ZEKHARIAH 11 - Cho Bible Common Language 2016

Uktubawishe gui ah Shum nak

¹ Lebanon, na m’kawt gui cu Hmawng ä, Cun ung na cedar sing ghing gui cu mei naw ui khai.

² M’htai ghing gui m’lau ne ng’pyang vä — Cedar sing ghing gui cu kyu yawp ci gui nei. Bä ciah cun ah sing ghing gui cu di yawp ci gui nei. Hniim ciah bung cu ami chuk vok pyi ah kyasei, Bashan m’shiing ghing gui m’lau ne ng’pyang vä!

³ Uktu gui cu ng’pyang ne kyap ci gui; ami bämang nak cu ng’pyi pyi ci. Phong kawng gui ah m’ngaw cu ngai vä, Jordan lawng yung ah ami hmun khaw cu di pyi ci nei.

Htome k’shäm Hnih

⁴ Bawipa ka Khanpughi naw, “Ami ngawn ge vai ah htome ng’bum gui shäm ciah htoshäm ah mäih ah hnün tho vä.

⁵ Kaa nak ci gui naw ngawn gui u neta, a i naw kä kyuk gui sei hteit ci gui. Ngami naw htome sa cu yoi u neta, ‘Bawipa cu m’tam nei! Keimi kami mang ci nei!’ cik ci gui. Ngami cu ami mät ah htome shäm naw phi kä yei na gui ci.”

⁶ (Bawipa naw, “Kei naw khomdek khan ung a u phi kä ka m’gein ba khai. Kei ka mät naw chang avan cu ami mät uk gui ci gui ah huham ah ka ah ka tha gui khai. Uktu chang gui naw khomdek khan cu m’di m’shum khai gui. Ngami ah huham ah ka ungka kei naw kä ka hun gui khai.”)

⁷ Htome gui hleih ci la yoi ci naw, kei cu na ng’vat sei, kei cu ami ngawn gui vai ah htome gui shäm ciah ka kya lawk ci. Kei naw ng’shopawng hnih ka lak ci: tumat cu “M’htei nak” ah sui ne, tumat cu “Kawng ät nak” ah ka sui ci. Kei naw htome gui cu ka m’htei ci.

⁸ Kei naw a hei htoshäm thum ah khan ah ka m’hni nak cu ka nawng gui ci, ngami naw na gen ci gui, cha ät ah kyong ung ami van ka k’täm gui ci.

⁹ Cun kawn ah kei naw htome gui am, “Kei cu nangmi ah htoshäm ah kä ka kya ba khai. Sik khai gui cu si u sä, di khai gui cu di u sä, k’pawih ba ci gui cu ami mät ng’ngawn tu u sä” cik ci.

¹⁰ Cun kawn ah kei naw, “M’htei nak” ah ng’shopawng cu la neta, ka cheiuh ci, cun cu changpakhui avan ah khan ah Bawipa ah pek ah thumkhän phyeit nak ah kyak ci.

¹¹ Cun ah kyasei cun ah hnüüp ung thukhän cu phyeit ah kyak ci. Htome hleih ci la yoi ci gui naw kei cu na teng u neta, kei ah bi nak ung Bawipa naw ng’thu pyen ci, cicu hmat ci gui.

¹² Kei naw ngami am, “Nami yum ah a kyak ung ka ng’cheng cu na pe vä, kä nami yum ung gim cang vä” ci ngä sei, ka ng’cheng ah ngui thumkip cu na pek ci gui.

¹³ Bawipa naw kei am, “Taigüim ah m’küm ung gim ä” cik ci. Cun ah kyasei kei naw ngui thumkip cu la neta-ngui akda ka tak ciah ami na ngaih ah mäih ah — Taigüim m’küm ung ka gim ci.

¹⁴ Cun kawn ah Judah la Israel ah kawng ät nak, ka plawh nak ah ak hnih nak ah, “Kawng ät nak ah” ng’shopawng cu ka cheiuh ci.

¹⁵ Cun kawn ah Bawipa naw kei am, “Htomeshäm akshe aw, hnün tho ba ä, tuhbäi ng’cheng kä na gah khai.”

¹⁶ Ka htome gui ngäng khai ah htomeshäm tumat cu ka khü ci, cun ung phi ani naw ami ngawn sheh ah htome phi kä m’htei ci, maih ci phi kä shui ci, nat nak om ci phi kä m’tui ci, gai ci phi kä tumbei ci. Cun ung phi plan pi ciah asa cu ei ci, ami khawpaw phi khing ci.

¹⁷ Cun ah akholä ah kyak ciah htome shäm cu, akhaw mü ci nei! Ani naw a htome gui cu nawng gui ci. Ng’tuk nak naw a huham avan cu m’di khai nei. Akut cu shuum khai, akpat lam a mik cu m’dauh khai nei” cik ci.