THU PHLAAN 19 - Cho Bible Common Language 2016

¹ Cun kawn ah khanmawpi ah chang khli ah k’aw ah mäih cu ka ng’yak ci. Cun ah k’aw naw Khanpughi m’kümtou vä, Khanpughi cu hun nak, bämang nak la hlüngtai nak awn be ci nei.

² Ani ah m’khoichaa nak cu ng’düng ne ng’khän ci nei. Ashetkat nak awn khomdek chang gui cheishoh sak gui ciah pletbeng ciah hnumi cu m’kat pyi ci nei. Ani naw Khanpughi ah chang gui a ngawn ah phäh ah Khanpughi naw am kat ah kyak ci nei” cine m’lau ci gui.

³ Leng ba mä ne “Khanpughi cu m’kümto vä, cun ah mang gaw ui ciah meikhu cu angtäi sei khu ci nei” cine m’lau ci gui.

⁴ A ghaampa m’kulei-phli la khiküi paphli naw, mangkiaang ung ngok ciah Khanpughi cu khawihnah u netah “Amen, Khanpughi cu m’kümto vä” cine m’lau ci gui.

Htomehta ah Hta M’um Nak

⁵ Cun kawn ah mangkiaang ung ka lut lawk ciah k’aw naw, “Khanpughi ah a shäm gui la ak chang gui avan, Khanpughi kyih aa ciah ak hmaw ang vai avan naw Khanpughi cu m’kümto vä” cine pyein ci.

⁶ Cun ung chang khli ng’nään ah k’aw, tuinu ah ng’hmum k’aw la kho ng’hmum ah mäih k’aw cu ka ng’yak ci. Cun ah k’aw naw, “Khanpughi cu m’kümto vä, hlüngtai pi k’bäih ciah Bawipa mi Khanpughi cu Ghangpughang ah kyak ci nei.

⁷ Htomehta ah hta m’um nak gawk law pyi ciah kyasei, mi yeikyai ne a hlüngtai nak cu mi m’kümto khai nei. Ceimah khai ah ng’laamihta cu pawng ge ne om ci nei.

⁸ Ani cu a suisak vai ah theing ne ng’ciim ciah sui phi gah pyi ci nei. (Sui k’ni cicu Khanpughi ah chang gui ah om ih k’ni ah kyak ci.)

⁹ Cun kawn ah khankho chang naw, “Shin cu na guk vai nei, Htomehta ah hta m’um nak ung ami khü gui ah chang gui cu yeikyai nak om ci nei” cinetah leng ba mä ne, “Shin ah ng’thu cu Khanpughi ah ng’thu akcang ah kyak ci nei” cine na pyen nak ci.

¹⁰ Cun ah kyasei kei naw a khaw pei ah kawp ne ka khawihnah khai pawng ngätah, khankho chang naw, “Kä na bi vai! Kei cu nangni, na phäi nau gui ni, Bawipa Jesuh ah m’dang ah ang thu düng läk ciah chang gui ni ah püipaw changshäm ah ka kyak ci, Khanpughi vah na khawhnah vai” cine na pyen nak ci. Bawipa Jesuh ah m’dang ah ng’thu düng awn vah purofet gui cu hnün thawh nak gah ci gui.

Ng’se Bawk Ng’cum Ciah Bawimang

¹¹ Cun kawn ah khankho m’kawt ng’hmawng sei ka hmuk ci. Cun ung ng’se bawk tumat om ci. Cun ah ng’se bawk ung ng’cum ci cu bekhüt la ng’düng nak ming nak ci. Ani cu ng’düng khai ah ng’thu m’chaa ne, ng’düng khai ah ng’tuk bik ci.

¹² Amik cu meidäi ah pying ne, alu ung lukhu akda ng’büng ci. Amät kawn ah a u naw kä a hmat ah ang ming cu ani ah khan ah ng’guk ci.

¹³ Asuisak cu si ng’hlui ah kyak ci. Ani ah ming cu, “Khanpughi ah ng’thu” ah kyak ci.

¹⁴ Khankho gakaap gui naw, ak theing bäng bäng sui u ne, ng’se bawk bäng bäng ng’cum u ne a hnu ah läk ci gui.

¹⁵ Khaw nüng chang päng a heem nak vai ah am gawng ung khim k’ghaat lut lawk ci. Ani naw chang gui cu m’si k’htei pawng awn uk gui khai. Ak hlüngtai pi k’bäih Khanpughi ah m’lungshe nak ah kyak ciah sapyit neen nak ah khui ung sapyit cu neen khai nei.

¹⁶ Ani ah asuinu la a phei khaw ung, “Bawi nüng ah Bawi, mang nüng ah Mang” ciah ming cu ng’guk ci nei.

¹⁷ Cun kawn ah khohni ung khankho chang tumat ng’düi sei ka hmuk ci. Ani naw khan ah yawng ciah kha gui-am, “Law vä, Khanpughi ah mang ei cu ei law vä!

¹⁸ Law u ne ghangpughang gui, gabawi gui la gakap gui ah ami sa, ng’se gui la ng’se ung ng’cum ci gui ah ami sa, khleihtein khuimah, akyaw akdäm chang avan ah sa cu ei vä” cine m’lau ci.

¹⁹ Cun kawn ah khiküi ni, khomdek khan ung ghangpughang gui la, ami gakap gui ni naw, ng’se bawk ng’cum ci la a gakap gui cu ng’tuk vai ah ng’cut law u sei ka hmuk ci.

²⁰ Khiküi la ani ah maa ung cäi aih vai m’dang ciah purofet cu pha ne chum ci gui. (Cun ah purofet she cu khiküi ah m’hnüt nak gah ci gui la ani khawihnah ci gui-am cäi aih vai m’dang gui ne, cheishoh sak gui ciah kyak ci.) Khiküi la purofet she ani nik hnih cu, yam mei ah däi ciah meidäi ung yuk shum goi ci gui.

²¹ A gakap gui cu ng’se bawk ung ng’cum ciah m’gawng ung lut lawk ciah khim ghaat awn ngawn gui ci gui. Kha gui naw ami sa gui cu ami phü ah ei ci gui.