ZEPHANIAH 1 - Cho Bible Common Language 2016

¹ Shin ah ng’thu cu Khanpughi naw Zephaniah am a pek ah kyak ci. Cun yah ung Amon ah hta Josiah cu Judah ghangpughang ah kyak ci. Zephaniah cu Amariah, Kedaliah, la Kushi gui ungka ghangpughang Hezekiah ah ng’shon ah kyak ci.

Khanpughi ah Ng’thumcha nak hnüüp

² Bawipa naw, “Khomdek khan ung hang om ci avan cu ka m’di khai nei,

³ chang gui, khisa gui, kha gui, nga gui avan, akshe gui avan ah di nak vai ka law püi khai. Chang pakhui avan ka m’di khai, a u kä k’pawih ba khai. Kei, Bawipa naw ka pyen ci nei.

⁴ “Jerusalem ung chang gui la Judah avan ung chang gui phi ka m’kyuk gui khai. Ak hnu ah Baala khawihnah ci gui ka m’di gui khai, acun ung bii bik ciah khaw taigü gui cu a u naw kä shüm ba gui khai.

⁵ Im khan ah kai ne khohni ni, cha ni, aisi ni khawihnah ci gui phi ka m’di gui khai. Kei na khawihnah ne bekhüt pang te ne phi, Milak khanpughi ah ming la ba cicu ka m’di khai.

⁶ Kei ungka ng’hlat ne kä na läk ba ci gui la kä law ba ne, kä na ng’yoi thäh law ba ci gui phi, ka m’di gui khai.”

⁷ Bawipa naw am khoicha nak vai ah hnüüp cu ng’et lawk ci nei. Cun ah kyasei ama ah kawp yawp vä. Bawipa naw ghutha nak vai ah a chang gui pawng püi ne, Judah gui tu gui khai ah ga gui khü gui ci.

⁸ Bawipa naw, “Cun ah ngawn sheh hnüüp ung bawi gui, ghangpughang ah hta gui la chang khui hei ah thungyo läk ci gui cu ka m’kyuk gui khai.

⁹ Khawshe khawihnah ci gui, m’gu ne, ngawn ne ami bawi ah im khawh be sak ci gui phi ka m’shet gui khai.

¹⁰ Bawipa naw, “Cun ah hnüüp ung Jerusalem ah nga ah m’kawt ung kyah ah k’aw gui cu nami ng’yak khai. Mawng gaw k’thai lam ah ng’hmum ci la khomhtung ah kai ne ng’güüt ciah k’aw cu nami ng’yak khai.

¹¹ Kyah m’lau ah k’aw gui cu nami mang gaw ah akhodou täng ah om ci naw nami ng’yak khai, a i ah kyasei ci ung sumlei ci gui ami van cu si yawp khai nei.

¹² “Cun yah ung kei naw meikdäi kawt ne Jerusalem cu ka shü khai. Ami mätah hmawk bäng ah ng’ä u ne, ‘Khanpughi naw a i kä na pek ci, a i ah kä na cik khai’ cik ci gui cu ka m’shet gui khai.

¹³ Ami khawh phi maih yawp khai, ami im phi di yawp khai. Ngami cu ami cawh ah im ung kä om ba khai gui, ami geit ah sapyit ah a tui phi kä aw ba khai gui.”

¹⁴ Bawipa ah küikyang ciah hnüüp ng’et lawk ci, ng’et lawk cang ci, gawk law ge ci! Cun ah hnüüp cu khak ciah hnüüp ah kya ne, nget ciah gakap phi kyap ne yai khai gui!

¹⁵ Cun ah hnüüp cu m’lung ah shet nak, yaica nak, cümbawng nak, di nak, maih nak, amü nak, ang yiin nak, meile ah küp nak,

¹⁶ ng’tuk nak phyungheng tum k’aw be ne, gakap gui naw mang küi ami tuk nak la tänghän hlüng ami plawh nak ah k’aw gui ng’shan khai.

¹⁷ Bawipa naw, “Kei naw natnak yuh chah law ngäsei, chang avan cu amik m’dauh ah mäih ah kyak khai gui. Ngami naw kei nah nu na ne ami kat ah phäh ah ami si cu tui ah mäih ah ng’chawt ne, ami pum cu khomdek khan ah ng’gäh ne ng’yaih khai.”

¹⁸ Cun ah Bawipa ah m’lungshe nak hnüüp ung chang gui ah ghui ngui gui phi kä phyawng khai, khomdek avan cu Bawipa ah m’lungshe nak ah mei naw ui yawp khai. Ani naw khaw khüt sak khai — ang ghit ah khüt sak khai, khomdek khan ah om ciah chang nü ah khaw cu khüt sak khai.