THU PHLAAN 7 - Cho Bible Common Language 2016

Israel Chang Sing 144, 000

¹ Cun kawn ah khankho chang paphli cu khomdek khocawi akit phli ung ng’düi u sei ka hmu gui ci. Ngami naw m’dek khan, tuinu ah khan la singghing gui cun phi khawkhi naw kä yon hlawt khai ah k’pang ci gui.

² Cun kawn ah ghing ciah Khanpughi ah mhnüt nak cu law püi ciah khankho chang cu hnilaw lam ah kaa law sei ka hmuk ci. Ani naw m’dek khan la tuinu ung lei ng’hlui thawh sak hning khai ah Khanpughi naw huham a peit ah khankho chang paphli-am,

³ “Khanpughi ah chang gui cu ami m’calai ung kä mhnüt pha gui ah chuih, khomdek, tuinu la singghing gui cu, kä nami yaica sak-en gui cang vai nei” cine m’lau ci gui.

⁴ Cun kawn ah Khanpughi ah mhnüt nak awn ami m’calai ung ami mhnüt gui cu 144, 000 lawk ci, cicu ka ng’yak ci. Ngami cu Israel pakhui gha-lei-goi ungka ah kyak ci gui.

^5-8 Cun ah pakhui gha-lei-goi ah kyak ciah Judah, Reuben, Kad, Asher, Naphtali, Manasseh, Simeon, Levi, Issakha, Zebulum, Josef la Benjamin gui ung kaa, pakhui ät ung täm ät la phia m’ku (12000) ciah am hnüt gui ah kya ci.

Maw Ng’nään Khli ng’Peeih

⁹ Cun kawn ah teng ba netah a u naw kä ak khei yawp hlawt vai ah maw ng’nään khli ng’peeih cu ka hmuk ci. Ngami cu akhui päng, apa päng, a khaw päng, ak chang päng ungka lawk ci gui ah kiak ci. Ngami cu suinu a bawk bäng bäng sui u ne, hliip ah ng’baan kawt sek sek u ne, mangkiaang la Htomehta ah maa ah ng’düi ci gui.

¹⁰ Ngami naw, “Hun nak cu mangkiaang ung gok ciah mi Khanpughi la Htomehta ungka lawk ci nei” cine m’lau ci gui.

¹¹ Khankho chang gui ami van naw, mangkiaang ni, aghaampa gui ni, khiküi paphli ni gui cu, ‘Kium na ne ng’düi ci gui. Cun kawn ah ngami cu mangkiaang ah maa ah kawp u ne, Khanpughi cu khawihnah u netah,

¹² “Amen! Mi Khanpughi cu hlüngtai nak, bämang nak, cüivai nak, yeikyai nak, chang m’sui nak, m’kümtou nak la küikyang nak gui awn, ang shon päng ung kümbe ne om sä, Amen!” cine m’lau ci gui.

¹³ Aghampa gui ungka tumat naw, “Suinu a bawk bäng bäng sui ci gui cu, a u gui ang? A hawi kaa lawk ci gui ang? cine nang shik ci. Kei naw, “Bawipa aw, kei naw kä ka hmat ci nei, nang naw va na hmat ci” cine ka m’shang tuba ci.

¹⁴ Ani naw, “Ngami cu geinvai nak ah dukdeiu nak ungka phiawng lawk ci gui ah kyak ci nei. Ngami cu ami suinu gui avan Htomehta ah si ung bawk khai ah pheet pyi ci gui ah kyak ci.

¹⁵ Cun ah kyasei ngami cu Khanpughi ah mangkiaang ah maa ah ng’düi u ne, amü ak hnüüp pum im kyong ah om ne khawihnah ci gui. Mangkiaang ung ngok ci naw ngami cu ngung gui ne, küikyaan gui ci.

¹⁶ Ei ah cawi nak, tui ah gha nak, hni ah ng’liing nak, mei ah ng’kyeng nak, ngami ah khan ah kä om ba khai.

¹⁷ A i ah kyasei ci ung mangkiaang ah lai ung om ciah Htomehta naw, ngami cu ngung gui ne, ghin nak tui k’gei ah khawng nak ah khah püi gui khai. Khanpughi naw phi ngami ah mik ungka ng’phli tui phung cu ghu pe gui khai” cine pyein ci.