THU PHLAAN 13 - Cho Bible Common Language 2016

Khiküi Pahnih

¹ Cun kawn ah alu chih aki ghaa lawk ciah khiküi tumat cu tuinu ung kaa lut law sei ka hmuk ci. Aki päng ung lukhu büng ne, alu päng ung Khanpughi ah thang shet sak ciah ming om ci.

² A müi cu pupi kawng ah mäih law ne, a khaw gui cu khawm ah khaw ah mäih lawk ci. Am gawng cu phongkawng ah m’gawng ah mäih lawk ci. Shawk naw a hlüngtai nak, amangkiaang la m’gäi nak ah a huham cu khiküi-am ap ci.

³ Khiküi ah lu tumat cu sih nak vai hlawk ah leim pang ne phi, khan ba pyi ci. Khomdek khan ah chang avan cu cäicat u ne khiküi ah hnu ah läk yawp ci gui.

⁴ Shawk naw a huham cu khiküi-am a ap pyi ah kyasei, chang avan naw shawk cu khawhnah ci gui. Chang gui naw khiküi cun phi khawihnah u ne, “Khiküi ah mäih a u om khai ang? Ani ng’tuk püi hning ci a u om khai ang?” cine pyein ci gui.

⁵ Khiküi cu m’ghämce ne Khanpughi ah thang shet sak nak vai la cha phlikip-lei-goi ung uknak vai ah huham cu gah ci.

⁶ Ani naw Khanpughi ni, Khanpughi ah angming ni, a om nak ah khanmawpi ni gui cu tün ne shetkat sak pyi ci.

⁷ Ani cu Khanpughi ah chang gui tu ne näng nak gui vai la akhaw päng ung a hlü hlü ah ng’thu ciah khui päng pa päng uk nak vai ah huham cu gah ci.

⁸ Ami ngawn ah Htomehta ah ghinnak ca-uk ung khomdek khan kä a tüisho pha ge ung a guk ah, ming gui ah kawn ah k’pawih ba ciah chang phung naw khiküi cu khawihnah ci gui.

⁹ Akhnga om ci phung naw ngai ne ang yak vai nei!

¹⁰ Ami phaa vai cu pha tuk cang khai gui, khim awn ami ngawn vai cu ngawn tuk cang khai gui, shin ah a mawng ung Khanpughi ah chang gui cu ng’düng ne bekhüt yawp ne ami om vai nei.

¹¹ Cun kawn ah khiküi tumat cu m’dek ungka lut law sei ka hmuk ci. Ani cu htome ah mäih ah aki hnih om ne, shawk ah mäih ah ng’thu pyein ci.

¹² Ani naw dang law htük ciah khiküi ah m’gäi nak huham cu amät ah ma ah mang yawp ci. Ani naw asih nak vai ah aleim khan ba ciah khiküi cu, khomdek la khomdek chang avan-am liing ne khawihnah sak gui ci.

¹³ Akhnih nak ah khiküi naw küikyang ciah cäi aih vai gui m’dang ci. Chang gui ah maa ah khankho ah kaa mei cu khomdek khan ah kiak law sak ci.

¹⁴ Ani naw ak htükbäih ah khiküi ah maa ah abi hning ah cäi aih vai gui cu m’dang ne khomdek chang gui cu hmühma sak gui ci. Ani naw khim awn leim ne phi kä si ne ghing ciah khiküi m’tamkhah nak ah a gup cu pyan sak gui ci.

¹⁵ Ak htük ung khiküi ah agup am ghin nak peit nak hning cu ak hnih nak ah khiküi ung om ci. Cun ah kyasei a gup cu ng’thu ne ani kä khawihnah tuk ci gui cu m’sih gui hning ci.

¹⁶ Cun ah khiküi naw, yaw däm ci, pyam mang ci, khleihtein la khuimah chang avan cu ami k’pat lam kut ung, kä cun ung ami m’calai ung m’hnüt nak awn liing ne m’hnüt gui ci.

¹⁷ Cun ah m’hnüt nak ah kyak ciah khiküi ah ming, kä cun ung ang ming dang sak ciah khei nak, awn kä ami m’hnüt tu ah chang phung cu sumlei ng’dong’pe ne kä gah tuk ci.

¹⁸ Shin ah a mawng ung cüivai vai hlü ci. Lunglang ciah chang naw acun ah khiküi ah khei nak gui ah mawng cu khei thei ci. Cun ah khei nak cu chang tumat ah ming ah phäh ah ng’düi ci. Cun ah khei nak cu 666 ah kyak ci.