THU PHLAAN 4 - Cho Bible Common Language 2016

Khanmawpi ah Khawihnah Nak

¹ Cun kawn ah ka mang ung Khanmawpi ah m’kawt ng’hmawng sei ka hmuk ci.

² Kei naw ka ng’yak htük ah phyungheng ah ng’gin ah mäih ah ng’ging ciah k’aw naw”, shin ung law ä, ngawi ah ng’dang lawk khai gui ah a mawng cu ka ning hmuh sak khai” cine pyein ci. A cun vai-am Mumcha cu kei ah khan ah gawk lawk ci. Khanmawpi ah mang kiaang tumat om ci, Cun ah kiaang ung mang tumat ngok ci.

³ Ani ah hmai cu pyüü m’htak vai ah mäih ah pyü ci. Mang kiaang ah ang veing ung cüi ne ng’kah ciah yapi pawk ci.

⁴ Cun ah mang kiaang ah ng’veing ung a hei mang kiaang m’ku-lei-phli om ci. Cun ah kiaang gui ung aghaampa sing m’ku-lei-phli ngok ci gui. Ngami cu a bawk bäng bäng sui u ne, ghui lukhu ng’büng bäng bäng ci gui.

⁵ Mang kiaang ah kyong ung khaw lailäp ne ng’thüi ne ng’hmum kyeek ciah ak aw gui lut lawk ci. Mang kiaang ah maa ah Khanpughi ah Mumcha pachih ah kyak ciah mei im pachih cu däi ne khang ci.

⁶ Acun ah mang kiaang ah maa ung pyüülung ah mäih ah vai ci cu om ci. Mang kiaang ah ng’veing ak kit päng ung khiküi paphli om ci. Cun gui cu ami hnu ami maa ah mik bäng ah kya ci gui.

⁷ Ak htük bäih tumat cu phongkawng ah mäih lawk ci, ak hnih nak cu vantang ah mäih lawk ci; ak thum nak cu chang ah hmai ah mäih hmai nak ci, ak phli nak cu yong ciah vanbuk hmu ah mäih lawk ci.

⁸ Cun ah khiküi paphli cu, ami ng’phia pachuk ci lawk ci, ami pum akpung akyong avan ung mik bäng ah kyak ci. Amü ak hnüüp ngami cu kä ng’düm phung ne ng’äi m’cu u ne; “Aktheing, aktheing, aktheing cu Bawipa nei, Hlüngtai pi säih ne, Zanta, tuhngawi, ngawi yä angtäi ghing ciah Khanpughi nei,” ci ne m’kümtou ci gui.

⁹ Mang kiaang ung ngo ne, angtäi sei ghing ne om ciah Bawimang ah bühmang nak, hlüngtai nak, küikyang nak gui cu, khiküi paphli naw ng’äi m’cu ne m’kümtou ci gui. Acun päng ung,

¹⁰ aghaampa m’ku-lei-phli naw angtäi ah ghing ne mangkiang ung ngok ciah, Bawimang ah maa ah m’khuukdong ne, khawihnah ci gui. Ngami naw mang kiaang ah maa ah ami lukhu gui cu m’shän u netah;

¹¹ “Kami Bawipa, Khanpughi, Nang naw ang tüi avan cu na tüisho ciah kyasei, Nang ah ng’yak hlü ah ang tüi cu ghing om ciah kya ci. Cun ah kyasei bühmang nak, küikyang nak, hlüngtai nak gui cu Nang awn khinkhaa ci nei” ci ne pyein ci gui.