Biblia Todo Logo
Bib sou entènèt

- Piblisite -

2 Co 3 - Chuj San Sebastian Bible


A yab'xil jun yac' trato Dios

1 A yic tzcaln 'at jun tzo'n̈ tic 'ayx on̈, ¿tom tze na'a, to ton̈j tzcalb't qui b'a wach'l 'ayx jun 'ejm xo on̈? Man̈ yowlalc tzca't jun tzo'n̈ carta tic 'ayx on̈, yic tzyalni tas copiso on̈, 'icha tzyutj sb'a jun tzo'n̈ xo eb'. An̈jtona', man̈ yowlalc tzqui c'an cot e carta on̈, tzeyaln coti, toto 'ay copiso 'a e sat on̈.

2 Yujto caw ax wan e ch'oxn 'eli, to 'ay copiso on̈. Lajn e b'eyb'al 'icha junc carta tz'ib'b'il 'och 'a e pixan, yujto tztac' yiln eb' 'anma smasnil, tas eyaji.

3 'Icha junc carta tz'ib'b'il can yuj Cristo, an̈ xo quijnac 'at on̈, 'ixta ex. A jun 'icha carta tic, man̈oc yet' tinta tz'ib'b'il cani, palta a Yespíritu Dios pitzan, a tz'ib'jnac. Man̈oc 'a junc q'uen 'icha un̈ 'aj tz'ib'b'il cani, palta a 'a e pixan, ata tz'ib'b'il cani.

4 'Ixta tzcutj qui nan on̈, yujto yuj Cristo tzca'n 'och Dios yipc qui c'ojl on̈.

5 Man̈toc tzqui na 'on̈, to mun tztac' cuj qui ch'ocj on̈. Palta yujn̈ej to 'aych Dios quet' on̈, tztac' junc tas cuj on̈.

6 A 'a'jnac copiso ya'malc servil on̈, tzcaln 'el yab'xil jun yac' trato on̈. A jun strato tic, man̈ yujoc qui yiclni junc tas tz'ib'b'il cani, tz'el'chi. Palta yujn̈ej Yespíritu tz'el'chi. A jun ley tz'ib'b'il cani, yopiso ya'n 'och chaml 'a quib'n̈ec. Palta ax Yespíritu Dios, yopiso ya'n qui q'uinlec 'a jun 'ejmn̈ej.

7 A ley yic Moisés, tz'ib'b'il can 'a jun tzo'n̈ q'uen 'icha u'un̈. A yic yajx cani, til wal stzictznil Dios 'ayc' 'a jun lugar cha. Ax eb' israel, ma'ix stac' yoch q'ueln eb' 'a sat Moisés, yujto caw tzictzni paxi. Palta a jun stzictznil cha, c'ojnc'ojnil sati. Wach'xam yopiso jun ley chi ya'n 'och chaml 'a quib'n̈ec, 'a yic sjawi, caw niwn yel'chi. Toto 'ixta 'ajnc 'el'ch jun ley chi sjawi,

8 ¿jantc tom wal yel'ch jun 'ab'x tzyij cot Yespíritu Dios 'ayn̈ec?

9 A jun ley cha, wach'xam tzya'ch chaml 'a yib'n̈ eb' 'anma', niwn yel'chi yic sjawi. Ocxom wal jun 'ab'x tzalni, to wach'n̈ec 'a sat Dios.

10 Wach'xam 'ay yel'ch jun ley cha, palta man̈x 'a yel'ch 'a sat junx tic, yujto yel xo wal niwn yel'ch jun tic.

11 Toto niwn yel'ch jun 'e'lb'a 'e'nc cha, ocxom wal jun 'ayc' 'a jun 'ejmn̈ej tic.

12 Yujto tzca'c 'och jun tic yipc qui c'ojol, yuj cha, caw matz on̈ xiwc caln 'eli.

13 Man̈ lajnoc tzcutjec qui b'a 'icha ya'jnac Moisés. A jun cha, spotjnac 'och jun nip 'a sat, sec ma'ix yil eb' stup stzictznil sat cha. Yujto a jun stzictznil cha, c'ojnc'ojnil sati.

14 Palta ax eb' cha, ma'ix nachj 'el yuj eb', tas chi xalx 'a eb', yujto pit eb'. An̈jtona ticnec, a yic tz'awtx jun 'ichm trato 'a eb' israel, matz nachj 'el yuj eb'. Yujto 'icha wal a jun nip chi potn 'och 'a sat eb', 'ixta yaj 'a eb'. A wal jun 'icha nip cha, matz 'eli, palta yujn̈ej Cristo tztac' yeli.

15 An̈jtona ticnec, a yic tzyab'n eb' yawtx jun tzo'n̈ ch'an̈ libro yic Moisés, 'icha to an̈ja potn 'och jun nip chi 'a sat eb', yujto matz ya'ch eb' 'a sc'ojol.

16 Palta a yic tzon̈ sutmjec ca'n 'och qui c'ojl 'a Cajlil, tz'ijx 'el jun 'icha nip chi 'a qui satec.

17 A Cajlilec, Espíritun̈ej. A mach 'aych Yespíritu Cajlilec 'a 'a, mun yic sb'a yet'oc.

18 Yuj cha, man̈x 'ayc 'och jun 'icha nip chi 'a qui satc qui masnil. A ticnec, lajn on̈c 'icha junc nen 'aj tzquil qui sat, yujto cujec, tzcheclj 'el swach'l Cajlil. Yuj cha, wan slajnb'i qui nab'enec 'icha Cristo, yujto wan xo stz'acw qui wach'lec 'icha swach'il. 'Ixta wan on̈ yutnec Cajlil, atn Yespíritu Dios.

Biblia Chuj San Sebastian © Sociedades Bíblicas Unidas, 1999.

Bible Society in Guatemala
Swiv nou:



Piblisite