THU PHLAAN 16 - Cho Bible Common Language 2016

Khanpughi ah M’lungshe nak awn Be Ciah Eikbei Gui

¹ Cun kawn ah pum im ah kyong ungka naw khankho chang pachih-am “Khanpughi ah m’lungshe nak be ciah eikbei chih cu khomdek khan ah yuk hukä cine ng’hawh ne a pyein cu ka ng’yak ci.

² Akhtük bäih ah khankho chang naw a eikbei ungka cu m’dek khan ah yuk huk khätah ah m’hnüt nak gah ci gui la ani ah a gup khawihnah ciah chang gui cu, ang htei ah ami m’neh m’awh vai ah hlut ne khei lawk ci gui.

³ Akhnih nak ah khankho chang naw a eikbei ungka cu tuinu ah khan ah yuk huk khätah, tuinu avan aksi ah si ah mäih ah ng’hlat yawp ne, cun ung om ciah akghing phung avan si yawp ci gui.

⁴ Akthum nak ah khankho chang naw a eikbei ungka cu tuinu tuihta avan ah khan ah yuk huk khätah, cun ah tui gui avan cu si ah ng’lat yawp ci.

⁵ Cun kawn ah tui ngäng ciah khankho chang naw “tuhngawi la ngawi yä om ne, theingciim ciah Bawipa, nam khoichaa nak cu bä ne chün ci nei.

⁶ Ngami naw Khanpughi ah chang gui la purofet gui ah si cu huk sak ci gui nei, cun ah kyasei ami awk vai ah si cu na peit gui ah kyak ci nei. Ngami cu ami bi ah mäih ah gah ba ci gui ah kyak ci nei” cine a pyein cu ka ng’yak ci.

⁷ Cun kawn ah sonkiaang ungka lut lawk ciah k’aw naw, “A hlüngtai säih Bawipa, Khanpughi! Nang ah m’khoichaa nak cu ak cang ah ng’düng ne chün ci nei” cine a pyein cu ka ng’ya ba ci.

⁸ Akphli nak ah khankho chang naw a eikbei ungka cu khohni ah khan ah yuk huk khätah hnii cu mei ah ng’ai ne cang ne chang ui yawp khai ah kya lawk ci.

⁹ Chang gui cu cun ah ng’ling aih ci naw ui law gui khätah, leigaai gui ah khan ah a huham om ciah Khanpughi cu m’shetkat ne ng’thu ci gui. Cun ung phi ngami cu ami katnak ung phi kä ng’yu ba u ne, Khanpughi phi kä m’kümto ci gui.

¹⁰ Akhmaa nak ah khankho chang naw a eikbei ungka cu khiküi ah mangkiaang ah khan ah yuk huk khätah, khiküi ah uknak khaw avan cu mü ne hmüp yawp ne, cun ung om ciah chang gui cu geinvai u ne, ami haa htui ne kawp yawp ci gui.

¹¹ Cun ah ami hlut khei nak la ami m’neh m’awh nak ah hmawk ah mawpi Khanpughi cu m’shetkat ci gui. Cun ung phi ami mät ah cheishoh nak ung ka kä ng’hlat law ba ci gui.

¹² Akchuk nak ah khankho chang naw a eikbei ungka cu Euphratis tuinu ah khan ah yuk huk khätah cun ah tuinu cu kawi ne ket sei, hnii law lam ah kaa ghangpughang gui ah law nak vai ah lam cu ng’hmawng lawk ci.

¹³ Cun kawn ah k’u ah mäih lawk ciah mümcha she pathum cu ka hmuk ci. Cun gui cu shawk, khiküi la purofet she gui ah m’gawng ungka lut lawk ci gui ah kyak ci.

¹⁴ Ngami cu khawshe ah mümcha gui ah kya ne cäi aih vai phi m’dang hning ci gui. Khaw nüng ung ghangpughang päng cu, hlüngtai pibäih ciah Khanpughi ah ng’tuk bi nak hnüüp ung ng’cut lawk khai gui ah khü gui vai ah ngami cu hteit ci gui.

¹⁵ “Ngai vä, kei cu m’guk-ei ah mäih ah ka lawk khai nei! Cii m’gang ne asui them ngäng ciah chang cu akplui ah kä om khai, chang ah hmu ah kä lüng’aa khai, yeikyai nak om khai nei.”

¹⁶ Cun kawn ah mümcha gui naw ghangpughang gui cu khü gui yawp u ne, Hebrew ng’thu awn Armakeddon ami ci nak ah hmun ah k’bum gui ci gui.

¹⁷ Akchih nak ah khankho chang naw, a eikbei ungka cu khawkhi ung yuk huk khätah pum im kyong ah mangkiaang ungka “Bi pyi ci nei” ciah k’aw cu ng’shan lawk ci.

¹⁸ Acun ung khaw lailäp ne ng’hmum ne ng’kyeek ne, shihpi ng’thüi ne thüng lawk ci. Chang ah ng’tüi kawn ung shin ah mäih ah shihpi kä thüng man ci. Cun cu akshekha pibäih ah kyak ci.

¹⁹ Mang gawnu cu thum ah ng’pai ci. Khomdek ah khan ah mang gaw avan phi di yawp ci. Khanpughi naw Bibilon mang gaw cu shüm ba netah, a khap ung kaa, am lungshe nak ah sapyit tui cu awk sak ci.

²⁰ Ng’lei avan piawn ne m’htung avan maih ci.

²¹ Khan ah kaa chuih vawh teih teih lawk ciah khawk’aa ng’ma gui kya lawk ci. Cun ah khawk’aa ung geinvai aih u netah, chang gui naw Khanpughi cu m’shetkat ne ng’thu ci gui.