THU PHLAAN 2 - Cho Bible Common Language 2016

Ephesus Khrithabum Amcäi Nak

¹ Ephesus khrithabum ah khankho chang-am ca peit law nei; shin ah ca cu akpat lam ah aisi pachih kawt ne, ghui mei ng’düi pachih ah ng’lung ah hteit shüi shüi ciah m’cäi nak ah kyak ci.

² Nang ah bilawh cu ka hmat ci, nang naw a i hlawk ah nak tha nak, a i hlawk ah na ling k’tha la hniimgei nak a om cu kei naw ka hmat ci. Nang naw changshe gui kä na hniim gei nak gui hlawt la ang düihpüi ah kä kya lang ne, ana ng’düihpüi nei cik ci gui ah chang gui cu, ami hleeihlak dang khai ah nami k’tä gui cun phi kei naw ka hmat ci.

³ Nang cu hniimgei nak om ci, kei ah hmawk ah ang htei ah na yaica ci, kä nam lungksi ci,

⁴ Cun ung phi ak htük ungka ah mäih ah nang naw kei cu kä na na m’hni ba ci kyasei, ning pyein m’sheet vai om ci.

⁵ A i hlawk ah na yu kyak vü cu ngaih-tüh ba shüm ä, na kat nak ung kaa ng’yu ba ne, ak htük ung na bi ah mäih ah na bi ba vai nei. Na katnak ungka kä na ng’yu ba ah a kyak ung na om nak ah kei cu law netah, na mei ng’düi cu a hei ah ka ning hen pek khai nei.

⁶ Cun ung phi Nikolaitan ah chang gui ah bilawh cu kei naw ka thüi nak ah mäih ah nang naw phi thüi na tuk ci sei, ka ning yei nak ci nei.

⁷ “Khrithabum gui-am Mumcha naw am thein gui cu nami hnga a om ung ngai ne nami ng’yak vai nei. “Näng nak gah ciah chang-am Khanpughi ah chaam kyong ah phung ciah, ghin nak sing ah aktheih ei nak hning cu ka pek khai nei.

Smirna Khrithabum Amcäi Nak

⁸ “Smirna Khrithabum ah khankho chang-am ca peit law nei; “Shin ah ca cu tün nak la khüm nak ah kya ne, sihnak ung ka tho ba ciah m’cäi nak ah kya ci.

⁹ Kei naw na yaica nak la na geinvai nak cu ka hmat ci, cun ung phi nang cu akcang ah na ng’bühmang ci. Keimi Jew chang nei cik ci gui naw ning m’kat gui ne ami ng’thu cu ka hmat ci, ngami cu Jew chang ah kä kyak ci gui, Satan ah chang ah kyak ci gui.

¹⁰ Zaica nak na awt vai ah api ah phi kä na kyih-en vai nei. Nangmi amshah gui cu khawshe naw thawng ung ning chum gui netah, ning k’cet gui khai nei, hnüüp gha ah kyong ung yaica ne na om khai nei. Na sih ung khüt sei bekhüt ne om ä, kei naw näng nak ah ng’cheng ghin nak ka ning pek khai.

¹¹ “Khrithabum gui-am Mumcha naw am thein gui cu nami hnga a om ung ngai ne nami ng’yak vai nei! “Näng nak gah ciah chang gui cu akhnih vei nak sihnak phiawn nak khai gui nei.

Perkamum Khrithabum Amcäi nak

¹² “Perkamum Khrithabum ah khankho chang-am ca gu ne peit law ne; “Shin ah ca cu vang ah vei ghaat ciah khim shäm ci naw amcäi nak ah kyak ci.

¹³ Nang a hawi na om cu ka ning hmat ci, nang cu satan ah kiaang ung na om ci. Bekhüt ciah ka chang Antipas cu Satan ah om nak ung ami ngawn yah ung, nang cu kei ung ng’düng ne na yum nak kä na nawng ci.

¹⁴ Cun ung phi Balaam ah m’theithang läk ciah chang api cu pyein m’shet vai om ci nei: a gup-am sonkcan ah ei ei vai la, pletbeng vai ah Israel chang gui-am lam shüm gui ciah Balak khawshe cu Balaam naw am theithang ah kyak ci.

¹⁵ Acun ah mäih ah nangmi ung Nikolaitan ah chang gui ah m’theithang nak läk ciah chang gui phi om ci.

¹⁶ Tuhbäi nami katnak ung ng’yu ba vä! Kä nami ng’yu ba ung kam gawng ung lut lawk ciah vang ah vei ghaat ciah khim awn ka ning tu gui khai nei.

¹⁷ “Khihtabum gui-am Mumcha naw am thein gui cu nami hnga a om ung ngai ne nami ng’yak vai nei! “Näng nak gah ciah chang-am thup ne ghim ah manna m’htut cu ka pek khai, k’toulung bawk phi ka pek khai. Cun ah k’toulung bawk ung guk ah ming thai cu, a u naw kä hmat khai, acun ah lung gah ci bäng naw hmat khai.

Thiatira Khrithabum Amcäi Nak

¹⁸ “Thiatira Khrithabum ah khankho chang-am ca gu ne peit law nei! “Shin ah ca cu, a mik meidäi ah mäih ah ng’shü ne, kyei m’tui ah mäih ah pyü sei khaw nak ciah, Khanpughi ah Htapa ah m’cäi nak ah kyak ci.

¹⁹ Kei naw a i na bi cu ka hmat ci. Na m’hni nak, na bekhütnak, khuut na bi nak, la na hniimgei nak cu ka hmat ci. A htük ung na bi ah tah bä law pi ni law pi khai ah na bi cun phi ka hmat ci.

²⁰ Cun ung phi nang ka ning pyein m’sheet nak cu, amät naw amät Khanpughi ah ng’shä ah pyein ciah hnumi nu Jeyebel cu na dou ah hmawk ah kya ci. Ani naw kei ah chang gui cu ami pletbeng vai la a gup-am sonkcan ah ei nami ei vai ah m’theithang ne lam k’she m’shüm gui ci.

²¹ Kei naw ani ang yu ba vai ah akhin ka pek ci, cun ung phi ani ashet katnak ung kä ng’yu ba hlük ci.

²² Cun ah kyasei ani cu a ih phak ung ng’yän sak ne ka geinvai sak khai nei, ani awn ng’yawng’pawm ciah chang gui phi ang htei ah yaica khai gui. Ngami cu cun ah hnumi awn ami shetkat ah hmawk ah kä ami ng’yu ba ah a kyak ung kei naw a tuhbäi ge ka yaica sak gui khai.

²³ Ani läk ciah chang gui cu ka ngawn gui khai, cun kawn ah kei cu chang nüng ah m’lung ngaih la ng’yak hlü ka hmu hmat ciah, khrithabum avan naw hmat khai gui nei.

²⁴ “Cun ung phi ngami ah kawn ah Thiatira ung chang gui naw cun ah shekak ciah m’thei nak cu kä läk ci gui. Chang a hei gui naw Satan ah thuuk ciah a mawng gui ah ami pyein gui cun phi, nangmi naw kä nami m’thei tuk ci. Nangmi ah khan ah a hei phuih gih kä ka taih khai.

²⁵ Kei kä ka law pha ah chuih nami kut ung om ci cu, htek sei nami shum vai.

^26-28 Näng nak gah ne, kei ah ka ng’yak hlü ah khaw khüt sei om ciah chang-am Kapa ung ka gah ah huham cu ka pek khai. Cun ah huham cu, changpakhui avan m’si k’hteipawng awn uk gui ne, m’sitawn awn m’dek k’am thah gep ah mäih ah dep nak ah kyak ci. Kei naw ngami-am thaihke aisi phi ka pe gui khai nei.

²⁹ “Khrithabum gui-am Mumcha naw am thein gui cu, nami hnga a om ung ngai ne nami ng’yak vai nei!