THU PHLAAN 20 - Cho Bible Common Language 2016

Kum Phyaa Ghaa

¹ Cun kawn ah khankho chang tumat cu m’htei lungkhui k’hmawn nak la m’si guinu cu kawt ne khanmawpi ah kaa kyum law sei ka hmuk ci.

² Ani naw shawk k’phyu ng’hlui cu pha netah, khawkum phyaa ghaa ung pin ne khit ci. Cun ah khawshe bawi kä cun ung Satan ah kyak ci.

³ Khankho chang naw shawk cu m’htei lungkhui ung yuk chah netah, khokum phiaa ghaa ang pyi güt ung chang gui kä ah cheishoh-en sak gui hlawt vai ah m’hnüt ne choh awn khai shi ci. Khokum phiaa ghaa ang pyi kawn ah ani cu a shäng hta k’hmawn tu ba khai.

⁴ Cun kawn ah mangkiaang gui cu ka hmuk ci. Cun ung ngok ci gui cu m’khoichaa nak vai ah huham ami peit gui ah kyak ci. Cun kawn ah Bawipa Jesuh ah m’dang ah düng nak la Khanpughi ah ng’thu ami pyein ah hmawk ah ami ngawn gui ah, ami mümcha gui cu ka hmuk ci. Ngami naw khiküi la ani ah gup cu kä khawihnah ci gui. Ami m’calai la ami kut ung phi khiküi ah m’hnüt nak cu kä la tuk ci gui. Ngami cu ghing ne tho law ba u ne, Bawi Khrit awn atäng ah khokum phiaa ghaa ung ghangpughang ah mäih ah uk tuk ci gui.

⁵ (Cun ung k’pawih ba ciah sik ci gui läi cu khokum phiaa ghaa ang pyi kawn ah ghing ne tho ba ci gui.) Shin cu ak htük bäih ah sik ci gui ah thawh ba nak ah kyak ci.

⁶ Cun ah ak htük ung tho ba ci gui cu yeikyai nak la hlüngtai nak awn kümbe ci gui. Hnih vei sih nak naw ngami kä k’phaa tu ba gui khai. Ngami cu Khanpughi la Bawi Khrit ah k’taigüi ah kya u ne, Bawi Khrit awn a täng ah khokum phiaa ghaa ung uk tuk khai gui.

Satan Amdi Nak

⁷ Khokum phiaa ghaa ang pyi kawn ah Satan cu lut law ba netah;

⁸ m’dek ah khan ung chang avan cu cheishoh sak ne, kok la Makok ah ming ciah ng’tuk bi vai ah ng’cut sak gui khai. Ngami cu tuinu kem ah laigin chü ah da ci gui.

⁹ Ngami cu khomdek khan avan ung püi u ne, Khanpughi ah chang gui ah ng’düm hmun la ani ah m’hni ah mang gaw cu khaai yawp ci gui. Cun ung phi khankho ah kaa meidäi kya law ne, ngami cu ui gui yawp ci.

¹⁰ Chang gui cheishoh sak gui ciah khoshe cun phi yam meidäi ung yuk shum ci gui. Acun ah mei ung khiküi la purofet she phi ami yuk shum pyi ah kyak ci. Ngami cu amü ak hnüüp hta ng’shon ung dukdeiu nak gah khai gui.

Ak hnubäih ah M’Khoichaa Nak

¹¹ Cun kawn ah mangkiaang a bawknu la acun ung ngok ciah Bawimang cu ka hmuk ci. Acun ah Bawimang ah maa ung khankho la khomdek cu ng’kawn ne maih lawk ci.

¹² Cun kawn ah sik ci gui cu ak yaw akdäm ah a ciah mangkiaang ah maa ah ng’düi lawk ci gui. Cun ung cachaw gui phi ng’phian lawk ci gui, cun kawn ah ghin nak ah ca-uk ah kyak ciah a hei cachaw phi ng’phian lawk ci. Sik ciah chang gui cu, cun ah ca-uk gui ung gu ne ami m’hnüt gui ah ami mät ah om ih ah ciah m’khoichaa nak gah ci gui.

¹³ Tuinu naw ani ung om ciah aksi gui cu ap lawk ci. Sik nak la sihnak ah khaw naw phi ngami ung om ciah aksi gui cu ap lawk ci gui. Aksi gui ami van cu ami mät ah bilawh a ciah m’khoichaa nak gah ci gui.

¹⁴ Cun kawn ah sihnak la sihnak ah khaw avan cu meidäi ung yuk shum ci gui. (Cun ah meidäi cu akhnih vei nak sihnak ah kyak ci.)

¹⁵ Ghin nak ca-uk ung ang ming kä ng’gu tuk ciah chang gui phung cu cun ah meidäi ung yuk shum gui yawp ci gui.