THU PHLAAN 5 - Cho Bible Common Language 2016

Cakchaw la Htomehta

¹ Mang kiaang ung ngok ciah akpat lam a kut ung ca k’chaw cu ka hmuk ci: cun ah ca k’chaw cu vang ah vei ah ca be sei gu ne, m’hnüt nak chih awn m’hnüt ah kyak ci.

² Cun kawn ah hlüngtai säih ciah khankho chang naw, “A u chang naw, shin ah m’hnüt nak gui cu khawk ne, ca k’chaw cu k’phian hning khai ang? cine m’lau sei ka hmuk ci.

³ Cun ung phi khankho la khomdek, khomdek ah kaa avan ung cun ah ca k’chaw k’phian ne teng khai cu a u phi kä om ci.

⁴ Cun ah ca k’chaw cu k’phian khin khai, teng khin khai, a u kä om khätah, kei cu m’lau ne ka kyap ci.

⁵ Cun kawn ah aghaampa gui ungka tumat naw, “Kä kyap ne teng ä, Judah pakhui ungka phongkawng ah mäih ah kyak ciah David ah hta ng’shon cu näng nak gah pyi ci nei, ani naw m’hnüt nak chih cu khawk ne, ca k’chaw cu k’phian hning ci nei,” cine pyein ci.

⁶ Cun kawn ah htomehta cu khiküi paphli la aghaampa gui ah ng’lung ah mang kiaang ah lai ung ng’düi sei ka hmuk ci. Ani cu küikyan nak vai ngawn pyi ah htomehta awn täng ci. Ani ung aki chih la amik chih om ci. Cun gui cu khomdek khan avan ung a tüih ah Khanpughi ah Mumcha chih ah kyak ci.

⁷ Cun ah htomehta naw law ne mang kiaang ung ngok ciah k’pat lam kut ungka ca k’chaw cu lak ci.

⁸ Cun ah a lak vai-am khiküi paphli la aghaampa m’ku-lei-phli cu, htomehta ah maa ah kawp yawp u ne, ak chang sing naw tingtäu bäng bäng la Khanpughi ah chang gui ah taigü nak ah kya ciah tui ng’uui awn be ciah ghui eikbei gui cu kawt sek sek u netah,

⁹ ami m’cu ah ng’äi k’thai cu; “Nang cu shin ah ca k’chaw la ne, M’Hnüt nak gui khawk ne k’phian khai ah na khin ci nei, Nang cu ami ning ngawn nak la küikyan khai ah Na sih nak awn, khaw nüng ung thu a hlü hlü ah ng’thu ciah, Chang pakhui, ng’shon law phung cu, Khanpughi ah hmawk ah Na khleih ci nei.

¹⁰ Nang naw ngami cu Khanpughi ah khuut bik khai gui ah ngung nak ah taigü ah na k’hmoh gui ci. Ngami naw m’dek khan ah uknak cu gah khai gui nei,” ciah kyak ci.

¹¹ Cun kawn ah han teng ba netah tämkäp phiakhak da ciah khankho chang gui cu ka hmuk ci. Ngami cu mang kiaang koi ne, khiküi paphli la aghaampa gui’ koi ne, ng’düi u netah,

¹² m’lau ne ng’äi ami m’cu cu; “Ami ngawn ah htomehta cu, Hlüngtai nak, bühmang nak, cüivai nak, khüighaat nak, Chang m’sui nak, bäkhäk nak, la m’kümtou nak, gui cu gah khai ah khin khaa ci nei” ciah kyak ci.

¹³ Cun kawn ah khankho, khomdek, khomdek ah kaa la tuinu ung la khaw ah kaa, m’dek ah khan ung om ciah akghing ak’om nici naw; “Mang kiang ung ngok ciah Bawimang la Htomehta cu, M’kümtou nak, chang m’sui nak, bämang nak, hlüngtai nak, cu ng’shon päng ung om sä” cine ng’äi ami m’cu cu ka ng’yak ci.

¹⁴ Khiküi paphli naw, “Amen” cine m’shang gui ci gui. A ghaampa gui naw, kawp ne khawihnah ci gui.