THU PHLAAN 8 - Cho Bible Common Language 2016Apachih Nakah M’hnüt Nak 1 Htomehta naw apachih nak ah mhnüt nak cu khawk ne hmawng khätah, khanmawpi ah shei-ä-kiawm vai ung ding ne kyiip ci. 2 Cun kawn ah Khanpughi ah maa ah ng’düi ci gui ah khankho chang pachih cu ka hmu gui ci. Ngami cu phyungheng pachih ami peit gui ah kyak ci. 3 Cun kawn ah ghui tawnglang kawt ciah, khankho chang a hei cu law ne, sonkiaang ah pei ah ng’düi lawk ci. Ani cu mangkiaang ah maa ah ng’düi ciah ghui sonkiaang ah khan ah Khanpughi ah chang gui naw ami taigü nak vai la m’khih ne ami sonkiaan nak vai ah tui ng’uui akda ami peit ah kyak ci. 4 M’khih ne ami sonkiaan ah ak khu cu, Khanpughi ah maa ah ng’düi ciah khankho chang ah kut ung kaa, Khanpughi ah chang gui awn atäng ah hang kai ci. 5 Cun kawn ah khankho chang naw, tawnglang cu la ne, sonkiaan ung kaa mei cu la ne m’khäp netah, khomdek khan ah yuk chah lawk ci. Acun vai-am khaw ng’thüi ne ng’hmum ne ng’kyeek ne, lailäp ne, shihpi thüng ne kya lawk ci. Phyungheng Tum Gui 6 Cun kawn ah phyungheng chih kawt ciah khankho chang pachih cu, tum ge vai ne pawng ci gui. 7 Ma lawk bäih ciah khankho chang naw ak phyungheng cu tum khätah, si awn ng’caw ciah mei la khawgoh gui cu m’dek khan ah kia lawk ci gui. Khomdek bumthum bum ät, singghing bumthum bum ät ui yawp ne, khu m’kim gui avan chawng yawp khai ah ui ci. 8 Akhnih nak ah khankho chang naw ak phyungheng cu tum khätah, mei ah däi ciah khomhtung nu tuinu ah khan ah yuk chah law ah mäih ah kya law khätah tuinu bumthum bum ät cu si ng’hlui ah ng’lat ci. 9 Tuinu ung om ciah a hnun k’ghing bumthum bum ät cu si yawp u ne, hteinpaw bumthum bum ät cun phi di yawp ci gui. 10 Akthum nak ah khankho chang naw ak phyungheng cu tum khätah, ng’laam ne däi ciah mei m’lei ah mäih ah aisi nu cu khan ah kaa, tuinu bumthum bum ät la tuihta gui ah khan ah kya lawk ci. 11 (Cun ah aisi cu ak kha ming nak ci.) Bumthum bum ät ah tui gui cu tui kha ah ng’lat yawp ci gui. Chang khli cu cun ah tui ak kha cu aw u ne si yawp ci gui. 12 Akphli nak ah khankho chang naw ak phyungheng cu tum khätah, hni ah bumthum bum ät, chaa ah bumthum bum ät, aisi gui ah bumthum bum ät, cu ng’yiin yawp sei, ami dei nak ah bumthum bum ät cu ng’heiu yawp ci. Mü ah bumthum bum ät, hnüüp ah bumthum bum ät ung akdei kä om ba ci. 13 Cun kawn ah kei naw han teng netah, khankho k’häu ung yong ne ng’väi ciah vanbuuk hmu cu ka hmuk ci. Cun ah hmu naw, “A hei khankho chang pathum naw ami tum law vai ah phyungheng thum ah k’aw awn khomdek khan ah om ciah ak ghing gui cu, kyihkyawk nak, kyihkyawk nak, kyihkyawk nak om khai nei” cine pyein sei ka ng’yak ci. |
Cho Bible Common Language © Bible Society of Myanmar, 2016.
Bible Society of Myanmar