Salmos 33 - Chuj San Sebastian Bible

SALMO 33 Alj wach' paxti 'a Jehová

¹ Ex wit 'anmal to wach' e nab'en, alc wach' paxti 'a Jehová. Yujto a eb' tojl sb'eyb'al, caw tzalj eb' sb'itnan b'it.

² ¡Alc wach' paxti 'a Jehová yet' arpa! B'itnejec sb'i yet' salterio.

³ B'itnejec yet' 'ac' b'it, wach' tzeyutj eya'n 'och sjajl b'it yet' e yamc'ab' yic b'it cha,

⁴ yujto a spaxti Jehová caw yel. A smasnil tas tzb'o'o, a tzch'oxn 'el swach'il.

⁵ A Dios tzchamc'ojlej tas wach' yet' tas tojol, tzch'oxn 'el schamc'ojlal 'a smasnil yolyib'n̈q'uinl tic.

⁶ Yujn̈ej spaxti', 'ix b'o satcha'an̈ yet' smasnil tas 'ay 'a 'a, cojn to 'ix yala, 'ix b'o smasnil.

⁷ A tz'a'n syam sb'a a a', yet' pax a mar to xab' yich.

⁸ 'Ay cab' yel'ch Jehová 'a sat smasnil tas 'ay 'a sat lum lu'um, yet' e masnil ex cajn 'a yolyib'n̈q'uinl tic, 'ay cab' pax yel'ch 'a e sat.

⁹ Yujto a 'ix paxtini, yuj cha, 'ix b'o 'el'ch smasnil tas. A pax 'ix alni, yuj cha, xcheclj chan̈ smasnil tas.

¹⁰ A tztenn juwc smasnil tas tzlaj cob' sna eb' 'anma sb'o', atn eb' man̈ schon̈b'oc.

¹¹ A tas tzna Jehová to tzb'o', jun 'ejmn̈ej to wach' tz'ajcni.

¹² Caw wach' yic junc nacion̈ to a Jehová 'aych sDiosaloc, a si'jnac can 'och yico'oc.

¹³ A 'a satcha'an̈ ata q'ueln 'emt Jehová, c'uxn tzyil 'emt smasnil 'anma'.

¹⁴ Ata tzon̈ yil 'emt qui masnil an̈ cajn on̈c 'a sat lum lum tic.

¹⁵ A b'ojnac qui nab'en qui masnil, tzmaclni pax yil smasnil tas tzlaj qui b'o'.

¹⁶ May junc rey tzcolchji, yujn̈ej to niwn sb'isl soldado. 'Ixta pax eb' caw 'ay yip, ma'oj techjoc scoln sb'a eb' yuj yip cha.

¹⁷ A no chej matz tac' ca'nec 'och no yipc qui c'ojol yic tzca'n ganar owal. Wach'xam caw 'ay yip no', palta matz tac' on̈ scolnec no', yic matz on̈ chamec.

¹⁸ Palta ax Jehová q'uelnn̈ej 'och 'a eb' yiclum yet' 'a eb' to 'ay schamc'ojlal 'a 'a. A 'aych yipc sc'ojl eb',

¹⁹ sec tzcolx 'el eb' 'a yol sc'ab' chaml yu'uj. Tzya'n pax tas tzc'ux eb' 'a yic stiempoal 'ay wejel.

²⁰ An̈ec tic, a Jehová a 'aych yipc qui c'ojol, a tzon̈ colnec, tzon̈ stan̈wni paxi.

²¹ Yu'uj caw tzon̈ tzaljec, yujto xca'ch yipc qui c'ojol, yujto Cojxni.

²² Mamin Jehová 'ayc'n̈ej cab' a chamc'ojlal quet' on̈, yujto tzach ca'ch yipc qui c'ojl on̈.