TITUS 1 - Cho Bible Common Language 2016

¹ Kei Paul, Khanpughi ah changshäm la Jesuh Khrit ah ng’düihpüi naw ca ka gu lawk ci nei. Khanpughi naw a ghü ah chang gui ah yum nak shawihkhem gui vai la mi yum nak ah düng ciah m’theithang nak lam shüm gui vai ah kei cu ghü ne ana tüih ah kyak ci.

² Cun ah yum nak cu angtäi ghin nak ah mawng ngaih u nak ung phung ci. Kä hleeihlak ciah Khanpughi naw cau akhin kä a ng’tüi pha ge ung, angtäi ghin nak cu na pe gui khai ah shai a taak nak om ci.

³ Akhin küm law khätah, cun ah angtäi ghin nak cu, ang thu awn dang law sak ci. Cun ah Thu Ni cu kei am ana ap ah kyasei, mi Hunbawi Khanpughi ah k’bäi nak awn kei naw ka ng’shäu ci nei.

⁴ Kei awn yum nak täng ne ka hta akcang ah kyak ciah Titus am ca ka guk lawk ci nei. Pa Khanpughi la mi Hunbawi Khrit Jesuh naw geinsei nak la dimdeeih nak cu ning pe sä.

Crete ah Titus ah Bilawh

⁵ Kei naw Crete ung ka ning nawng shüt cu, bi vai om ba ci gui avan ang khän khai ah na bi vai la api gaw päng ung khritha k’tahnga gui nam düih vai ah hmawk ah kyak ci. Tuhbäi ka ning m’shüm thein gui cu na shüm vai nei:

⁶ Khritha k’tahnga cu m’kat vai ah kä om ciah chang ah kyak khai, tumat bäng chu nak khai, a hta gui cu yum ciah chang gui ah kyak khai, Om she m’gäi m’cik ci gui, beit kä ng’yak ci gui ah kä kiäen khai.

⁷ Khritha k’tahnga cu Khanpughi ah khuut kutshum ne bik ciah kyasei m’kat vai kä om-en ciah chang ah kyak khai. Ani cu m’ghämce ci, m’lungshe ci, awktat ci, ng’tuk ghüh ci, ngui ng’ya hlü aih ciah kä kia-en khai.

⁸ Ani cu khin m’htei ci, ak ni m’hni ciah chang ah kyak khai. Ani cu htingling ci, düng ci, theingcim ci, pyein ah om ciah chang ah kyak khai.

⁹ Ani cu bä ciah thu, yum nak awn ät ci cu, khäng khai ah kutshum ciah chang ah kyak khai. Cun ung vah ani naw düng ciah m’thei thang nak awn chang hei gui cu m’hläm gui hlawt khai, hnu ng’tuk püi ci gui ah cheishoh nak phi tawk pe hlawt khai.

¹⁰ A i kä ami hmat su ah cun ah thu cu hnu ng’tuk püi ne, chang gui k’fikfaih ciah chang ak da om ci nei, ak tung pi ah Judah yum nak ung ka ng’lat lawk ci gui ung da pi ci.

¹¹ Ngami cu thu kä ami pyein ba vai ah khin lawk ci nei, a i ah kyasei ci ung ngami cu kä m’theithang khin vai m’theithang u ne, kyongkhui gui cu shetkat sak ci gui, lü ng’aa nak vai kyak ciah ngui ng’yak nak hlü awn ami bi ah kyak ci.

^12-13 Cretan chang ami mät ah profet tumat naw, “Cretan chang gui cu angtäi sei hleeihlak ci gui, ngetngawng m’ghämce ci gui, damduh ci gui,” nei cine pyein ci. Cun ah kyasei ak ghaat ah nami m’cäi gui vai, cun ung ami yum nak khänghtek lawk khai.

¹⁴ Cun kawn ah Jew chang gui ah puma la düng nak hnu ng’tuk püi ciah chang gui ah thukhän cu kä ami kutshum men ba vai nei.

¹⁵ Amät ah m’lung kyong theingcim ciah chang ah hmawk ah a i phi avan theingcim ci; cun ung phi amät kä theingcim ne a yum nak kä om ciah chang ah hmawk ah a i phi kä theingcim ci. A i ah kyasei ci ung ngami ah lung kyong la ami ngaih-tüh nak cu kä ah theingcim nak awn ah kyak ci.

¹⁶ Ngami naw Khanpughi kami hmat ci nei ami ci ung phi ami hnün thawh naw maa na gui ci. Ngami cu thüi nak vai kya u ne, thu kä ngai u ne, akni phung api phi, kä bi tu hning ciah chang gui ah kyak ci.