Gl 3 - Chuj San Sebastian Bible

Matz tac' ca'nec 'och*r* ley yic Moisés yipc qui c'ojol

¹ Ax xo wal ex 'aj Galacia, caw man̈ nab'enal eyaji. Tecn 'ay junc x'a'n juwc 'el e nab'en 'icha tzyac' junc 'ajchum. Yuj cha, man̈x yiclumoc tzeyutj e b'a 'a jun cuynb'il yel. A yic quec' ta 'on̈, caw caljnac 'ayx on̈, chajtlto xcham Jesucristo 'a spenc culus. 'Icha wal to caw eyiljnac schami.

² Octom tzeyal 'ayin, ¿tom e chajnac Yespíritu Dios, yuj eyiclni ley yic Moisés? Ma'ay, a 'a yic eya'n 'och e c'ojl 'a jun wach' 'ab'x alb'il 'ayex, ata chab'il eyu'uj.

³ ¿Tom yel man̈ nab'enal eyaji? A yic ex 'och creyenteal, atn Yespíritu Dios 'ochnc eyet'oc. Al ticnec, ¿tom tze nib'j mun tzeyac' tz'acwc e colnb'il yuj jun tzo'n̈ tas tzlaj e b'o'?

⁴ Til wal syal eyab'jnac yuj Cristo, palta 'ijn wal nab'an̈ej. Comnoc wal man̈ nab'an̈ejoc eyab'jnac syail.

⁵ A Dios ya'jnac Yespíritu 'ayn̈ec. Sch'oxn pax jun tzo'n̈ milagro 'a qui calec. Palta ¿tasm yuj tze na'a? Man̈ yujoc qui yiclni ley yic Moisés, palta yuj ca'nec 'och qui c'ojl 'a jun wach' 'ab'x alb'il 'ayn̈ec.

⁶ A Abraham, ya'jnac 'och sc'ojl 'a Dios, yujn̈ej cha, 'ochnc wach'l 'a sat.

⁷ Yuj cha, nachj cab' 'el eyu'uj, a mach tzya'ch sc'ojl 'a Dios, atn eb' caw yel yin̈tl can Abraham cha.

⁸ 'Aycto, yaln can 'a Ch'an̈ U'un̈, chajtlto ax man̈ ex israeloc, 'ayx 'oj eyoch wach'l 'a sat Dios, yujn̈ej to tzeya'ch e c'ojl 'a 'a. Yictax pecti', alb'il can wach' 'ab'x 'a Abraham, yic yalx 'a 'ixtic: O'oj, ax wa'n yaxilal 'a yib'n̈ smasnil 'anma 'a yolyib'n̈q'uinl tic, xchi Dios.

⁹ Yuj cha, toto tzca'c 'och qui c'ojl 'a Dios, lajn tzcutjec qui chan syaxilal 'icha schajnac Abraham cha, yujto ya'jnac 'och 'a sc'ojol.

¹⁰ A eb' tzya'ch yipc sc'ojl syiclni ley yic Moisés, 'ay cot yowl sc'ojl Dios 'a yib'n̈ eb'. Yujto tzyal 'ixtc 'a Ch'an̈ U'un̈: Tzann̈j mach matz yiclnin̈ej smasnil tas tz'ib'b'il can 'a ley, 'ay cot yowl sc'ojl Dios 'a yib'n̈ eb', xchi.

¹¹ Palta chequel to may junc mach wach' 'a sat Dios, yujn̈ej to tzyiclj jun ley cha. Yujto tzyal pax 'ixtc 'a Ch'an̈ U'un̈: Palta ax eb' tojl snab'en, pitznn̈ej eb' yujto tzin ya'ch eb' 'a sc'ojol, xchi Dios, xchi.

¹² Ax jun ley cha, toxn may tas tzyala, toto yowlal tzca'c 'och qui c'ojl 'a Dios. Palta tzyal 'ixtic: A mach 'oj yiclnoc, 'oj 'ajxoc sq'uinl yu'uj, xchi.

¹³ 'Ay cot ton yowl sc'ojl Dios 'a quib'n̈ec yuj jun ley cha, palta a Cristo on̈ colnec 'el 'a yol sc'ab' yowl sc'ojl cha. Yujto schajnac 'och yowl sc'ojl Dios 'a yib'n̈ qui jeloc. Yujto tzyal 'ixtc 'a Ch'an̈ U'un̈: A junc 'anma tzq'uet'un̈n 'a spenc te', 'ay ton cot yowl sc'ojl Dios 'a yib'an̈, xchi.

¹⁴ 'Ixta x'aj Cristo Jesús, sec yu'uj, ax ya'n Dios syaxilal 'ayx man̈ ex israeloc, 'icha yutjnac ya'n 'a Abraham pecti'. An̈jtona', yuj Cristo chab'il Yespíritu Dios cujec qui masnil, 'icha yutjnac ya'n can sti'.

A ley yet' 'aj ya'jnac Dios sti'

¹⁵ Ex wu'tac, ex wanab', tzin nib'j tzwalb't 'ayx yuj jun qui b'eyb'al an̈ 'anman̈ tic. A yic tzqui b'on qui trato yet' junc 'anma', tz'ib'n cani, tzca'n can 'ejm qui c'ab'. Yuj cha, may junc mach tztac' sjuni, may pax mach tztac' ya'n 'och jac xo xicul.

¹⁶ Ax Dios, ya'jnac can sti 'a Abraham yet' 'a yin̈til. Ma'ix yal 'a Ch'an̈ U'un̈: A jun tzo'n̈ eb' en̈til, man̈ xchioc. Yujto man̈ niwnoc eb' yin̈tl 'aj xyala. Palta xyal 'ixtic: A en̈til, xchi. Yujto jun wal yin̈tl Abraham chi 'aj xyala, atn Cristo.

¹⁷ Atn jun tic tzin nib'j tzwalb't 'ayex, to a Dios, ya'jnac strato yet' Abraham, sch'oxjnac to yowlal 'oj 'el'choc. Lajwnacx 430 ab'il ya'n can jun strato cha, yic yajx jun ley yic Moisés. Palta matz juw xon jun trato chi yuj jun ley cha. A jun tas alb'il can yuj Dios, yic ya'n sti', ma'ix 'ec' yuj jun ley cha.

¹⁸ Q'uinloc yuj jun ley cha, tzyac' Dios qui colnb'ilec ticnec. Toto 'ixta', man̈ yujoc to ya'jnac can Dios sti', tzya'n qui colnb'ilec cha. Palta ya'jnac can Dios sti 'a Abraham, chajtlto 'oj yac' jun chi 'a nab'an̈ej.

¹⁹ Palta ¿tas yopiso jun ley chi tze na'a? 'Ac'b'il jun ley cha, sec tzcheclj 'el smul junjn 'anma'. 'Ayn̈j yopiso jun ley cha, masnto jawnac jun yin̈tl Abraham, atn jun 'aj ya'jnac can Dios sti'. Ax eb' ángel aljnac jun ley chi 'a Moisés, yujto a ya'jnac sb'a yuj eb' 'anma 'a Dios.

²⁰ A 'aj 'ay junc mach tzyac' sb'a yuj junc xo mach, yowlal 'ay chawn̈oc yanma'il. Palta a Dios junn̈ej, may junc xo mach 'ay yaln yic yet' 'a 'aj ya'jnac can sti'.

A yopiso ley yic Moisés

²¹ Palta a ley yic Moisés, matz 'och 'ajc'ojlal 'a jun tzo'n̈ tas yaljnac can Dios, yic ya'n sti 'ayn̈ec. Q'uinloc 'ac'b'il junc ley 'aj tztac' qui chan qui q'uinlec 'a jun 'ejmn̈ej, toto 'ixta', tzyal am Dios to wach'n̈ec 'a sat, yujn̈ej tzqui yicljec jun ley cha.

²² Palta tzyal 'a Ch'an̈ U'un̈, chajtlto smasnil 'anma', 'ayc' eb' 'a yol sc'ab' maysch'olnil. 'Ixta tzyala, sec wach', an̈ec xo tzca'c 'och qui c'ojl 'a Jesucristo, tzqui chajec jun yaljnac can Dios, yic ya'n sti'. Yujn̈ej to tzca'c 'och 'a qui c'ojol, tzqui chanec.

²³ A 'a yic mantzac jaw jun mach 'aj tzca'c 'och qui c'ojol, 'ayn̈ect 'ec' 'a yol sc'ab' jun ley cha. 'Icha to yamb'iln̈ec yu'uj, masnto xcheclj 'el jun 'aj tzca'c 'och qui c'ojl cha.

²⁴ Yujto a jun ley cha, yopiso on̈ ya'nec cuenta, masnto xjaw Cristo. A ticnec, wach'n̈ec 'a sat Dios, yujto ata tzca'c 'och qui c'ojol.

²⁵ Man̈x on̈ 'ayc 'ec' 'a yol sc'ab' jun 'a'jnacn̈ec cuenta cha, yujto 'ayx 'och qui c'ojlec 'a Cristo ticnec.

²⁶ Yujto tzca'c 'och 'a qui c'ojol, yuj cha, yunnaln̈ec xo Dios, junxn̈ej cajc yet' Cristo Jesús qui masnil.

²⁷ A yic tzon̈ 'ajxec bautisar, junxn̈ej tzon̈ 'ajc yet' Cristo. Jantcn̈ej on̈ tzon̈ 'ajx bautisar, 'icha to tzqui pichlej Cristo.

²⁸ Man̈x 'a yel'chi, toto israel on̈, mto griego on̈. Wach'xam 'ayn̈ 'och mosoal to man̈ quico'oc qui b'a, wach'xam mun quic qui b'a, toxn̈ej winac, toxn̈ej 'ix, may yel'chi, yujto junxn̈ej cajc qui masnil yet' Cristo. 'Icha to junxn̈ej 'anmal cajc qui masnil.

²⁹ Yujto yic on̈c xo Cristo, yuj cha, yin̈tl on̈ec xo Abraham yet'oc. Ax jun tas yaljnac can Dios yic ya'n sti', 'oj qui chac quico'oc.