ZEKHARIAH 7 - Cho Bible Common Language 2016

Kä ng’düng ciah Ei Hlawi nak cu Bawipa naw M’kyuk ci

¹ Darius ghangpughang ah a kyak nak akum phli nak, a cha kaw nak (kislev cha), a hnüüp phli hnüüp ung Bawipa naw ng’thu na pek ci.

² Bethela chang gui naw Sharezer la Regemmelek la ami chang gui cu M’gäi ciah Bawipa ah Taigüim ah tüi goi ne Bawipa ah hriham ah hmawk ah taigü sak goi ci gui;

³ taigü gui la prophet gui am phi shin cu ng’shi sak goi ci gui “Cau tün ne bi man ah mäih ah a cha hma nak ung ei hlawi ne, Taigüim adi ah phäh ah mi thüisei lä khai ang?”

⁴ Shin cu Bawipa ungka kei ah gawk lawk ciah ng’thu ah kyak ci.

⁵ Ani naw, “Mi khaw ung chang gui la taigü gui cu m’thein gui ä, shin ah khawkum chihkip ah kyong ung, a cha hma nak la a cha chih nak ung ei hlawi ne, thüikyap ne ami taigü cu kei ami na m’taam ah kä kyak ci nei.

⁶ Cun kawn ah ami ei la ami awk cu ami mät ah phü ge ah kyak ci nei.”

⁷ Shin cu om law htük ciah prophet gui ung Bawipa naw ng’thu a pyen ah kyak ci. Cun cu Jerusalem a bämang yah ung, chang gui ami kümbe yah la chang gui akda cu Mang gaw pei ah gawnu gui bäng ah kä kya ne, a htum lam la akhei lam khaw ng’nawi ung ami om yah ung ah kyak ci.

Ng’thu Kä ami Läk ah Phu ah Ami Dawng nak

⁸ Bawipa naw shin ah ng’thu cu Zekhariah am pek ci:

⁹ “Cau pui shin ah ng’thumkhän cu chang gui am ka pe gui ci: ‘Nangmi naw taga nak bi pyi cu nami hmuh vai nei, Tumat la tumat ng’khawt gei nak la chimgein nak cu nami m’dang vai.

¹⁰ Hmeinu hmeihta gui, a khawhei chang nami ng’lung ah om tuk ci gui la dukhaih ci gui cu kä nami shedam nak vai. Tumat la tumat ak she ah kä nami ng’tüihtok tu vai.’

¹¹ “Cun ung phi ka chang gui naw ma ne ng’thu kä ngai ci gui, ngami naw ami m’lung khai ci gui.

¹² Ami m’sin phi lung ah mäih ah m’liu sak ci gui. A i ah kyasei ci ung cau pui om ciah prophet gui ung ka pek law gui ah m’theithang nak cu ngami naw kä ngai ci gui, kei cu ka m’lungshe lawk ci nei.

¹³ A i ah kyasei ci ung ka ng’thu cu ngami naw kä ngai ci gui, ngami ah taigü phi kei naw kä ka m’shang gui ci.

¹⁴ Pui khaw ah khi ah mäih ah khi ne yon gui ngä sei, a khaw hei ah om ci gui. Shin ah khaw k’ni cu shiu khai ah ami nawng ah kyak ci, a u phi kä om ba ci.”