THU PHLAAN 14 - Cho Bible Common Language 2016

¹ Cun kawn ah han teng ba netah Zion khomhtung khan ah Htomehta ng’düi sei ka hmuk ci. Amät ah ming la Apa ah ming ami m’calai ung ami guk ah chang 144, 000 gui cu ani awn a täng ah om ci gui.

² Khanmawpi ah ng’güüt ciah tuinu la khaw ng’hmum ah mäih ah ng’shan ciah k’aw cun phi ka ng’yak ci.

³ Cun ah chang 144, 000 gui cu mangkiaang ni, khiküi paphli ni, aghaampa ni gui ah maa ah ng’düi u ne ng’äi ak thai cu m’cu ci gui. Hniciim chang avan ungka ngami bäng cu a ghü gui ah kyak sei cun ah ng’äi cu ngami bäng naw m’cu thei ci gui.

⁴ Ngami cu hnumi awn kä ng’etsheng man ciah ng’piangmi hta gui ah kya ne, htomehta ah hteh nak päng ah läk tuk ci gui. Ngami cu chang ah hta avan ungka a ghü gui ah kyasei, Khanpughi la Htomehta ung ng’ap ma ci gui ah kyak ci.

⁵ Ngami cu a i sang ung phi kä hleei ci gui, m’kat nak gui vai a i kä om ci.

Khankho Chang Pathum

⁶ Cun kawn ah khankho ah khankho chang tumat cu yong shüi shüi sei ka hmuk ci. Ani naw mdek ah khan a khaw päng ungka a hlü hlü ah ng’thu ciah khui päng pa päng-am m’thein vai ah ang täi ah om ciah Thu Ni cu law püi ci.

⁷ Cun ah khankho chang naw, “Khanpughi cu m’tamkhah vä, a hlüngtai nak cu m’kümtou vä! Chang am khoichaa nak vai ah akhin cu gawk law pyi ci nei. Khankho khomdek, tuinu tuihta avan, tüisho ciah Khanpughi cu khawihnah vä” cine m’lau ci.

⁸ Akhnih nak ah khankho chang naw a hnu ah läk law netah, “Babilon gawnu di pyi ci nei! Di pyi ci nei! Ani naw ng’yaw ng’pawm nak ah kyak ciah yu cu chang ah hta avan-am tu pyi ci nei!” cine pyen ci.

⁹ Akthum nak khankho chang naw maa lawk ci goi cu läk law goi netah, “Khiküi la ani ah gup khawihnah ne ani ah m’hnüt nak cu alu ung baw, a kut ung baw gah ciah chang cu;

¹⁰ Khanpughi ah m’lungshe nak ah khap ung kaa, nuipi ciah am lungshe nak ah kyak ciah sapyit tui cu awk khai nei. Cun awk ciah chang cu theing ciim ciah khankho chang la Htomehta ah maa ah yaam mei awn huut ne dukdeiu nak gah khai gui nei.

¹¹ Cun ah meidäi ungka meikhu cu angtäi ah khu ne kai khai nei. Khiküi la a gup khawihnah ne ani ah ming awn m’hnüt nak gah ciah chang gui cu, amü ak hnüüp dinggei nak kä om khai nei” cine m’lau ci.

¹² Khanpughi awn ng’thu k’bääi ne, Bawipa Jesuh ung bekhüt ciah Khanpughi ah chang gui cu, acun ah khin ung m’khüt näng nak vai hlü ci nei.

¹³ Cun kawn ah khankho ah kaa k’aw naw, “Tuhbäi ung tün ne Bawipa ah khuut bi netah, sik ci gui cu yeikyai nak om ci nei, cun cu na guk vai nei” ci sei ka ng’yak ci. Mumcha naw, “Ä! Cun cu akcang nei! K’tha nane bilo ciah chang gui cu yeikyai ne ng’düm khai gui nei, ami bi ah akchaw cu ami mät awn ng’khap ci nei” cine pyein ci.

Khomdek khan ung Geit Khäm Nak

¹⁴ Cun kawn ah han teng ba netah, khongmei bawk tumat cu ka hmuk ci. Cun ah ng’mei bawk ung chang ah mäih lawk ci, tumat ngok ci. Ani cu alu ung lukhu ng’büng ne, a kut ung ghaat ciah sangsawn kawt ci.

¹⁵ Ahei khankho chang tumat cu pum im ungka lut law netah, ng’mei bawk ung ngok ci-am, “Khomdek khan ah geit hmin pyi ci, khäm vai ah khin gawk lawk ci kyasei, na sangsawn awn aat ne khäm ä” cine m’lau ne pyein ci.

¹⁶ Cun ah kyasei ng’mei bawk ung ngok ci naw, a sangsawn awn khomdek khan cu yuk pai ne geit cu khäm ci.

¹⁷ Cun kawn ah khanmawpi pum im ung kaa, a hei khankho chang cu lut lawk ci. Ani naw phi ghaat ciah sangsawn cu kawt ci.

¹⁸ Cun kawn ah mei ah däi ciah khankho chang tumat cu sonkiang ungka lut lawk ci. Ani naw sangnawn kawt ciah khankho chang-am, “Na sangsawn awn khomdek khan ah sapyit gui cu yuk khäm ä, up yawp pyi ci gui nei” cine m’lau ci.

¹⁹ Cun ah kyasei cun ah khankho chang naw, a sangsawn awn khomdek khan ah sapyit gui cu aat ne k’bit ne, am theih gui cu Khanpughi ah m’lungshe nak ah kyak ciah sapyit neen nak ah khui ung m’tawk yawp ci.

²⁰ Sapyit cu manggaw ah akpung ah neen u sei, neen nak ah khui ungka si ng’hlui lut law ne long ci. Cun ah si cu mäng phiaa goi ung long ne, dawng hmaa ah thuuk ci.