ZEPHANIAH 2 - Cho Bible Common Language 2016

Ng’yuu ne Phyawn nak

¹ Kä ng’aa ciah changpakhui gui, nami mät ng’cet tu shüm vä.

² Khawkhi naw kou ah mäih ah kä aning yon pha gui ung, mei ah däi ciah Bawipa ah m’lungshe nak nami khan ah kä a gawk law pha ung, Am’lungshe nak ah hnüüp kä a gawk law pha ung nami mät ng’ceet tu vä.

³ Am lung neim ciah khaw chang gui ah ng’thu läk ciah chang avan Bawipa ah ng’hlat law vä. Düng ci bi ne Bawipa ah ma ah nami m’lung neim sak vä. Bawipa ah am lungshe nak ah khaw hnüüp ung nami phyawn nak vai om ei hman khai nei.

Israel Khaw Ng’veing Pakhui gui ah Ng’yiin nak

⁴ Kaza gawnu cu a u naw kä om na ba khai, Ashakelon cu khaw chawng ah kyak khai, Ashdod ung chang gui cu hnüüp m’cawt ung k’täm gui khai, Ekron ung chang gui phi ami mang gaw ungka k’täm gui khai.

⁵ Tuikem ah om ciah Philistin gui, nangmi cu nami ng’yiin ci. Bawipa naw ning m’kyuk gui ci. Ani naw ning m’di gui yawp khai, a u phi kä nami k’pawih ba khai.

⁶ Tuikem yung ah nami khaw cu khaw k’häu ah kya ne, htawshäm gui ah htaw cham, htaw phung ah kyak khai.

⁷ Pawih ba ciah Judah chang gui naw nami khaw cu khäm khai gui. Acun ung ami htaw shäm u ne, Ashkelon khaw im gui ung ip khai gui. Bawipa ami Khanpughi naw om püi gui ne bämang ba sak gui khai.

⁸ A hlüngtai säih Bawipa naw, “Moah la Ammon chang gui naw ka chang gui cu päipih shedam na u ne, ami khaw phi gut gui hlük ciah ka ng’yak ci.

⁹ Kei cu akcang ah ghing ciah Bawipa, Israel ah Khanpughi ah ka kyak ci, Moab la Ammon cu Sodom la Komorrah ah mäih ah kei naw ka m’di khai ah ka k’bäi ci. Ngami cu m’shi tui ah li nak, angtäi sei shekat nak la ng’hling ah phung nak ah kyak khai gui. Pawih ba cih ka chang gui naw ngami cu näng gui ne ami khaw phi khäm khai gui.”

¹⁰ Moab la Ammon chang gui cu chang k’awm ne, m’ghämce u ne, A hlüngtai säih Bawipa ah chang gui cu päipih u ne ami kyak ah phäh ah m’kyuk nak gah khai gui.

¹¹ Ngami cu Bawipa naw kyih sak gui khai, ani naw khomdek khanpughi gui cu akholä ah kyak sak gui khai. Chang pakhui pang naw ami mät ah khaw phäh phäh ung Khanpughi cu khawihnah khai gui.

¹² Bawipa naw Sudan chang gui phi m’sih gui khai.

¹³ Bawipa naw a huham cu mang ne Assiria cu m’di khai. Ani naw Nineveh mang gaw phi khaw she ne tui maih khai ah cik khai.

¹⁴ Cun ah hmun cu htawme gui, sei gui, khisa gui pang naw ng’baw nak khai gui. Pängpät kha gui cu a shet nak ung om u ne, khashe gui cu m’kawt ung m’lau khai gui. Cachit gui phi hlaak ung kai lawk khai gui. Im ami cawh nak ah k’peen gui phi hoce khai gui.

¹⁵ Shin cu amät ah huham awn khähghah ne, phyawn pyi nei cine, ngai ciah mang gaw ah khan ah kya lawk khai ah amawng gui ah kyak ci. A chang gui naw ami mang gaw cu khomdek khan ung dämduh pikbäih ciah ngai ci gui. A i hawkcha ah shiu ciah hmun ah kya lawk khai aw? Pya masa gui ah lum nak ah hmun ah kya lawk khai nei! Sunpah ciah chang pang naw kyih ne hteh tak khai gui nei.