THU PHLAAN 6 - Cho Bible Common Language 2016

Mhnüt Nak Gui

¹ Cun kawn ah Htomehta naw mhnüt nak pachih ungka ak htük bäih cu khawk ne hmawng sei ka hmuk ci. Khiküi paphli ungka tumat naw khaw hmum ah mäih ah ng’shan ciah ak aw awn, “Lawä” a ci cu ka ng’yak ci.

² Kei naw teng netah ng’se bawk tumat cu ka hmuk ci. Cun ah ng’se ung ng’cum cicu li kawt ne lukhu gah ciah kyak ci. Ani cu näng pyi netah näng ba khai ah pawng ci.

³ Htomehta naw ak hnih nak ah mhnüt nak cu khawk ne hmawng khätah, ak hnih nak ah khiküi naw, “Lawä” a cicu ka ng’yak ci.

⁴ Cun kawn ah ng’se asen tumat lut lawk ci. Cun ung cun ci-am chang gui tumat la tumat ngawn nak tu vai ah khomdek khan ung ng’tuk bi nak huham cu ami peit ah kyak ci. Ani-am khim asen lu ät phi ami peit ah kyak ci.

⁵ Htomehta naw ak thum nak ah mhnüt nak cu khawk ne hmawng khätah, ak thum nak ah khiküi naw, “Lawä” a cicu ka ng’yak ci. Kei naw teng netah ng’se ale tumat cu ka hmuk ci. Cun ung ng’cum ci naw khiin nak tumat a kut ung kawt ci.

⁶ Khiküi paphli ah ng’lung ungka lut lawk ciah k’aw tumat cu kei naw ka ng’yak ci. Cun ah k’aw naw, “htang a them cu hnüüp ät ng’cheng nak, püm them thum cu hnüüp ät ng’cheng nak ah kiak ci. Cun ung phi olive sing chaam la sapyit chaam cu kä m’di en vä” cine pyein ci.

⁷ Htomehta naw ak phli nak ah mhnüt nak cu khawk ne hmawng khätah, ak phli nak ah khiküi naw, “Lawä” a cicu ka ng’yak ci.

⁸ Kei naw teng netah, ng’se amvaw tumat cu ka hmuk ci. Cun ung ng’cum ciah ang ming cu sihnak ah kyak ci. Ani ah hnu ah m’htei khaw naw läk lawk ci. Ngami naw khomdek ah khan, k’bum phli ung kaa k’bum ät ung om ci gui cu, ng’tuk nak, khaw ah yaw nak, lei ah sou nak, ng’plouh ah kiun nak, gui awn sihnak vai ah huham cu gah ci gui.

⁹ Htomehta naw ak hma nak ah mhnüt nak cu khawk ne hmawng khätah, Khanpughi ah ng’thu ami ng’shäu ah hmawk la bekhüt ne ami saksi ah hmawk ah ami ngawn gui ah mümcha gui cu, sonkiaang ung om u sei ka hmu gui ci.

¹⁰ Cun ah mümcha gui naw, “Ng’ciim ne, ng’düng ne, hlüngtai pi bäih ciah Bawipa, keimi ami na ngawn gui ah hmawk ah khomdek khan ah chang gui cu kä m’khoichaa, kä m’shetkat gui ah a i güt na om khai ang?” cine m’lau ci gui.

¹¹ Cun gui-am suinu a bawk bäng bäng pe gui netah, ngami ah mäih ah ami ngawn gui vai ah, ami teihpüi gui la ami phäi nau gui, ah ming a khüm güt, a shäng hta ami ng’düm vai ah m’cäi gui ci.

¹² Htomehta naw ak chuk nak ah mhnüt nak cu khawk ne hmawng khätah, khawhni cu, pyon ale ah mäih ah ng’lat ne le ci, chaa phi sisen ah mäih ah ng’lat ne sen ci,

¹³ Khankho ah aisi gui cu khinu ah khawkhi khätah, k’thei ang kang kiawi ne ang phlu ah mäih ah m’dek ung kya lawk ci gui.

¹⁴ Khankho mik cu ca k’chaw ah mäih ah ng’chaw ne maih ci. Mhtung küi la khawgui avan phi ami om nak ungka ng’nawn yawp ci gui.

¹⁵ Cun ah kya khätah, m’dek khan ung ghangpughang gui, uk ciah mang gui, gakaap bawi gui, bühmang ci gui, hlüngtai ci gui, la khleihtein gui, khuimah gui chang avan cu lung khui gui la khomhtung khan lung k’song gui ung ng’thup yawp ci gui.

¹⁶ Ngami naw khomhtung gui la lung k’song gui-am, “Mangkiaang ung ngok ciah mik hmai kä kami hmuh vai la Htomehta ah m’lung k’she nak kä kami gah vai ah, kami khan ah kya law ne keimi cu na thup gui ä!

¹⁷ Ngami ah m’lungshe nak ah khaw hnüüp gawk law pyi ci nei, cun cu a u naw ng’düi ne awt hlawt khai yaw?” cine ng’khü ci gui.