ZEKHARIAH 4 - Cho Bible Common Language 2016

Ang Mang ung a Hmuh ah Mei-im Ng’düi

¹ Kei na ng’thu püi te ciah khanchang cu law ba mä ne, ip ci m’thawh ah mäih ah kei cu na m’tho neta,

² “A i ang na hmuh?” cine na ng’shik ci. Kei naw, “Ghui awn pyan ah mei-im ng’düi ka hmuk ci nei ka cik ci. A khan bäih ah situi k’am om ci. Mei-im ng’düi khan ah mei-im chih om ci. Cun gui cu mei-ca chih awn ami pyan bäng bäng ah kyak ci.

³ Mei-im ng’düi ah k’eng täng ah olive sing ghing hnih om ci, tumat vangtäng ciah kyak ci.”

⁴ Kei naw khanchang am, “Saya aw, shin gui ah mawng cu a i hawkcha ang?” cine ka ng’shik ci.

⁵ “Kä na hmat ne ma?” cine na ng’shi ba sei, kei naw, “Kä ka hmat ci nei,” ka cik ci.

^10b Khanchang naw kei am, “Mei-im chih cu Bawipa ah a mik chih ah kyak ci, cun naw m’dek khan avan hmuk ci” cine pyen ci.

¹¹ Cun kawn ah kei naw, “Mei-im ng’düi ah vang ah vei ah om ciah olive sing ghing goi ah a mawng cu a i ang? cine ka ng’shi ba ci.

¹² Olive situi ah ng’soi law nak ghui soigaw hnih ah pei ah ka, olive sing ban hnih ah mawng cu a i ang?” cine ka ng’shi ba ci.

¹³ Ani naw, “Kä na hmat ci ma?” cik ci. Kei naw, “Ka, kä ka hmat ci nei, Bawipa,” ka ciba ci.

¹⁴ Cun kawn ah ani naw, “Shin ah angban goi cu chang sing goi ah kyak ci, Khanpughi naw abii bik khai ah a ghü, amdüih, m’dek khan avan ah bawi ah kyak ci.”

Zerubbabela ah Ma ah Khanpughi ah Shaitaak

⁶ Bawipa ungka lawk ciah shin ah ng’thu cu, Zerubbabela am ka pek vai ah khanchang naw na m’thein ci nei. “Nang cu na näng khai, cun cu gakap huham awn ah kä kyak ci, na mät ah thagui awn ah kä kyak ci, kei ah ka mümcha awn ah kyak ci.

⁷ Khomhtung teih ah däm ciah tüihtok nak gui cu nang ah ma ah maih yawp khai. Nang naw Taigüim cu na co ba khai. Nang naw ak hnukbäih ah lung cu a hmun ung na ng’lin yah ung, chang gui m’lau u ne, ‘Kiom ci nei! Kiom ci nei!’ ” cik khai gui.

⁸ Bawipa ungka ahei ng’thu kei ah gawk law ba ci cu;

⁹ “Zerubbabela naw Taigüim lung k’tung cu ng’ling ci nei. Cun ah im cu ani naw m’üp ne co khai nei. Shin gui a kyak awn ah ka chang gui naw hmat khai gui, ngami ah om nak ah ning tüi gui cicu kei ah kyak ci.

^10a Ngami cu kä yei ci gui, a i ah kyasei ci ung bilawh nak api hta bäng a om ah phäh ah kyak ci. Cun ung phi Zerubbabela naw Taigüim k’täi ne a cawh cu hmu u neta, ngami cu yeikyai khai gui nei.”