Dt 4 - Chuj San Sebastian Bible

Xyac' Moisés snab'enoc eb' israel

¹ 'Ix yaln pax Moisés 'ixtc 'a eb' yit israelal cha: A ticnec ex wit chon̈ab', chajec eyab' jun tzo'n̈ ley yet' jun tzo'n̈ checnb'il tzwac' 'ayx tic, sec 'oj e b'eylb'oc, ax eyiclni yic 'oj e c'och cajn 'a sat lum lum 'oj yac' Jehová 'ayex, atn qui Diosalec yet' eb' qui mam quichmec.

² Man̈ eya'ch stz'acb' jun tzo'n̈ paxti tic, matz tac' pax eyi'n 'el jab'oc. Yowlal 'oj eyiclc jun tzo'n̈ schecnb'il Jehová qui Diosalec, 'icha wal tzwutj waln 'ayx tic.

³ 'In xeyila tas 'ix yutj Jehová eb' xyac' 'ejm sb'a 'a comon dios tzcuch Baal 'aj Peor, q'ueln ex wal 'ochi yic 'ix satl eb' yu'uj.

⁴ Ax xo pax to te'n xeyutj e b'a 'a Jehová qui Diosalec, 'in pitzn ex ticnec.

⁵ 'Ix wac' e cuy jun tzo'n̈ ley yet' checnb'il 'ix yac' Jehová wal 'ayex, sec 'oj e b'eylb'oc 'a sat lum lum 'oj e cha eyico'oc.

⁶ Yicljec, tze b'eylb'an jun tzo'n̈ checnb'il tic; yu'uj 'ay e jelnal, 'ay pax e nab'en 'a sat jun tzo'n̈ xo chon̈ab'. A yic 'oj yab'nc eb' eyab'xil, ax yaln eb' 'ixtic: Caw jelan, caw 'ay snab'en jun nacion̈al eb' 'anma tic, 'oj schic eb' eyu'uj.

⁷ May junc xo niwquil nacion̈ to 'ayc' sdiosal yet' 'icha wal ya'jc Jehová qui Diosalec 'a qui calc tic. A yic tzqui c'annec junc tas 'a 'a, tzyac' 'ayn̈ec.

⁸ ¿Tom 'ay junc xo nacion̈ to 'ay sley mto 'ay schecnb'il tojl yalx 'icha jun wan waln can 'ayx tic?

⁹ Yuj cha, caw wal tzeyil e b'a, man̈ eyac' sat e c'ojl 'a tas xeyil tic. Man̈ eyi'l e nab'en 'a jun tzo'n̈ ley tic, ya' sb'a pitznex. A eyico', to tzeyalcn yab' eb' eyunnal yet' eb' eyiechiquin.

Paxtinac Dios 'a jolm witz Sinaí

¹⁰ Nac cot jun c'u yic 'ayn̈ec 'ec' 'a yojltac Jehová qui Diosalec 'a lum yich witz Sinaí. Ata 'ix yal Jehová 'ayn 'ixtic: Yamb'tzej eb' 'anma tic, yujto 'oj wac' yojcoc 'el eb' in paxti'. Ax scuyn sb'a eb' yoch 'emmquilal 'ayin, sec 'ay wel'ch 'a sat eb' yic pitzn eb' 'a sat lum lum 'oj wac' 'a cha, ax scuyn can eb' yunnal, xchi.

¹¹ A yic 'ayn̈ec 'ec' 'a yich lum witz cha, quiljnaquec wal sq'ue n̈iln̈noc sc'a'l lu'um, 'ix q'uic'b' 'och stab'l lum 'a satcha'an̈.

¹² Axta 'ix paxtin 'elt Jehová 'ayn̈ec 'a scal jun c'ac' cha. 'Ix cab'c spaxtini, xcab'nec yol sjaj, palta ma'ix quilc xon jab'oc.

¹³ Ata 'ix yac' Jehová cojcoc 'el strato, atn jun lajn̈e checnb'il. 'Ix stz'ib'j 'och 'a chapachn̈ q'uen q'ue'en. 'Ix yalni to yowlal tzqui b'eylb'ejec.

¹⁴ 'Ix yaln 'ayn ta', to tzex in cuy 'a sley yet' 'a schecnb'il, sec 'oj e b'eylb'oc 'a sat lum lum 'oj eyico'oc 'a sc'axpil 'ec' a Jordán cha.

Cuynb'il sec matz 'och 'emmquilal*r* 'a junc yechel

¹⁵ A yic xpaxtin 'elt Jehová 'a scal c'ac' 'a 'ayn̈ec 'a lum witz Sinaí, a 'a jun c'u cha, ma'ix eyila.

¹⁶ Tzeyil wal e b'a, man̈ eyixtc 'el e b'a yic tze b'on junc yechl e diosaloc. Man̈ e b'o yechl junc winac mto junc 'ix.

¹⁷ Man̈ e b'o yechl junc no noc', mto junc no ch'ic.

¹⁸ Man̈ e b'o pax yechl junc no noc' tzjucsb'a 'a sat lu'um, mto junc no chay 'ay 'a yojl a a'.

¹⁹ A yic tzex q'ue q'ueln 'a satcha'an̈, tzeyiln q'ue c'u, 'uj, c'anal yet' smasnil tas 'ay 'a satchan̈ cha, xeya't wal somchjoc e nab'en yic tzeyaln e b'a 'a jun tzo'n̈ cha, yujto a Jehová qui Diosalec, a b'ojnac jun tzo'n̈ cha, sec tz'och swach'loc smasnil chon̈b' 'ay 'a sat lum lum tic.

²⁰ Palta an̈ec tic, a Jehová on̈ 'i'nec 'elt 'a jun lugar 'icha jorna 'aj tz'ulb'x q'uen q'ue'en. A jun cha, atn Egipto. On̈ yijec 'elta sec tzon̈ 'och schon̈b'oc, 'icha ton cajc ticnec.

²¹ 'Ix cot yowl Jehová 'ayn eyu'uj, 'ix yalni to man̈x 'oj in c'axw 'ec' 'a a Jordán, man̈x 'oj in c'och 'a sat lum lum 'oj yac' eyico'oc cha.

²² Wach'xam a 'a jun lugar tic 'oj in chamcni, man̈x 'oj in c'axw 'ec' 'a a Jordán cha. Palta ax xo tic, yowlal 'oj e c'axw 'ec' 'a a', 'oj 'at e caj lum lum man̈x jantcoc swach'l cha.

²³ Tzeyil wal e b'a, man̈ eyac' sat e c'ojl 'a strato Jehová qui Diosalec b'ob'il yuj quet'ec. Man̈ e comn b'oc yechl tzann̈j tas tzalx 'och diosal, yujto 'ay yowlal yuj Jehová.

²⁴ A Jehová Dios, caw wal ow 'a junc mach tzyac' 'ejm sb'a 'a junc yechel. A yowl sc'ojl cha, lajn wal 'icha junc c'ac' tz'a smasnil tas yu'uj.

²⁵ A yic 'ayx eyunnal, mto eyiechicn 'a sat lum lum 'aj 'oj e c'och cajn cha, 'ayt laj ex xeya'ch e b'a man̈ nab'enal, tze b'on junc yechl junc tas e diosaloc. Toto 'ixta tzeyutej, caw tz'och e mul 'a Jehová Dios, tzeyi'n cot yowl sc'ojl 'a eyib'an̈.

²⁶ Tic wal tzwa'cn 'och satcha'an̈ yet' sat lum tic testigoal. Toto 'ixta 'oj eyutoc, yajn̈ej ax e satl 'a sat lum lum chi 'oj e caj 'a sc'axpil 'ec' a Jordán cha. Man̈ niwnoc tiempo 'oj e caj lu'um, yajn̈ej ax e satx 'eli.

²⁷ A Jehová 'oj e sactzicn can 'at 'a scal jun tzo'n̈ xo nacion̈, jaywn̈xoj ex 'oj e can ta'.

²⁸ Ata 'oj eyac' servil comn dios b'ob'il yuj 'anma', atn jun tzo'n̈ yechl b'ob'il yet' te te', mto yet' q'uen q'ue'en. A jun tzo'n̈ cha, matz yila, matz yab'i, matz wa'i, matz su'lej.

²⁹ Palta toto a yic 'ayx 'ec' ta', ax snan sb'a e c'ojol, ax e c'ann scolwal Jehová qui Diosalec yet' smasnil e c'ojol mto yet' smasnil e nab'en, 'oj colwjoc ton 'ayex.

³⁰ A yic tox 'ix 'ec' jun tzo'n̈ cusc'ojlal chi 'a eyib'an̈, ax 'a slajub, 'oj e meltzj pax 'a Jehová qui Diosalec, 'oj eyoch yiclumal 'a 'a.

³¹ Yujto a Jehová qui Diosalec, caw wach' snab'en. Ma'oj ex yactc can e ch'ocoj, ma'oj ex satl e masnil. Ma'oj sat sc'ojl 'a strato sb'ojnac yet' eb' qui mam quichmec, caw 'oj 'el'choc tas yaljnac cha.

³² Nac cot jun tzo'n̈ tiempo 'e'nc xo can 'a yic pecti', yictax sb'on Dios eb' 'anma 'a yolyib'n̈q'uinl tic. 'Ixquec, 'at c'anb'jec 'ec' 'a smasnil lugar, toto 'ay 'aj ujnac xo, mto 'ay 'aj tz'ab'x yalx junc tas niwn yel'ch 'icha jun wan yuj 'a qui calc tic.

³³ ¿'Ayx am wal junc chon̈b' tox xyab' spaxtin 'elt Dios 'a scal c'ac', 'icha wal xcab'c spaxtini, palta ma'on̈ chamec?

³⁴ ¿Tom 'ay junc xo dios, tox x'i'n 'elt junc schon̈b' 'a scal junc xo chon̈ab' 'icha wal on̈ yutj Jehová on̈ yi'nec 'elt 'a Egipto? Til wal tas ujnac ta'. Eyiljnac milagro, xiwc'ojlal, owal. Yet' wal sjelnal on̈ yi'nec 'elt 'a Egipto cha.

³⁵ 'Ix sch'ox quil jun tzo'n cha, sec tzcojquejec 'eli to may junc xo Dios, palta cojn ton Jehová.

³⁶ A 'a satcha'an̈, ata 'ix paxtin 'emta yic on̈ scuyni. Ax 'a sat lum tic, c'ac' 'ix sch'ox quila'. 'Ix cab' spaxtin 'elt 'a scal jun c'ac' cha.

³⁷ A eb' qui mam quichmec 'a pecti', caw chamc'ojlb'il eb' yu'uj. Yuj cha, on̈ si'nec 'elt an̈ec yin̈tl on̈ec eb' tic, on̈ scolnec pax 'elt 'a Egipto yet' spoder.

³⁸ 'Ix yij 'el jun tzo'n̈ nacion̈ 'a cojltaquec, jun tzo'n̈ caw 'ec'b'al to sjelnal 'a quib'n̈ec. Palta an̈ xo tzqui maccn slum eb' tic quico'oc, 'icha ton wan yuj tic.

³⁹ Yuj cha, can cab' 'a e nab'en to cojn Jehová Dios, sDiosal satcha'an̈ yet' 'a sat lum tic, may junc xo.

⁴⁰ Yicljec jun tzo'n̈ sley tic, yet' schecnb'il wan waln can eyab' 'a jun c'u tic, sec wach' 'oj 'aj yec' tiempo eyu'uj, yet' pax yuj eb' eyin̈tl b'aq'uin̈. Najtl 'oj e caj lum lum chi 'oj yac' Jehová eyico'oc chi 'a smasnil tiempo, xchi Moisés.

A jun tzo'n̈ chon̈b'*r* 'aj tzcol sb'a eb' milm 'anma'

⁴¹ 'Ix si'n 'el Moisés 'oxe chon̈b' 'a sla'nil sti a Jordán cha, atn lum 'ay 'a stojlal 'aj tzq'uel c'u,

⁴² sec toto 'ay junc mach tzmil junc yit 'anma'il, toto man̈ sc'anc sc'ojl tzmil junc cha, may pax yowl yet'oc. A jun tzmilwj cha, tztac' tz'at scol sb'a 'a junc eb' chon̈b' cha, sec tzcolchji.

⁴³ A jun tzo'n̈ chon̈b' cha, atn eb' tic: chon̈b' Beser, 'a span̈nil lum cusltac lum 'a 'aj xcan eb' yin̈tl Rubén; chon̈b' Ramot, 'a yol yic Galaad, 'a lum 'aj xcan eb' yin̈tl Gad; yet' pax chon̈b' Golán, 'a yol yic Basán, 'a lum 'aj xcan spacl eb' yin̈tl Manasés.

Tzyalx cot Moisés jun tzo'n̈ checnb'il

^44-48 'Elnctax eb' israel a Egipto, ax yic 'ayc' eb' 'a stojlal 'aj tzq'uel c'u 'a sc'axpil a Jordán 'a sla'nil chon̈b' Bet-peor, ata xya' Moisés jun tzo'n̈ checnb'il yet' cuynb'il tic 'a eb'. A jun lugar 'aj 'ay scamplamento eb' yic can win Sihón 'aj Hesbon, palta 'ix 'em win yuj Moisés yet' eb' israel. 'Ix 'em pax win Og 'aj Basán yuj eb'. 'Ix yica'an eb' slum eb' cha. A eb' chawn̈ rey tic ya'jnac eb' yajlil 'a lum lum 'ay 'a stojlal 'aj tzq'uel c'u 'a a Jordán. Tzcotn̈j lum 'a chon̈b' Aroer 'ay 'a span̈nil sti a Arnón, masnto tzc'och 'a jolm witz Sirión, an̈jtona Hermón sb'i lum witz chi yuj eb'.

⁴⁹ A smacb'en eb', atn smasnil lum pan̈n 'ay 'a sti a Jordán 'a stojlal 'aj tzq'uel c'u, masnto tzc'och lum 'a a Mar Muerto, atn a 'ay 'a yich lum witz tzcuch Pisgá.