo, bei dagu hai ne agoago ai laa mee nei i denga nohoanga dabu i mommee alodahi.

¹⁸ Hanu i goodou e hagamaolunga, gilaadeu e maanadu bolo au gu dee hanadu gi oodou daha.

¹⁹ Aagai au gu dai hanadu naa donu, noo e dugua mai i daho Tagi Maolunga. Gai au ga tilo ai be dee hee maa de hagamaolunga ma de mmahi o de gau naa.

²⁰ Go hiidinga de nohoanga hodooligi o de Maadua e dee ni muna donu huu e tala, aagai go ssauaa mmahi.

²¹ Gai dee hee doodou mee e llodo ai? Go dogu hanadu ma de laagau haaele, aabe go dogu hanadu i de aloha ma de daudonu?