THU PHLAAN 18 - Cho Bible Common Language 2016

Babilon Gawnu ah Dishum Nak

¹ Cun kawn ah khanmawpi ah kaa kyum lawk ciah khankho chang tumat cu ka hmuk ci. Ani ung küikyang ciah huham om sei, ani cu khomdek khan avan ung dei ne khang ci.

² Ani naw m’lau ne Babilon mang gaw cu di pyi ci nei! Di pyi ci nei! Cun ah gawnu cu khawshe gui, mumchashe gui ah om nak, shemshai ciah khoshe gui ah ng’yi nak ah kyak ci nei.

³ A i ah kyasei ci ung changpakhui akda naw acun ah gawnu awn ng’yaw ng’pawm nak ah kyak ciah yu cu awktat ci gui nei. Khomdek ah khan ah ghangpughang gui cun phi ani awn ng’yaw ng’pawm ci gui nei. Khomdek ah khan ah sumlei ci gui cun phi acun ah gawnu ah pletbeng nak awn ng’bühmang pyi ci gui nei” cine pyein ci.

⁴ Cun kawn ah khanmawpi ah kaa k’aw a hei cu ka ng’ya ba ci. Cun ah k’aw naw; “Lut law ba vä! Kei ah chang gui, Ani ungka lut law ba vä! Ani awn a täng ah kä nami cheishoh tu vai, Ani awn a täng ah m’shetkat nak kä nami gah tu-en vai!

⁵ A i ah kyasei ci ung ani ah katnak cu khanmawpi k’phaa ne hlüng ne, Ani ah cheishoh nak ah lam cu, Khanpughi naw a shüm hmat yawp pyi ah hmawk ah kyak ci.

⁶ Ngami ah khan ah abi ah mäih ah, Ani ah khan ah bi tu ba vä; Ani ah bi ah mä goi khai ah, Ani ah khan ah phu tu ba vä; Nangmi ah hmawk ah a ning pyan peit gui ah mä, a goi ah kha pi khai ah a khap cu pyan pe vä.

⁷ Ani cu amät bämang ne ang päi ng’ye awn khin khai ah, yaica nak la geinvai nak ung gawk sak vä. A i ah kyasei ci ung, ani naw, “Kei cu mangnu ah ka kyak ci, hmeinu ah kä ka kyak ci, Kei ung a i yah ung phi thüisei nak kä om khai” ci ne a kyak ah hmawk ah kyak ci.

⁸ Acun gui ah phäh ah leigaai gui, gawpai nak gui, thüisei nak gui, cawigha nak gui cu ani ah khan ah hnüüp ät ge awn gawk lawk khai nei. A i ah kyasei ci ung, ani m’khoichak ciah Bawipa Khanpughi cu, m’hlüngtai pi bäih ah hmawk ah kyak ci,” ci ne pyein ci.

⁹ Ani awn ng’yaw ng’pawm lä mante ciah khomdek khan ung ghangpughang gui naw, ani ui ciah mei ah akhu cu ami hmuh ung kyap ne m’lau khai gui nei.

¹⁰ Ngami naw ani ah geinvai nak cu hmu u ne, ang htei ah kyikyawk u ne, asho nak ah ng’düi u netah, “Hlüngtai küikyang ciah mang gaw, Babilon! Cäi-aih vai thüi aih vai kyak ci nei. Nang cu nayi ät hta ah kyong ung m’shetkat nak na gah pyi ci nei” ci ne kiak khai gui nei.

¹¹ Sumlei ciah chang gui cun phi ami khawh khleih khai a u phi kä om ba sei, kyap ne thüi khai gui nei.

¹² Ngami ah khawh gui cu ghui, ngui ng’mo, yih, pää, ng’hlo pyai, tui ng’ui a hlü hlü, m’vuihaa, sing a hlü hlü, cheeipai, m’si k’tolung;

¹³ Sing ng’ui, phakphai, phaknan, situi, mura, sapyit tui, khitui, püm, htang, sei, htome, ng’se yatha, khleihtein la chang hnun ghing gui ah kyak ci.

¹⁴ Sumlei ciah chang gui naw cun ah mang gaw-am, “Nang naw na ng’yak hlü ah khawh gui cu kä om ba ci nei, bämang hlüngtai nak gui phi maih yawp pyi ci nei, cun gui cu nang naw ngawi ah phi kä na gah ba khai nei” cine pyein ci gui.

¹⁵ Babilon mang gaw ung sumlei u ne bühmang lawk ci gui ah sumlei chang gui cu, cun ah gawnu ah dishum nak hmu u ne, kyikyawk u netah, asang ah ng’düi u ne,

¹⁶ “Shin ah mang gaw ah hmawk ah cäi aih vai, thüi aih vai, kiak ci nei; Ani cu k’phla sui, ng’hlo sui, pää sui gui sui ne ghui, ng’mo la k’cünglung gui cu awi man ci nei.

¹⁷ A khawh chaam avan cu nayi ät ah kyong ung dishum yawp ci nei” ci ne kyap ne m’lau khai gui nei. Hteinpaw keptain gui la hteinpaw ung ng’cum tuk ci gui, hteinpaw ung bi bik ci gui la sumlei ci gui cu a sho nak ah ng’düi u ne;

¹⁸ Cun ah mang gaw ui ciah meikdäi meikhu gui cu hmu u netah, “Shin ah mang gaw ah mäih a hei mang gaw a i sang ung phi kä man khai nei” cine m’lau ci gui.

¹⁹ Ngami cu m’vut kaw ne ami lu khan ah phyang u netah, “Cäicat aih vai, thüi sei aih vai kyak ci nei, hteihpaw k’ta, sumlei chang phung bämang sak ciah mang gaw cu nayi ät hta ah kyong ung di ne maih ci nei” cine kyap ne m’lau ci gui.

²⁰ Khankho chang gui cun ah mang gaw adi ah phäh ah yei vä, Khanpughi ah chang gui ang düihpüi gui, purofet gui yeikyai vä! Ani naw nangmi ah khan ah abi phung phung ah hmawk ah Khanpughi naw ani cu m’kat pyi ci nei.

²¹ Cun kawn ah k’thamah pi ciah khankho chang naw lungsum teih lawk ciah lungnu cu, la ne tuinu ung yuk shum netah “Babilon mang gaw cu a shin ah mäih ah tui ung yuk shum khai gui nei, a ngawi ah phi kä dang law ba khai nei.

²² Nang ungka tingtäu tum k’aw, phiphät phyungheng k’aw gui phi kä ng’yak ba vai nei. Bi bik ci gui phi kä hmuh ba vai, lungkhiing ah ng’ghin phi kä ng’yak ba vai nei!

²³ Ngawi ah phi nang ung mei im ah dei cu kä hmuh ba vai nei. Ng’puui ng’khap khai ah ng’piangmi, ng’laami ah k’aw phi kä ng’yak ba vai nei. Nang ah sumlei chang gui cu khomdek ah khan ung hlüngtai pi ci gui nei. Nang naw chang ah hta avan cu ng’yo hleip nak awn na cheishoh sak pyi yawp ci nei,” cine pyein ci.

²⁴ Babilon mang gaw ah dishum nak ah mawng cu purofet gui ah si, Khanpughi ah chang gui ah si, m’dek khan ung ami ngawn gui ah si gui cu cun ah mang gaw ung ali ah hmawk ah kyak ci.