THU PHLAAN 21 - Cho Bible Common Language 2016

Khankho Thai La Khomdek Thai

¹ Cun kawn ah khamkhaw thai la khomdek thai cu ka hmuk ci. Zän nä khankho la khomdek cu maih pyi ci. Tuinu phi kä om ba ci.

² Khanpughi ah khanmawpi ungka theingcim ciah Jerusalem mang gaw thai cu a cei awn ng’hmu lawk khai goi ah ng’laamihta ah ng’bilaw ah mäih ah kyum law sei ka hmuk ci.

³ Cun kawn ah mangkiaang ungka ng’shan sei m’lau ah k’aw cu ka ng’yak ci. Cun ah k’aw naw, “Tuhbäi ung Khanpughi ah im cu hnicim chang ah im ah kyak ci. Ani cu ngami ung om sei ngami cu ani ah chang ah kyak ci gui. Khanpughi amät cu ngami awn atäng ah om ne, ngami ah Khanpughi ah kyak khai nei.

⁴ Ani naw ami ng’phli tui avan cu ghu pe gui khai nei. Cun kawn ah sihnak, thüisei nak, kyah nak, m’neh m’awh nak kä om ba khai nei. Akphyim gui avan cu maih yawp pyi ci nei” cine pyein ci.

⁵ Cun kawn ah mangkiaang ung ngok ci naw, “Tuhbäi ung a päng avan cu akthai ah ka pyang ba ci nei” cine pyein ci. Bawipa naw, “A shin ah ng’thu cu ng’düng ne yum vai ah kyak ci kyasei gu ne nami m’hnüt vai nei” cine pyein ci.

⁶ Ani naw leng ba mä ne, “Bi ng’pyi ci nei, kei cu Alpha la Omeka, tün nak la khüm nak ah ka kyak ci, tui gha ciah chang-am ghin nak ah tui cu alä ah ka awk sak khai.

⁷ Näng ciah chang naw shin ah ng’thukhän cu gah khai, kei cu ani ah Khanpughi ah ka kyak khai, ani cu kei ah htapa ah kyak khai.

⁸ Cun ung phi kyik ciah chang, pyaai ciah chang, chang ngawn ciah chang, chang shemshai, chang om kaa, ng’pluh ciah chang, a gup khawihnah ciah chang la hleeihlak ciah chang gui cu yam mei cang ung lut yawp khai gui. Cun cu ak hnih vei nak sihnak ah kyak ci” ci ne pyein ci.

Jerusalem Manggaw Thai

⁹ Leigaai mawng chih awn be ciah eikbei chih kawt ciah khankho chang pachih ungka tumat cu kei ah law netah, “Law ä, Htomehta ah k’chu vai ah ng’laamihta cu ka ning m’hnuh khai nei” ci ne pyein ci.

¹⁰ Ani naw mümcha awn kei cu ang htei ah hlüng ciah khomhtung khan ah na hteh püi netah, Khanpughi ah khanmawpi ah kaa kyum lawk ciah theingciim ciah Jerusalem mang gaw thai cu nam hnuh ci.

¹¹ Cun ah mang gaw cu Khanpughi ah bämang nak awn pyü ciah lung, vai ng’mo ah mäih ah ng’shü ne khang ci.

¹² Cun ah mang gaw chaam nak cu hlüngtai aih ne, m’kawt gha-lei-goi om ci. Cun ah m’kawt gui cu khankho chang gha-lei-goi naw ngäng u sei, m’kawt päng ah khan ah Israel pakhui gha-lei-goi ah ming cu guk ci gui.

¹³ Hni law lam ah m’kawt thum, hni kiaak lam ah m’kawt thum, htum lam ah m’kawt thum, siip lam ah m’kawt thum om ci.

¹⁴ Mang gaw k’chaam nak ung lung k’tung gha-lei-goi ng’ling ci gui. Cun ah lung k’tung gha-lei-goi ung Htomehta ah ng’düihpüi gha-lei-goi ah ming gui cu guk ah kyak ci.

¹⁵ Kei nang thu püi ciah khankho chang ah kut ung mang gaw ni, mang gaw m’kawt gui ni, la mang gaw päng gui nüt nak vai ah ghui ng’mui pum om ci.

¹⁶ Mang gaw cu ayun akdang ng’cawih ne, ng’hniing ne ng’aai ci. Khankho chang naw ghui ng’mui pum awn cun ah mang gaw cu nüt khätah, ayun akdang a hlüng ni cu mäng phiaa gha-lei-hma bäng bäng lawk ci.

¹⁷ Cun kawn ah khankho chang naw chaam k’pang nak cu nüt ba sei, chang gui ah nüt nak awn 216 pei hlüng ci.

¹⁸ Cun ah k’pang cu k’tolung pyü ci awn ami cawih ah kyak ci, mang gaw cu püüi dang ne vai khai ah ghui bäng awn ami cawih ah kyak ci.

¹⁹ Mang gaw chaam cu k’toulung a hlü hlü k’süm ne ami cawih ah kiak ci. Ami k’süm htük cu, k’tolung, akhnih nak cu k’toulung sen, akthum nak cu m’liu lung, akphli nak cu vailung;

²⁰ Akhmaa nak cu m’silung, akchuk nak cu k’pyü lung, akchih nak cu ng’ailung, akcheit nak cu cüilung, akkaw nak cu ng’shülung, aghaa nak cu lungkyiing, agha-lei-ät nak cu lung m’kim, a hga-lei-goi nak cu yapilung ah kyak ci.

²¹ M’Kawt tumat cu yapi ng’mo tumat awn ami pyan ah kya ne, m’kawt gha-lei-goi ung yapi ng’mo gha-lei-goi lawk ci. Mang gaw ah lam gui cun phi ghui bäng ah kya ne püüi dang ne vai ci.

²² Cun ah mang gaw ung pum im cu kä ka hmuk ci. A i ah kyasei ci ung, cun ah pum im cu hlüngtai pi bäih ciah Bawipa, Khanpughi la Htomehta ah kyak ci.

²³ Cun ah mang gaw ah khan ah Khanpughi ah bämang nak cu dei ne Htomehta cu amei im ah kyak ci kisei acun ah mang gaw ung hni la chaa ah akdei kä hlü ci.

²⁴ Chang ah hta avan cu cun ah mang gaw ah akdei ung hteit-hton khai gui. M’dek ah khan ghangpughang gui naw ami ng’bühmang nak cu cun ah mang gaw ah law püi khai gui.

²⁵ Mang gaw m’kawt gui cu hnüüp pum hmawngkhai gui. Cun ah mang gaw ah khaw amü nak kä om ci kyasei m’kawt cu a i yah ung phi kä khaai khai gui.

²⁶ Chang avan naw ami hlüngtai nak la bühmang nak cu cun ah mang gaw ah avan law püi khai gui.

²⁷ Cun ung phi kä theingcim ci phung api ah phi, cun ah mang gaw ah kä lut tuk khai. Thui ng’aa nak vai bik ci la hleeihlak ciah chang gui phi kä lut tuk khai gui. Htomehta ah ghin nak ca-uk ung angming guk ah chang gui bäng vah cun ah mang gaw ung lut tuk khai gui.